1 Miyaka ishilini iyatumile Selemani ukutsenga Ing'anda ya Imulungu na ing'anda ya mfalume haimalile, 2 kaitsenga keli imiji iyeng'ighwe na Huramu, kuya kaweng'a imiji ayo Waisiraeli wakale. 3 Hambele Selemani kaghenda Hamati Zoba, kaghuboka ghumji aghwo, 4 na kaghutsenga ghumji ghwa Tadmori ako kunyika, na katsenga tsing'anda tsa ukwikila ipfinu ako Hamati. 5 Pfipfila Selemani tsakaitsenga keli imiji aino: Beti Horoni ya uchanya na Beti Horoni ya kuhisi, imiji ina tsingome, imibanda na ghamalango ghana tsimalamingo, 6 ghumji ghwa Balati na imiji yake yose ina tsikano, imituka yake ya ukukweghighwa na ya wadina falasi wake, na chinu chochose chayabamile ukutsenga ako Yerusalemu, Lebenoni au hohose mna ufalume wake. 7 Iwanu wangi wose iwasighale kulawa mna Wahiti, Waamori, Waperizi, Wahivi na Wayebusi, na wose iwakalile si Waisiraeli baye, 8 na iwana wawo iwalekile kukomighwa na Waisiraeli, Selemani kawatenda watumwa wa kusang'ana ng'onde tsa kunanahitsighwa, na apfo pfipfo pfawotenda mbaka leloli. 9 Lekeni kulawa mna Waisiraeli Selemani ng'amtendile baye munu wowose yawe mtumwa wa sang'ano tsake. Waisiraeli tsawawa maasikali, wamwenga wakulu wa maasikali wake, wakulu wa imituka yake ya ukukweghighwa, na wakulu wa wadina falasi wake. 10 Awano wawo iwakulu iwekighwe na mfalume Selemani: Iwakulu awo tsa miya mbili na hamsini iwang'ali wowemila iwanu. 11 Selemani tsakamghala neghe Farao mfalume wa Misiri kulawa kuna ghumji ghwa Daudi, kamghala kuna ing'anda iyamtsengele kwaapfila tsakalonga, "Mwehe wangu ng'atsokala mna ing'anda ya Daudi mfalume wa Isiraeli, kwaapfila hanu hohose halikalile lisanduku lya IMNDEWA, ihanu aho haenzeluka."

12 Selemani tsakamlapfila IMNDEWA nambiko tsa ukulakatsighwa mchanya mwa imatsabahu iyamtsengele IMNDEWA hambele ha ichikuta cha ing'anda ya Imulungu. 13 Kalapfa tsinambiko atso ka pfailaghitsighwe na Musa chila litsuwa lya Sabato, pfihungo pfa mlawo wa ghumwetsi, na pfihungo pfidatu pfa chila mwaka, chihungo cha pfighate ing'apfighelighwe hamila baye, na chihungo cha majuma, na chihungo cha pfibumbulika. 14 Tsakaghawinza malaghitso gha Daudi, aba wake, kapanga nzamu tsa watambika wose, na tsa Walawi iwembile, na iwawapfile watambika kumtunya Imulungu na kutenda sang'ano tsawo. Kuya keka makingili gha wakalitsa imilango yose, kwaapfila apfo pfipfo pfayalaghitse Daudi, imunu wa Imulungu. 15 Nawo ng'awalekile baye ghayalaghitse mfalume kwa watambika na Walawi, hamwe na chinu chochose cha tsikano tsa ukwikila ipfinu.

16 Apfo pfinu pfayatendile Selemani tsapfitimila, kulawa halikighwe libwe lya ghumsingi ghwa ing'anda ya IMNDEWA mbaka halimalile. Apfo ing'anda ya IMNDEWA imala. 17 Kuya Selemani kaghenda Esioni Geberi na Eloti iili kumwani mwa isi ya Edomu. 18 Huramu kamghalila tsimeli itsilongotsighwe na iwakulu wa maasikali wake na iwanu iwamanyile ghoya ibahari. Wawo na maasikali wa Selemani waghenda mbaka Ofiri, kulawa ako wasola nzahabu kilo elufu kumi na tano, wamghalila mfalume Selemani.