1 Yoashi tsakana miyaka saba ahala hayanzile kutawala isi ya Yuda. Katawala kwa miyaka alubaini aku kokala Yerusalemu. Mai wake tsakakemighwa Zibia kulawa ghumji ghwa Beerisheba. 2 Yoashi katenda ighanoghile hambele ha IMNDEWA mna ghamatsuwa ghose mtambika Yehoyada hayakalile mgima. 3 Yehoyada kamkwelela mfalume Yoashi wehe weli, nawo wamwelekela wana wamale na mapinga. 4 Hambele Yoashi kalamla kuitsenga keli ing'anda ya IMNDEWA. 5 Apfo kawakema watambika na Walawi, kawalongela, "Mghende kuna imiji ya Yuda, mkabokele tsisendi tsawolihagha Waisiraeli wose chila mwaka, tutsitsengele keli ing'anda ya Imulungu wenu, lelo msumke mghende." Lekeni Walawi ng'awasumke baye. 6 Kuya mfalume kamkema Yehoyada chilongotsi wawo, kamghutsa, "Heule ng'ubamile baye Walawi wasole ikodi kulawa mna Yuda na Yerusalemu, ikodi iyalaghitse Musa munu wa IMNDEWA iwanu walihe, iwe yakulolela Lihema lienzeluke?" 7 Kwaapfila iwanu iwamuwinzile Atalia, ipinga ayula yehile, tsawaibomola ng'anda ya Imulungu na wengila mghati, na ipfinu pfose ipfilapfighwe pfiwe pfa IMNDEWA tsawapfisola na kuitambikila milungu ya Baali. 8 Apfo mfalume kawalaghitsa Walawi, wasongole sanduku lya kwikila tsisendi walike kunze hana lilango lya ing'anda ya IMNDEWA. 9 Kuya wawatangatsila iwanu wose iwali mna imiji yose ya Yuda na Yerusalemu wamghalile IMNDEWA ikodi, ka apfila Musa imunu wa Imulungu pfayawalaghitse Waisiraeli hawang'ali wa kunyika. 10 Iwakulu wose na iwanu wose wadeng'elela, waghala ikodi yawo na wayika mna lisanduku alyo mbaka limema. 11 Chila Walawi hawalighalile lisanduku alyo kwa iwakulu iwomsang'anila mfalume, nawo hawakona ka kuna sendi nyingi, imwandishi wa mfalume na imunu iyomwapfila mtambika mkulu wotsilapfa tsisendi tsili msanduku, kuya wolyuitsa keli hanu hake. Waghendelela kutenda apfo chila mala, apfo wapata sendi nyingi. 12 Mfalume na Yehoyada waweng'a tsisendi atso iwanu awala iwemilile isang'ano ya ukuitsenga inganda ya IMNDEWA. Nawo wawakema iwatsenga ng'anda, iwasongola mibiki, mafundi chuma na mafundi shaba watse waitsenge keli ing'anda ya IMNDEWA. 13 Apfo mafundi awo wasang'ana kwa ghumoyo ghwawo ghwose ing'onde ayo, waitsenga ghoya keli ing'anda ya Imulungu ka pfaikalile ghumwande, nayo ima ghoya. 14 Hawamalitse kutsenga ing'anda, wamghalila mfalume na Yehoyada tsisendi itsikalile, kuya ipfinu pfa ing'anda ya Imulungu pfitendighwa kwa fetsa atso. Pfinu apfo pfitumika mna isang'ano ya ing'anda ya Imulungu, na mna ukulapfila nambiko tsa ukulakatsighwa, na pfinu pfa ukudusulila ubani na pfinu pfimwenga pfa nzahabu na fetsa.

Matsuwa ghose gha Yehoyada hayakalile mgima, iwanu waghendelela kulapfa nambiko tsa ukulakatsighwa mna ing'anda ya IMNDEWA.

15 Lekeni Yehoyada kalala, na hayapfikile miyaka miya na salasini kafa. 16 Wamtsika kuna ghumji ghwa Daudi, kwawatsikighwe iwafalume, kwaapfila tsakatenda ighanoghile mna isi ya Isiraeli, kwa Imulungu, na kwa ing'anda yake. 17 Yehoyada hayafile, iwakulu wa Yuda wamtsila na wamwinamila Yoashi, walonga naye, naye kawatogholela chawabamile. 18 Apfo iwanu waleka kutambika mna ing'anda ya IMNDEWA, Imulungu wa iwahenga wawo, wanza kutambikila tsingutso tsa Maashera na pfinyagho. Imulungu kawonela maya iwanu wa Yuda na Yerusalemu kwa ukutotsa ako. 19 Hata apfo IMNDEWA kawaghalila manabii wawakanye, na woye kuna yeye, lekeni wawo ng'awahulike baye. 20 Baho Muhe wa Imulungu kamtsila Zakaria mwana wa mtambika Yehoyada, naye kema hambele hanu henuke chidogho, kawalongela, "Imulungu komghutsani, hebali mleka kughakinda ghamalaghitso ghake? Ng'amdaha baye ukubweda! Kwaapfila mumleka IMNDEWA, naye kamlekani." 21 Iwanu wabama kumkoma Zakaria, na mfalume kawalaghitsa iwanu wamtowe na ghamabwe hana uluwa lwa ing'anda ya Imulungu mbaka yafe. 22 Mfalume Yoashi kamkoma Zakaria, naye kaghasemwa ghose ghayamtendele Yehoyada aba wake Zakaria. Zakaria hayafile kalonga, "IMNDEWA yone alyino na yamuyitsile iyatendile apfino."

23 Ghumwaka haghung'ali ghumala, maasikali wa Shamu waipfamila Yuda na Yerusalemu. Wawakoma iwakulu wose, wasola pfinu pfingi wapfighala kwa mfalume wa Damaski. 24 Hata ka maasikali wa Shamu tsa wachidogho, Imulungu kawapfila wawatowe maasikali wa Yuda iwakalile wengi, kwaapfila iwanu wa Yuda tsawamleka IMNDEWA, Imulungu wa iwahenga wawo. Apfo Imulungu kamuhigha Yoashi kubitila Washamu. 25 Waashamu hawokile wamleka Yoashi kalaghighwa ghendo. Iwatumighwa wake watenda tsengwe lya kumkoma, kwaapfila yeye tsakamkoma imwana wa mtambika Yehoyada. Apfo wamkoma hayang'ali kawasa mlusatsi mwake. Kuya katsikighwa kuna ghumji ghwa Daudi, lekeni si ahala hawotsikighwa iwafalume baye. 26 Iwanu iwamtendele tsengwe lya kumkoma wawo awano, Zebadi mwana wa pinga iyakemighwe Shimeati wa ilukolo lwa Amoni, na Yehozabadi mwana wa pinga wa Moabu iyakemighwe Shimriti. 27 Aghala ghose ghawatendile iwana wamale wa Yoashi, gha ukutsenga keli ghoya ing'anda ya Imulungu, na unabii wose ulongighwe kuna yeye, wandikighwa mna ichitabu cha wafalume. Na Amazia imwanaghe katawala hanu hake.