1 Selemani hayamalitse ukulomba, ghumoto ghuhulumka kulawa kulanga, ghulakatsa ipfinu ipfilapfighwe na tsinambiko tsa ukulakatsighwa, kuya utunitso wa IMNDEWA umema mna ing'anda. 2 Na iwatambika ng'awadahile baye ukwingila mng'anda amwo kwaapfila utunitso wa IMNDEWA tsaumema mna ing'anda ya IMNDEWA. 3 Waisiraeli wose hawonile ghumoto ghohulumka kulawa kulanga na utunitso wa IMNDEWA umema mna ing'anda ya Imulungu, wenama mbaka ipfihanga pfawo pfidonza hasi, wamtambikila na kumlongela mighede IMNDEWA, walonga,

"Kwaapfila kanogha

libatsi lyake lyokala

ghamatsuwa ghose."

4 Baho mfalume Selemani na iwanu wose wamlapfila nambiko IMNDEWA. 5 Naye Selemani kamlapfila IMNDEWA Imulungu ng'ombe elufu ishilini na mbili na ng'olo laki imwe na ishilini. Apfi pfipfo mfalume na Waisiraeli wose pfawaikile ing'anda iwe ya IMNDEWA Imulungu. 6 Watambika wema hanu hawalaghitsighwe weme, Walawi nawo wema aku wana pfinu pfa ukumwimbila IMNDEWA pfayapfitengenetse mfalume Daudi pfiwe pfa ukumlongela IMNDEWA mighede. Kuya wemba, "Kwaapfila uluso wake wokala matsuwa ghose," ka Daudi pfayawalaghitse. Iwatambika nawo watowa tsimalati aku Waisiraeli wose wema wima.

7 Kuya mfalume kachitenda ichibwalu cha mghati cha ing'anda chitogholighwe na Imulungu, na baho yeye kalapfa nambiko tsa ukulakatsighwa, na tsa pfijo, na tsa ukukala tseghamba. Katenda apfo kwaapfila imatsabahu ya shaba ikalile hambele ha IMNDEWA tsandodo ukwenela tsinambiko tsose atso tsa ukulakatsighwa, tsa ipfijo, tsa ukukala tseghamba, na tsa ghamapfuta. 8 Apfo Selemani katenda chihungo, na kukala mtingano mkulu ghwa Waisiraeli wose na yeye kwa matsuwa saba, iwanu tsawalawa Lebo Hamati mbaka hana ilukolongo lwa Misiri. 9 Mna litsuwa lya nane waitenda imatsabahu itogholighwe na Imulungu, kwa matsuwa saba, na matsuwa ghangi saba wang'ali wodeng'elela ichihungo. Haghamalile matsuwa agho, wetingana hamwe wamalitsile ukudeng'elela. 10 Mna litsuwa lya ishilini na ndatu lya ghumwetsi ghwa saba, Selemani kawalekelela iwanu woke, na woka mmakaye mwao akuno wodeng'elela na kusangalamka mna imimoyo yawo kwa ghose ighanoghile IMNDEWA ghayamtendele imtumighwa wake Daudi na iwanu wake Waisiraeli.

11 Apfo mfalume tsakamalitsa ukutsenga ing'anda ya IMNDEWA na ing'anda ya mfalume, kadaha ukughatenda aghala ghose ghayabamile mna ing'anda ya IMNDEWA na ya mfalume. 12 Kuya IMNDEWA kamlawila Selemani nechilo, kamlongela, "Ghaulombile nighahulika, nihasaghula hanu ahano hawe ing'anda yangu ya ukundapfila tsinambiko. 13 Ning'awema imvula au ning'awaghalila nzighe waje imimeya yawo, au wang'apata utamu wihile, 14 lekeni ka iwanu wangu watsehulumsa iwenyegho, wang'alomba na wang'anibama na kutsileka tsinzila tsawo, nene nitsowahulikitsa kulawa kulanga, nitsotsilekelela tsinzambi tsawo, na nitsoihonetsa isi yawo. 15 Lelo nitsoilolesa Ing'anda aino na kuhulikitsa ichilombighwa hanu ahano, 16 kwaapfila niisaghula na kuitenda yele ng'anda aino ili iwanu wangu wanitambikile ahano matsuwa ghose. Nitsoilolesa na kuikunda matsuwa ghose. 17 Naghwe ung'anitumikila pfinoghile ka pfayatendile aba wako Daudi, ung'atenda ghose ghanikulaghitse na kughateghelesa ghanikulongele, 18 nene nitsoutenda ufalume wako uwe na ngupfu ka pfanilaghane na Daudi aba wako, ahala hanimlongele, ‘Ngutsoleka baye kuwa na imunu wa kutawala Isiraeli.’ 19 Lekeni mng'aleka kuniwinza na kughaleka ghaniwalongeleni, na kughaleka ghamalaghitso ghaniweng'ile na kughenda kuitumikila milungu ingi na kuitambikila, 20 nene nitsomng'olani kulawa isi yangu yaniweng'ile. Pfipfila ing'anda aino yaniitoghole kwa taghwa lyangu nitsoilema, nitsoitenda iwe si chinu baye na itsobetsighwa na iwanu wose. 21 Hata ka ing'anda aino sambi yotunyighwa ng'ani, chila munu iyatsobita ahano katsokangawala na ukwighutsa, ‘Hebali IMNDEWA kaitendela apfino isi aino na ing'anda aino ya Imulungu?’ 22 Iwanu watsakwidika, ‘Kwaapfila wamleka IMNDEWA, Imulungu wa aba tsawo iyawalapfile Misiri, waiwinza milungu ingi, waitambikila na kuitumikila. Lelo IMNDEWA kawaghalila maghayo ghose aghano.’ "