1 Mfalume Selemani hayamalitse tsing'onde tsose tsa ukuitsenga ing'anda ya IMNDEWA, kapfighala ipfinu apfila aba wake Daudi pfayapfilapfile kwa IMNDEWA. Ipfinu apfo tsa fetsa, nzahabu, na pfinu pfingi, na kapfika mna ichiheleto cha ukwikila ipfinu mna ing'anda ya IMNDEWA.

2 Kuya mfalume Selemani kawakema hamwe wanzehe wose wa Isiraeli na pfilongotsi wose wa ghamakabila ako Yurusalemu, na iwakulu wa tsikolo, wakalisole lisanduku lya lilaghano lya IMNDEWA kulawa Sayuni, Ghumji ghwa Daudi walighale kuna ing'anda ya Imulungu. 3 Iwanu wose wa Isiraeli wetingana kwa mfalume Selemani mna ghumsimu ghwa ichihungo, mna ghumwetsi ghwa Saba. 4 Iwanzehe wose wa Isiraeli hawapfikile, iwatambika wetwika lisanduku. 5 Walawi na iwatambika tsawalighala mchanya lisanduku lya laghano na Lihema Iienzeluke na pfinu pfose ipfihenzeluke ipfikalile mwihema amwo. 6 Mfalume Selemani na mtingano ghwa Isiraeli wetingana hambele ha lisanduku lya lilaghano, kuya walapfa nambiko tsa wang'ombe na wang'olo wengi ing'awopetika baye. 7 Kuya watambika walingitsa lisanduku lya IMNDEWA hanu hake, mna ichiheleto cha mghati cha ing'anda, hanu haenzeluke ng'ani, walika hasi ha ghamabawa gha ipfiumbe apfila. 8 Ghamabawa gha pfiumbe awo tsaghatandatsighwa mchanya mwa hanu halikighwe lisanduku, apfo lisanduku na imibiki yake yaukulighalila tsaikala hasi mwe ghamabawa. 9 Kwaapfila mibiki yake ya ukulighalila tsaikala mitali ng'ani, kusa kwa imibiki ayo koneka kulawa hanu haenzeluke hambele ha ichiheleto cha mghati, lekeni ng'ayoneke baye kulawa ubali wa kunze. Imibiki ayo ya ukulighalila sanduku yabaho mbaka leloli. 10 Ng'akukalile na chinu chingi baye mghati mwa lisanduku, ila tsakuna ghamabamba meli gha ghamabwe ghayekile Musa akula Horebu, hanu IMNDEWA hayekile lilaghano na wanu wa Isiraeli hawalawile Misiri.

11 Kuya iwatambika walawa hanu haenzeluka. Iwatambika wose iwakalile hala tsawetenda wela bila kulowa ghamakingili ghawo. 12 Walawi wose iwang'ali wakwimba, tsina Asafu, Hemani na Yedutuni na Walawi wangi wa kolo tsawo, aku wapfala maghwanda ghawo gha chitani chinoghile aku wakinda ghamatoatsi na pfing'weng'we na pfilimba wema ubali wa mashaliki mwa matsabahu. Watambika miya na ishilini iwatowa malati tsa wahamwe nawo. 13 Wemba aku wowinza midundo ya tsimalati, na matoatsi, na pfinu pfimwenga pfawotowa, tsawamtunya na wamlongela mighede Imulungu. Wemba kwa kukemelela walonga,

"Kwaapfila Yeye kanogha

na libatsi lyake lyokala ghamatsuwa ghose."

Baho ing'anda ya Imulungu imema libingu. 14 Libingu alyo liwatenda iwatambika waleke kusang'ana, kwaapfila ukulu wa Imulungu tsaumema mna ing'anda ya Imulungu.