1 Kuya Selemani kanza kuitsenga ing'anda ya Imulungu ako Yerusalemu mna ichidunda Moria ako IMNDEWA kwayamlawile Daudi, aba wake, hanu hayasaghule Daudi hana ichibwalu cha ukubetela ingano cha Orinani wa ilukolo lwa Yebusi. 2 Mfalume Selemani kanza ukutsenga ing'anda ya Imulungu mna litsuwa lya keli na ghumwetsi ghwa keli ghwa ghumwaka ghwa kane ghwa ufalume wake. 3 Ing'anda Selemani iyamtsengele Imulungu tsaina utali wa futi tisini, na ughatsi wake futi salasini. 4 Na ichikuta cha ing'anda china utali wa futi salasini, ka pfauli ughatsi wa ing'anda, na utali wake kughenda kuchanya tsa futi miya imwe na semanini, mghati mwa ichikuta acho kakandika nzahabu. 5 Ichikuta ichikulu tsakachighubika na tsimbao tsa miberoshi na kachibakatsa inzahabu inoghile na kachola mibiki ya mitende na minyororo. 6 Mfalume Selemani kaihamba ing'anda ya Imulungu kwa ghamabwe ghanoghile gha bei ng'ulu. Inzahabu yaitumile tsailawa isi ya Parivaimu. 7 Kakandika nzahabu mna ing'anda yose, mna tsiboliti tsake na ipfitsingiti pfake, na imibanda yake na imilango yake. Kachola kwa ukukwangula pfiumbe ipfikemighwa makelubi mna ubanda wa ing'anda. 8 Kuya katenda hanu Haenzeluke ng'ani. Utali wake na ughatsi wake tsa futi salasini, kachikandika ichiheleto acho kwa nzahabu ya tani ishilini. 9 Misumari yaitumile tsaina utsito upfika nusu kilo ya nzahabu. Kuya kapfighubika pfiheleto pfose pfa kuchanya kwa nzahabu. 10 Kalaghitsa watengenetse pfinyagho pfibili pfa makelubi kwa tsimbao, kapfighubika kwa nzahabu na kapfika Hanu Haenzeluke ng'ani. 11 Chila chiumbe chikala china mabawa meli ghana futi kumi na tano. Bawa limwe lya futi saba na nusu tsaligusa ubanda umwe wa ichikuta, na libawa lya kabili lya futi saba na nusu ligusa libawa lya ichiumbe wa kabili. 12 Kuya libawa lya ichiumbe wa kabili tsaligusa chitala ubali ungi wa ichiheleto na lya kabili tsaligusa libawa lya ichiumbe wa mwanduso mghati mwa ichiheleto. 13 Utali wa ghamabawa ghose gha ipfiumbe awo weli tsaukala futi salasini. Wema aku wololesa ichikuta chikulu. 14 Naye katengenetsa panzia lya maghwanda matselu ighanoghile lidadatsighwe kwa nyutsi tsa buluu, nzambalau, na ndung'u. Lipanziya alyo tsalihambighwa pfinoghile kwa pfiumbe wana ghamapamanilo iwokemighwa makelubi kwa tsinyutsi atso.

15 Mfalume Selemani katengenetsa ngutso mbili tsa shaba, chila imwe chimo chake tsa futi ishilini na saba, katsika hambele ha ing'anda. Chila ngutso tsaina litwi mchanya mwake lina utali futi saba na nusu. 16 Katengenetsa mikufu, kuya kaika mchanya mwa tsingutso atso. Kuya katengenetsa pfinu ka ghamatunda gha makomamanga miya imwe, kapfika mna imikufu ayo. 17 Katsisimika tsingutso atso tsa shaba hambele ha hanu haukwingilila kuna ing'anda ya Imulungu. Ingutso isimikighwe ghumoko ghwa kujilo kaikema Yakini, na aila isimikighwe ghumoko ghwa kumoso kaikema Boazi.