1 Mfalume Yosia kamtendela Pasaka IMNDEWA mna ghumji ghwa Yerusalemu, wachinja wang'olo wa Pasaka mna litsuwa lya kumi na nne lya ghumwetsi ghwa mwanduso. 2 Kawasaghula watambika iyawekile mna tsing'onde tsawo mna ing'anda ya Imulungu na kawaghuma ghumoyo watsitende pfinoghile. 3 Kuya kawalaghitsa Walawi iwang'ali wowafunda iwanu wa Isiraeli, iwaenzeluke hambele ha IMNDEWA, kawalongela, "Likeni lisanduku lienzeluke mna ing'anda iyaitsengile Selemani mwana wa Daudi, mfalume wa Isiraeli. Ng'ambamighwa baye kuliduta keli mna ghamayegha ghenu. Lelo mumtumikile IMNDEWA, Imulungu wenu na iwanu wake wa Isiraeli. 4 Hamsang'ana tsing'onde tsenu mwighole kwa kulola kolo tsenu, ka pfayandike Daudi, mfalume wa Isiraeli, na ka pfayandike Selemani imwanaghe. 5 Mwighole hamkwima hanu haenzeluke kwa kulola tsikolo tsenu tsamlawa ili chila lukolo lwa iwanu wa Isiraeli ludahe kwapfilighwa na yumwe wenu. 6 Muwachinje wang'olo wa Pasaka, mwitende mwele, kuya muwapfile ndughu tsenu, watende achila chayalongile IMNDEWA kubitila Musa."

7 Kuya Yosia kaweng'a iwanu wamene na wang'olo elfu salasini, na wang'ombe elufu ndatu, wawe wa nambiko ya Pasaka, wose awano tsawalapfighwa kulawa kuna imifugho yake imwenyegho. 8 Nawo iwakulu wake kwa ukubama wenyegho walapfa pfinu pfawo na waweng'a iwanu, watambika na Walawi. Hilikia, Zekaria na Yeieli iwakulu wa ing'anda ya Imulungu, waweng'a iwatambika wamene na iwang'olo elufu mbili na miya sita na wang'ombe mia ndatu wawe nambiko tsa Pasaka. 9 Naye Konania na ndughu tsake weli, Shemaya na Netaneli, hamwe na Hashabia, Yeieli na Yozabadi iwakalile pfilongotsi wa Walawi, nawo pfipfila waweng'a Walawi ng'olo na mene elufu tano, na ng'ombe miya tano, wawe nambiko tsa Pasaka. 10 Hawamalitse kutenda chila chinu kwa kuideng'elela Pasaka, iwatambika wema hanu hawo, na Walawi wema mna ghamakingili ghawo, ka pfayalaghitse mfalume. 11 Wawachinja wang'olo wa Pasaka, nawo iwatambika wamitsa idamu iwaibokele kulawa kuna wawo kuna imatsabahu, nawo Walawi wawahuna wanyama awo. 12 Kuya wabaghula wanyama iwalapfighwe wawe nambiko tsa ukulakatsighwa ili waweng'e tsikolo natso tsimlapfile IMNDEWA ka pfayandikighwe mna ichitabu cha Musa. Tsawawatenda pfipfo kwa wang'ombe. 13 Wawabanika wanyama wa Pasaka mna ghumoto ka pfailaghitsighwe, na wayambika inyama ienzeluke mna ghamabigha, masufuria na mna tsinongo, kuya wasumka kuwagholela iwanu wose. 14 Hambele Walawi weyaanda iwenyegho na iwatambika, mana watambika lweleko lwa Aruni wang'ali wotenda sang'ano ya ukulapfa nambiko tsa ukulakatsighwa, na tsa ghamapfuta mbaka nechilo, apfo Walawi weyandalila iwenyegho na ukuwaandalila watambika lweleko lwa Aruni. 15 Nawo iwanu iwakwimba, lweleko lwa Asafu, wema hanu hawo, ka pfayalaghitse mfalume Daudi, Asafu, Hemani na Yedutuni nabii wa mfalume. Nawo iwokalitsa ghamalango tsawakala hana ghamalango. Ng'awabamighwe baye kuleka sang'ano yawo, mana ndughu tsawo Walawi tsawawandalila Pasaka. 16 Chila chinu ichibamighwa kutendeka kwa ajili ya ichihungo cha Pasaka tsachitendeka mna litsuwa alyo, ili kudeng'elela Paska na kulapfa nambiko tsa kulakatsighwa hanu aho ukutambikila he IMNDEWA ka pfayalaghitse mfalume Yosia. 17 Waisiraeli iwakalile baho wadeng'elela Pasaka na chihungo cha ipfighate ifilihela hamila kwa matsuwa saba. 18 Tsang'ana wadeng'elele baye Paska ka aino kulawa ghamatsuwa gha nabii Samweli. Kuduhu mfalume hata yumwe wa Isiraeli, iyadeng'elele Paska ka aino iyaideng'elele mfalume Yosia hamwe na iwatambika, Walawi na iwanu wose wa Yuda, na Waisiraeli iwakalile baho na iwanu wa Yerusalemu. 19 Ipasaka ayo ideng'elelighwa mna ghumwaka ghwa kumi na nane ghwa mfalume Yosia.

20 Agha ghose haghamalile, mfalume Yosia hayamalitse kuyika ghoya Ing'anda ya Imulungu, Neko mfalume wa Misiri kagheluka kuitowa Karikemishi, kuna ghumto Efurate. Naye mfalume Yosia kalawa kaghenda yaketowe naye. 21 Lekeni mfalume Neko katuma usenga iulonga, "Ng'ondo aino si yako baye, mfalume wa Yuda. Sitsile baye kwitowa naghwe, ila nitsa kwitowa na maaduwi tsangu, na Imulungu kandaghitsa nisumke ukuwatowa, lelo uleke kulema chayolonga Imulungu iyali hamwe na nene, hela katsokukoma." 22 Lekeni Yosia ng'atoghole baye kumleka hela. Kalema kutegheletsa chayalongile Imulungu kubitila Neko, apfo kapfala maghwanda ghangi yaleke kumanyika ka mfalume, kuya kaghenda kwitowa mna ichiwala cha Megido. 23 Nawo iwakwasa imishale wamwasila mfalume Yosia ghumshale, baho mfalume Yosia kawalongela iwatumighwa wake, "Mnilapfe ahano! Nilaghighwa pfihile." 24 Watumighwa wake wamlapfa mna ghumtuka ghwake ghwa ukukweghighwa na falasi kuya wamdinitsa mna ghumtuka ghungi na woka naye mbaka Yerusalemu, ako kafa, wamtsika mna ipfibaka pfa iwahenga wake. Iwanu wose wa Yuda na Yerusalemu wamdomboketsela Yosia 25 Nabii Yeremiya kamwimbila wila wa kumlilila Yosia. Tangiya baho mbaka leloli iwamale na mapinga wose womtambula Yosia hawakwimba wila awo. Chinu achino chiwa chihendo mna isi ya Isiraeli na wila awo wandikighwa mna ichitabu cha ukudomboketsa. 26 Aghala ghose ghayatendile Yosia na ighanoghile ghayatendile ka pfaghandikighwe mna ghamalaghitso gha IMNDEWA, 27 na ghose ghayatendile kulawa hayanzile mbaka hayamalitse, ghandikighwa mna ichitabu cha kumbukumbu tsa wafalume wa Isiraeli na Yuda.