1 Kuya iwanu wose wa Yuda wamsola Uzia, imwanaghe Amazia, iyakalile na miyaka kumi na sita wamtawatsa yawe mfalume wawo, yasole hanu ha Amazia, aba wake. 2 Hayafile Amazia, Uzia yuyo iyaghutsengile keli ghumji ghwa Elati na kughuyitsa kuna utawala wa Yuda. 3 Uzia tsakana miyaka kumi na sita hayawile mfalume, na katawala Yerusalemu kwa miyaka hamsini na mili. Mai wake tsakakemighwa Yekolia, iyolawa Yerusalemu. 4 Uzia katenda ighanoghile hambele ha IMNDEWA, ka apfila Amazia aba wake pfayatendile. 5 Tsakelapfa imwenyegho mna ukumbama Imulungu mna ghamatsuwa gha Zekaria hayawile kamgima, Zekaria tsakamfunda Uzia yampfuke Imulungu. Chila pfayambamile IMNDEWA, naye Imulungu kamtenda yabwede. 6 Uzia kaghenda kwitowa na Wafilisti, kaibomola imibanda ya ghumji ghwa Gati, Yabine na Ashidodi. Kaitsenga keli imiji iikalile habehi na Ashidodi na kungi mna isi ya Filisti. 7 Imulungu kamwapfila ukuwahuma Wafilisti, Waarabu iwakalile Guri Baali, na Wameuni. 8 Waamoni tsawamliha ikodi, naye tsakamanyika mbaka Misiri, kwaapfila ufalume wake tsauna ngupfu. 9 Kuya Uzia katsenga minala ako Yerusalemu hana imembe ya Lilango na hana Lilango lya Kulwanda, na hana imembe ya ubanda, na kaitsengela mibanda iminala ayo. 10 Pfipfila katsenga minala kunyika, kuya kahimba matsimbu mengi, kwaapfila tsakana wanyama wengi iwakalile hasi ha ipfidunda na mna ipfiwala. Kwaapfila ukulima tsakumnoghela, tsakana wanu iwang'ali wosang'ana mna imighunda yake ingi na mna imighunda yake ya mitsabibu ikalile kupfidunda na ina lidongo linoghile. 11 Kubita agho ghose Uzia tsakana maasikali iwakalile ghoya kwa ukwitowa. Tsaweghola mna ghamakingili hawabamile kughenda kwitowa, mwandishi Yeieli na mkulu wawo Maaseya kaghandika ghamataghwa ghawo, aku wang'ali wolongotsighwa na Hanania, chilongotsi yumwe wa mfalume. 12 Maasikali awo wose wang'ali wolongotsighwa na pfilongotsi elfu mbili na mia sita. 13 Nawo wang'ali wowalongotsa maasikali laki ndatu na elufu saba na miya tano, wana tsingupfu ya ukumwapfila mfalume yawatowe maadui tsake. 14 Uzia kaweng'a maasikali awo tsingawo, imigoha, kofia tsa chuma, maghwanda gha chuma, minde na ghamabwe gha ukwika mna tsing'umbewe. 15 Ako Yerusalemu iwanu wake wamtengenetsela mitambo ya ukwasila imishale na ghamabwe makulukulu. Uzia kayika mna iminala na hana tsimembe tsa ubanda wa ghumji. Tsakamanyika chila hanu, na ngupfu tsake tsongetseka sideke kwaapfila Imulungu yang'ali yomwapfila ghendo.

16 Lekeni mfalume Uzia hayawile na tsingupfu ng'ani, tsakeghoda, na maghodo ghake ghamghwisa hasi. Tsakamtendela totso IMNDEWA, Imulungu wake, kwa ukwingila mna ing'anda ya Imulungu aku kobama yadusule upfumba hana imatsabahu ya ukudusulila upfumba. 17 Lekeni mtambika Azaria aku kelongotsa na watambika semanini ing'awopfuka wamuwinzilitsa mfalume mghati, 18 kuko wamghoma, wamlongela, "Uzia, aino si sang'ano yako baye ukumdusulila IMNDEWA upfumba. Aino sang'ano ya iwatambika, ilukolo lwa Aruni, iwasaghulighwe kudusula upfumba. Lawa hanu ahano haenzeluke, mana kumtendela totso Imulungu, kuya ng'utsotogholighwa keli baye na IMNDEWA Imulungu."

19 Uzia tsakema habehi na imatsabahu aku kakinda chetetso cha ukudusulila upfumba mmoko mwake. Kawonela maya iwatambika, na baho hayawonele maya, ukoma umlawila mchihanga mwake hambele ha iwatambika awo, mna ing'anda ya IMNDEWA habehi na imatsabahu ya ukudusulila upfumba. 20 Mtambika mkulu Azaria na awala iwatambika wangi, hawamlolile, wona kana ukoma mna uhanga wake, apfo wasumka ukumlapfa kunze. Hata yeye imwenyegho ghendo tsakasumka ukulawa kunze, kwaapfila IMNDEWA kamtowa. 21 Apfo mfalume Uzia kakala na ukoma wake mbaka hayafile. Tsakakala yali yeka mna ing'anda yake, kaghomighwa yaleke ukwingila mna ing'anda ya IMNDEWA. Naye Yotamu, imwanaghe kemilila ing'anda ya mfalume na kawatawala iwanu wali muisi. 22 Ghose ghayatendile mfalume Uzia tangiya hayanzile ufalume mbaka hayamalitse, kaghandika nabii Isaya, mwana wa Amozi. 23 Kuya Uzia kafa, katsikighwa habehi na hanu hawotsikighwa wafalume, kwaapfila tsawalonga, "Yeye kana ukoma." Naye Yotamu, imwanaghe katawala hanu hake.