1 Rehoboamu hayapfikile Yerusalemu, kawakema hamwe maasikali laki imwe na elufu semanini kulawa mna likabila lya Yuda na lya Benjamini, iwadahile ukwitowa pfinoghile, waketowe na wanu wa Isiraeli, ili woyitse keli ufalume kwa Rehoboamu mwanaghe Selemani. 2 Lekeni imbuli ya IMNDEWA imtsila Shemeya munu wa Imulungu, ilonga, 3 "Mlongele apfino Rehoboamu mwana Selemani mfalume wa Yuda na iwanu wose wa Isiraeli iwokala mna isi ya Yuda na Benjamini, 4 nene IMNDEWA nolonga, ‘Mleke kughenda kwitowa na ndughu tsenu, kwaapfila chinu achino chilawa kuna nene.’" Kuya wategheletsa mbuli ya IMNDEWA, woya mmakaye, ng'awaghendile baye kwitowa na Yeroboamu.

5 Rehoboamu kakala Yerusalemu na katsenga ubanda kutsunguluka imiji ikalile mna isi ya Yuda. 6 Kaitsengela imiji ya Betilehemu, Etamu, Tekoa, 7 Beti Suri, Soko na Adulamu, 8 na Gati, Maresha, Zifu, 9 na Adoraimu, Lakishi, Aseka, 10 na Sora, Ayaloni na ghumji ghwa Hebroni. Aino iyo imiji itsungulutsighwe ubanda mna isi ya Yuda na Benjamini. 11 Kaitenda imiji ayo itsilungulitsighwe ubanda, kuya keka wakulu wa Maasikali mna chila umji, aku katsenga tsikano tsa ukwikila ipfijo, ghamafuta gha mitseituni, na tsa dipfai. 12 Pfipfila keka tsingao na imigoha mna imiji yose, na kuitenda imiji ayo iwe na ngupfu ghendo. Apfo iwanu wa Yuda na Benjamini walongotsighwa naye.

13 Watambika na Walawi wose kulawa kuna ghmakabila gha kasikazini ya Isiraeli yose, tsawawa chinu chimwe na Rehoboamu. 14 Walawi tsawaleka mighunda yawo ya ukudimila na mighunda yawo ingi, waghenda Yuda na Yerusalemu kwaapfila Yeroboamu na iwanaghe tsawawaghoma wawo waleke kusang'ana ing'onde ya ukumtambikila IMNDEWA. 15 Yeroboamu tsakawasaghula watambika wake imwenyegho wasang'ane mna tsimatsabahu tsitsengighwe hanu henulighwe wakapfitambikile ipfinyagho ipfighala na wamene na iwana wa ng'ombe. 16 Wanu wose wana imimoyo ibama kumtambikila IMNDEWA, Imulungu wa Isiraeli, kulawa makabila ghose gha kasikasini ya Isiraeli, waghenda na Walawi mbaka Yerusalemu wakamlapfile nambiko IMNDEWA, Imulungu wa iwahenga tsawo. 17 Apfo wautenda ufalume wa Yuda uwe na ngupfu, na kwa miyaka midatu tsawautoghola utawala wa Rehoboamu mwanaghe Selemani, nawo tsawima ghendo, kuya tsawakala ka pfawakalile mna ghamatsuwa gha mfalume Daudi na ghamatsuwa gha mfalume Selemani.

18 Rehoboamu tsakakwela pinga iyakemighwe Mahalati, neghe Yeremoti, ayu Yeremoti tsa mwana wa Daudi. Mai wake tsakakemighwa neghe Eliabu, mwana wa Yese. 19 Naye Mahalati tsakamwelekela wana wadatu. Yeushi, Shemaria na Zahamu. 20 Hambele Rehoboamu kamkwela Maaka, neghe Absalomu, naye kamwelekela iwana wamale wane, Abiya, Atai, Ziza na Shelomiti. 21 Rehoboamu tsakakwela wehe kumi na nane na mapinga wa kunze sitini, tsakana wana wamale ishilini na nane na wana mapinga sitini. Mna wehe wake wose awo na mapinga wake wa kunze, tsakamkunda sideke Maaka neghe Absalomu. 22 Rehoboamu tsakamsaghula Abiya, mwana wa Maaka, yawe chilongotsi wa ndughu tsake, kwaapfila tsakabama ukumtenda yawe mfalume. 23 Rehoboamu katenda kwa ukukengela ahala hayawapwilise iwanaghe wangi mna isi yose ya Yuda na Benjamini, kaweka mna imiji yose itsungulusighwe ubanda. Kawa mluso kuna wawo, pfipfila kawakwelela mapinga wengi.