1 Kuya Rehoboamu kaghenda Shekemu kwawetingane Waisiraeli wose wamtende yeye yawe mfalume. 2 Naye Yeroboamu mwana wa Nebati hayahulike ichinu acho tsayang'ali yokala Misiri kwayatsumile kumpfuka Selemani. Apfo koya kulawa Misiri. 3 Lekeni Waisiraeli watuma nume, wamkema yatse kuna wawo. Kuya yeye na Waisiraeli wose wamghendela Rehoboamu wamlongela, 4 "Aba wako katutwika mtsigho mtito, lelo utuhungutsile ghumtsigho aghwo, na twetwe tutsokutumikila."

5 Rehoboamu kawedika, "Tanu ghendani, kuya haipfika ikacha mtse keli." Apfo iwanu awo woka. 6 Kuya mfalume Rehoboamu kabama yawahulikitse iwanzehe iwang'ali womshauli Selemani aba wake, wolongatse mna imbuli ayo. Kawaghutsa, "Apfi mlongatse, niwedike choni iwanu awano?"

7 Iwanzehe awo wamwidika, "Ung'awa mluso kwa iwanu awano na kuwanoghelesa, na ung'alonga nawo pfinoghile, watsakuwa watumighwa wako ghamatsuwa ghose."

8 Lekeni Rehoboamu kalema chawamlongele iwanzehe, kaghenda kuwaghutsa iwasongolo wayaghe iwakulile naye na iwomsang'anila, 9 kawaghutsa, "Angu mwemwe mlongatse ili tuwedike iwanu awano iwanongele, ‘Tuhungutsile mtsigho ghwayatutwikile aba wako?’ " 10 Iwasongolo awala iwakulile hamwe naye wamwidika, "Walongele iwanu awo iwalongile, ‘Aba wako katutwika mtsigho mtsito, utuhungutsile ghumtsigho aghwo’, naghwe walongele apfino, ‘Ichidole changu chidoghodogho chinene kubita ichuno cha aba wangu. 11 Aba wangu kawatwika mwemwe mtsigho mtsito, lekeni nene nitsakongetsa ghuwe mtsito ng'ani. Aba wangu kawafapulani kwa mbalati, lekeni nene nitsowafapulani kwa mijeleledi ya mihonga.’ " 12 Mna litsuwa lya kadatu Yeroboamu hamwe na iwanu wake wose woya kwa Rehoboamu ka pfayawalaghitse. 13 Naye mfalume Rehoboamu kaghabetsa ghawamlongele iwanzehe, kawedika kwa kuwakembela iwanu awo, 14 kulingana na achila chawamlongele iwasongolo hawalongile, "Aba wangu kawatwika mtsigho mtsito, nene nitsoghutenda ghuwe mtsito ng'ani. Aba wangu kawafapula kwa mbalati, lekeni nene nitsowafapula kwa mijeledi ina imihonga." 15 Apfo mfalume ng'awategheletse baye iwanu awo, kwaapfila ichinu acho tsachighalighwa na IMNDEWA ili yaitimitse imbuli yake iyamlongele Yeroboamu, mwana wa Nebati kubitila Ahiya imunu wa ghumji ghwa Shilo. 16 Waisiraeli wose hawonile mfalume kalema kuwategheletsa, wamwidika apfino: "Tuna choni kwa mfalume Daudi, na tuna chochose cha ukupata kwa mwana wa Yese? Lelo mke kuna ghamahema ghenu, mwemwe Waisiraeli, ilolese ing'anda yako ghumwenyegho, ghwe Daudi." Apfo Waisiraeli woka kuna ghamahema ghawo. 17 Lekeni Waisiraeli iwang'ali wokala mna imiji ya Yuda, Rehoboamu yang'ali yowatawala. 18 Kuya mfalume Rehoboamu kamtuma Hadoramu iyakalile mkulu wa tsisang'ano tsa ukunanahitsighwa, lekeni Waisiraeli wamtowa kwa mabwe, wamkoma. Baho mfalume Rehoboamu kadina ghumtuka ghwake katsumila Yerusalemu. 19 Apfo iwanu wa ghamakabila gha kaskazini Isiraeli walema ukutawalighwa na ilukolo lwa Daudi mbaka leloli.