1 Ahazi tsakana miyaka ishilini hayawile mfalume, katawala kwa miyaka kumi na sita aku kokala Yerusalemu. Yeye ng'atendile baye ka sekulu wake Daudi lekeni katenda ighehile hambele ha IMNDEWA. 2 Kakala ka pfawakalile wafalume wa Isiraeli, kuya kafina pfinyagho pfa Mabaali. 3 Kadusula upfumba hana ulwanda lwa Hinomu na kuwalapfa iwanaghe wawe nambiko ya kulakatsighwa, katenda pfinu pfa ukudesa pfawatendile iwanu wa tsiisi tsingi, awala IMNDEWA iyawawingile hambele ha Waisiraeli. 4 Kalapfa nambiko na kudusula upfumba kuna tsimatsabahu tsili hanu henulighwe, kupfidunda, na hasi ha chila mbiki ghutimile.

5 Apfo IMNDEWA, Imulungu wake, kamleka yaghoghighwe na mfalume wa Siria. Washamu wamtowa na wawaghogha iwanu wake, woya nawo Dameski. Pfipfila mfalume wa Isiraeli naye katsa kamghogha na kawakoma iwanu wake wengi sideke. 6 Peka mwana wa Remalia, kwa tsuwa limwe kawakoma wanu wa Yuda laki imwe na elufu ishilini, kwaapfila Wayuda tsawamleka IMNDEWA, Imulungu wa iwahenga wawo. 7 Asikali yumwe wa Efuraimu iyakemighwe Zikiri kamkoma Maaseya, mwana wa mfalume, na Azirikamu, mkulu wa ing'anda ya mfalume, na Elikana, munu wakeli kwa ukulu kulawa mfalume. 8 Waisiraeli wawaghogha Wayuda laki mbili iwali ndughu tsawo ghendo, awo tsamapinga, na iwana wamale na mapinga. Pfipfila waboka mali tsawo nyingi na woya natso Samaria.

9 Lekeni tsakuna munu yumwe taghwa lyake Obedi, nabii wa IMNDEWA, iyang'ali yokala Samaria, kalawa kaghenda kuwabokela Waisiraeli iwang'ali wakuya kulawa Samaria, kawalongela, "IMNDEWA, Imulungu wa iwahenga wenu tsakawaghudubukila iwanu wa Yuda, kawaleka waghoghighwe na mwemwe, lekeni mwemwe muwakoma pfihile mbaka imaya yenu ipfika kulanga. 10 Namwe mwobama kuwatenda iwamale na iwapinga wa Yuda na wa Yerusalemu wawe watumwa wenu. Lekeni mwemwe muwenyegho pfihi, ng'ammanyile baye ka mwomtendela nzambi IMNDEWA, Imulungu wenu? 11 Lelo mnitegheletse, muwoyitse ndughu tsenu na lumbu tsenu wamuwaghoghile, kwaapfila imaya ng'ulu ya IMNDEWA itsowatsila mchanya mwenu." 12 Nawo pfilongotsi wangi wa Efuraimu, tsina Azaria, mwanaghe Yehohanani, Berekia mwanaghe Meshilemoti, Yehizikia mwanaghe Shalumu na Amasa mwanaghe Hadilai pfipfila wawalonga awala iwalawile kwitowa. 13 Wawalongela apfino, "Iwanu wamuwaghoghile mleke kuwaghala ahano. Ma tutotsa hambele ha IMNDEWA, lelo mwobama mtwongetsele tsinzambi na ghamatotso? Kwaapfila ghamatotso ghatuli nagho ma makulu, na maya ng'ulu itutsila twetwe Waisiraeli." 14 Apfo maasikali awo wawaleka iwanu awo iwawaghoghile na ipfinu pfawabokile hambele ha wapfilongotsi na hambele ha ghumtingano ghwose ghwa iwanu. 15 Iwanu awala iwakemighwe kwa mataghwa ghawo wawasola iwanu awo iwaghoghighwe, wawapfatsa awala iwali chidako ghamagwanda aghala ghawabokile, kuya waweng'a mikwabatsa, ipfijo na ipfinu pfa ukunwa, na wawabaka ghamapfuta mna ipfilonda. Awala iwatsilike, wawadinitsa mchanya mwa ipfihongwe, wawaghala iwanu wose iwawaghoghile mbaka Yeriko, ghumji ghwa mitende kwa ndughu tsawo, kuya wawo woya Samaria.

16 Matsuwa agho mfalume Ahazi katuma wanu wakamlombe mfalume wa Ashuru yamwapfile, 17 kwaapfila Waedomu tsawatsa keli, wawatowa wanu wa Yuda, wawaghogha na kuka nawo. 18 Kuya matsuwa ghagho Wafilisti watsa kuitowa imiji ya Shefala na Negebu ya Yuda. Waisola imiji ya Beti Shemeshi, Ayaloni, Gedeloti, Soko, Timna, Gimzo, hamwe na ipfijiji pfawo. 19 Ahazi mfalume wa Isiraeli kamtenda IMNDEWA yaihulumse hasi isi ya Yuda, kwaapfila yeye tsakongetsa ighehile mna isi ya Yuda, na tsakatotsa sideke hambele ha IMNDEWA. 20 Tigilati Pileseri mfalume wa Ashuru tsakatsa kumdununza, na si ukumwapfila baye. 21 Ahazi kasola inzahabu kulawa mna ing'anda ya Imulungu, na mna ing'anda ya mfalume na kulawa mna tsing'anda tsa pfilongotsi, kamwing'a mfalume wa Ashuru, lekeni ukutenda apfo ng'akumwapfile chinu baye.

22 Mna ghamatsuwa ghake gha ukudununzika, mfalume Ahazi tsakaghendelela ng'ani kumtendela nzambi IMNDEWA. 23 Kwaapfila tsakailapfila nambiko milungu ya Dameski imtowile, tsakalonga, "Kwaapfila milungu ya Shamu tsaiwapfila wafalume wa Shamu, na nene ning'ailapfila nambiko songaha itsonyapfila." Lekeni aghano ghamtenda Ahazi na iwanu wa isi ngima ya Isiraeli wakomighwe. 24 Pfipfila tsakapfisola pfinu pfose ipfili mna ing'anda ya Imulungu, kapfitula tula. Kuya kaihinda imilango ing'anda ye Imulungu, kuya ketsengela tsimatsabahu mna chila membe ya Yerusalemu. 25 Mna chila mji ako Yuda katsenga matsabahu tsa hanu henulighwe hawe ha ukudusulila upfumba kwa milungu ingi. Chinu acho chimtenda IMNDEWA, Imulungu wa wahenga wake yamwonele maya. 26 Ghose ghayatendile kulawa hayanzile ufalume mbaka hayamalitse ghandikighwa mna chitabu cha kumbukumbu cha Wafalume wa Yuda na Isiraeli. 27 Kuya mfalume Ahazi kafa, katsikighwa kuna ghumji ghwa Yerusalemu, lekeni ng'atsikighwe baye kuna ghamakabuli gha wafalume wa Isiraeli. Naye Hezekia, imwanaghe, kawa mfalume, kasola hanu hake.