1 Kuya Selemani kalonga, "IMNDEWA tsakalonga katsokala mna ichisi chitito. 2 Lekeni nene nikutsengela ing'anda inoghile, hanu hako ha ukukala ghamatsuwa ghose."

3 Aku iwanu wose wa Isiraeli wang'ali wema baho, mfalume Selemani kawahundukila kamlomba Imulungu yawabaliki. 4 Kuya kalonga, "Yatunyighwe IMNDEWA, Imulungu wa Isiraeli, kwaapfila kwa ingupfu yake katenda achila chayamlongele aba wangu Daudi. 5 Tsakalonga, ‘Kulawa ghamatsuwa aghala haniwalapfile iwanu wangu mna isi ya Misiri, sighusaghule baye mji ghwoghwose mna ghamakabila gha iwanu wa Isiraeli itsengighwe ing'anda yakunitambikila nene, na wala simsaghule munu wowose baye yawe mfalume wa iwanu wangu Isiraeli. 6 Lekeni sambi nighusaghula ghumji ghwa Yerusalemu hawe hanu ha ukunitambikila nene, na nimsaghula Daudi yawe mfalume wa iwanu wangu Isiraeli.’

7 "Apfo aba wangu Daudi tsakabama yatsenge ing'anda yakumtambikila IMNDEWA, Imulungu wa Isiraeli. 8 Lekeni IMNDEWA tsakamlongela aba wangu Daudi, ‘Kwaapfila ichinu cha ukunitsengela nene ing'anda tsa cha mmoyo mwako, pfinogha kwa kubama ukutenda apfo. 9 Lekeni si ghweghwe baye yutsoitsenga, iyatsoitsenga ing'anda ayo imwanagho, imwana yutsomweleka ghumwenyegho.’ "

10 "Lelo sambi IMNDEWA Imulungu katenda achila chayalongile, kwaapfila nene niwa mfalume hanu ha aba wangu Daudi, na nichikalila ichighoda cha ufalume cha Isiraeli ka IMNDEWA pfayalongile, kuya nitsenga ing'anda ya ukumtambikila IMNDEWA, Imulungu wa Isiraeli. 11 Mng'anda amwo nika lisanduku lya laghano lya IMNDEWA lyayekile na iwanu wa isiraeli."

12 Kuya Selemani kema hambele ha imatsabahu ya IMNDEWA na hambele ha iwanu wose wa Isiraeli, kenula ghamako kuchanyana. 13 Selemani katsenga jukwaa lya shaba, utali wake na ughatsi wake tsa futi saba na nusu, na chimo chake futi nne na nusu. Kalika haghati ha ichibwalu. Kadina mchanya, katowa maghoti hambele ha iwanu wose wa Isiraeli, kenula ghamoko kulanga, 14 kalonga, Ghwe IMNDEWA, Imulungu wa Isiraeli, kuduhu Imulungu yungi iyali ka ghweghwe, kulanga au muisi, Ghweghwe kwa Imulungu wa ukutogholighwa, kwaapfila kutenda laghano lyako lya ukuwakunda iwanu wako wose iwokala aku wokutegheletsa kwa ghumoyo ghwawo ghwose. 15 Kutenda achila chaumlongele aba wangu Daudi, kwa mlomo ghwako tsakulonga, na leloli kughatenda kwa uwetso wako. 16 Lelo ghwe IMNDEWA, Imulungu wa Isiraeli, nokulomba pfipfila ughatende aghala ghaumlongele mtumwa wako aba wangu Daudi, ahala haulongile, ng'utsokala baye aku kwahela mtsukulu yumwe iyatsokalila ichighoda cha ufalume cha Isiraeli, ka iwatsukulu wako watsakwalangitsa mna chila chawotenda, ka ghweghwe pfautendile. 17 Lelo ghwe IMNDEWA, Imulungu wa Isiraeli, nokulomba ghendo ughatende ghose ghumlongele mtumwa wako Daudi.

18 Lekeni ghwe Imulungu, apfi ghendo ghweghwe kutsokala na iwanu amu muisi? Hata kulanga kwenyegho, wala kulang'a kuchanya ng'ani ng'akukwenela baye, angu ing'anda aino yaniitsengile itsokwenelatse? 19 Hata apfo ghwe IMNDEWA Imulungu, Imulungu wangu, nene mtumwa wako nokulomba unitegheletse na ughatende ghose ghanikulomba leloli. 20 Uilolese ing'anda aino chilo na imisi, hanu hausaghule iwanu wako wakutambikile. Kuya unihulike nene mtumwa wako hanikutsa ahano kulomba. 21 Uhulike chanikulomba nene mtumwa wako na chawokulomba wanu wako Waisiraeli hawolomba aku wolola hanu hano. Uhulike aghala ghawolomba kulawa ako kulanga, kuya ung'ahulika uwaleghusile tsinzambi tsawo. 22 Munu yang'amtendela totso miyaghe, naye yang'aghalighwa ili yelahe hambele ha imatsabahu yako mna ing'anda aino, yang'elaha, 23 nokulomba ghweghwe uhulike kulawa ako kulanga, ulamle uwahighe iwatumwa wako. Imunu yana litotso umhighe kwa litotso lyake, imunu iyalihela totso umlekelele na umghweke kwaapfila kahela totso. 24 Iwanu wako Waisiraeli hawotowighwa na maaduwi tsawo kwaajili ya tsinzambi tsawakutendele, nawo wang'atubu kuna ghweghwe na wang'alitoghola litaghwa lyako na wang'alomba uwalekelele tsinzambi tsawo mna ing'anda aino, 25 uhulike kulawa ako kulanga, uwalekelele tsinzambi tsawo, kuya uwoyitse kuna isi yauweng'ile wawo na iwabala tsawo. 26 Imvula ing'aleka kutowa kwaapfila wakutendela nzambi, wang'alomba aku wolola hanu ahano na wang'atoghola litaghwa lyako, kuya wang'atsileka tsinzambi tsawo, nokulomba, 27 uwahulikitse kulawa kulanga, uwaleghusile tsinzambi tsawo watumwa wako, iwanu wako Waisiraeli, akuno kowalangulitsa wawinze inzila inoghile, kuya ukailekele imvula itowe mna isi yako aino yauweng'ile iwanu wako iwe mali yawo. 28 Ka muisi mna nzala. au utamu wa tauni, au ukame, utamu wa mimeya, nzighe, au lung'wawa, au ka iwanu wako watsingilitsighwa na maaduwi tsawo mna ghumji ghwawo ghoghose aghula; ka hana janga lyolyose, au utamu wowose, 29 chochose ichilombighwa na imunu wowose, au iwanu wako Waisiraeli, chila munu yang'amanya maghayo ghake na usungu wake, yang'akulomba aku kogholosa ghamoko ghake kuna ing'anda aino, 30 uhulike kulawa kuko kulanga, uleghuse tsinzambi, kuya umtendele chila munu ka pfayobamighwa kutendelighwa, mana ghweghwe uliyeka yumanya ichikwalangulighwa na imimoyo ya iwanu wose, 31 ili wakupfuke na watsiwinze nzila tsako ghamatsuwa ghose hawokala mna isi yauweng'ile wabala wetu. 32 Mgheni au imunu ing'ayolawila mghati mwa iwanu wako Waisiraeli hayatsokutsa kulomba mna ing'anda aino kulawa isi ya kutali kwaajili ya taghwa lyako kulu, na kwaajili ya ngupfu tsako na uwetso wako, 33 nokulomba umuhulike kulawa ako kulanga umwing'e imgheni ayo chochose chayokulomba ili iwanu wose muisi mwose walimanye litaghwa lyako na wakuhulikitse ka pfawotenda iwanu wako Waisiraeli. Kuya wamanye ka ing'anda aino yaniitsengile yomanyika kwa litaghwa lyako. 34 Wanu wako wang'aghenda kung'ondo kwitowa na maaduwi tsawo, kokose akula kwautsowaghala, nawo wang'akulomba aku wolola ghumji aghuno ghuusaghule, na ing'anda yaniitsengile kwaajili ya litaghwa lyako, 35 nokulomba ako kulanga kwauli ughahulike aghala ghawokulomba, kuya uwatende wahume mna ing'ondo. 36 "Wang'akutendela nzambi, mana kuduhu munu yang'ayotenda nzambi, kuya ung'awonela maya na kuwaleka watowighwe na maaduwi tsawo mbaka waghoghighwe na waghalighwe mna isi ya kutali au ya habehi; 37 hawatsakuwa ako kutali, wang'akuyila kwa ghumoyo ghwawo ghose na kutubu na kukulomba uwaleghusile nzambi tsawo, wang'alonga, ‘Tukutendela nzambi, twetwe twagha ghendo, tutenda ighehile;’ 38 pfipfila wang'akuyila kwa ghumoyo ghwao ghose na muhe wao ghose hawatsakuwa isi ya kutali, kuya wang'alomba aku wolola akuno muisi yawo, isi yuweng'ile iwabala wawo, ghumji aghuno ghwaughusaghule, na ing'anda yaniitsengile kwaajili ya litaghwa lyako; 39 nokulomba ghendo ako kulanga kwauli uhulike aghala ghawolomba, uwaleghusile tsinzambi iwanu wako iwakutendile nzambi. 40 Lelo ghwe Imulungu wangu, utulole ughabokele aghala ghatutsolomba hanu ahano.

41 Lelo winuke ghwe IMNDEWA,

wingile hanu hako ha ukubwihila,

ghweghwe na lisanduku lya laghano lya ngupfu tsako.

Uweng'e ukombotsi iwatambika wako ghwe IMNDEWA,

wanu wako wadeng'elele ighanoghile. 42 Ghwe IMNDEWA uleke kumleka Mbakighwa mapfuta wako.

Ukumbuke pfaumkundile mtumwa wako Daudi."