1 Kuya Abiya tsakafa, katsikighwa mna ghumji ghwa Daudi, kuya Asa, imwanaghe kawa mfalume hanu hake. Mna ghamatsuwa gha ufalume wa Asa, isi tsakali yahela ing'ondo kwa miyaka kumi. 2 Asa tsakatenda ighanoghile na ighomnoghelesa IMNDEWA, Imulungu wake. 3 Katsihinya tsimatsabahu tsa chigheni, kabomola hanu henulighwe ha ukutambikila milungu ingi, kaghatula ghamabwe gha kutambikila na kapfigana ipfinyagho pfa Ashera. 4 Kawalaghitsa iwanu wa Yuda wambameghe IMNDEWA, Imulungu wa iwahenga wawo, na kughakinda ghamalaghitso ghake na imiko yake. 5 Pfipfila kabomola hanu henulighwe ha ukutambikila na tsimetsa tsa ukudusulila upfumba mna imiji yose ya Yuda. Kuya tsakakala tseghamba mna ghamatsuwa gha ufalume wake. 6 Katsenga imiji itsingulutsighwe ubanda mna imiji yose ya Yuda mna ghamatsuwa agho ghayakalile tseghamba. Tsakuduhu munu iyetowile naye mna imiyaka ayo, kwaapfila IMNDEWA tsakamleka yabwihile. 7 Kawalongela wanu wa Yuda, "Leka tuitsenge imiji aino, kuya tuitsungulusile ubanda na mumo tutsenge iminala, na twike ghamalango ghana tsimalamingo. Isi ing'ali yetu kwaapfila tughatenda aghala ghayobama IMNDEWA, Imulungu wetu, na sambi twokala kwa kubwihila." Apfo watsenga, na hambele wabweda. 8 Asa tsakana maasaikali laki ndatu kulawa mna likabila lya Yuda wana tsingao na imighowa, na maasikali laki mbili na samanini kulawa mna likabila lya Benjamini wana tsingao na tsiminde. Wose awo tsa maasikali iwadahile ukwitowa ghoya. 9 Zera, Mwesiopia tsakaitowa isi ya Yuda aku kelongotsa na maasikali laki imwe na mituka miya ndatu, tsawaghenda mbaka Maresha. 10 Asa kalawa kaghenda kwitowa naye. Wose weli na maasikali wawo wema mna misululu yawo kwa ukwitowa mna ulwanda lwa Sefata habehi na Maresha. 11 Baho Asa kamlilila IMNDEWA, Imulungu wake, kalonga, "Ghwe IMNDEWA, kuduhu yungi ka ghweghwe iyodaha kuwapfila iwalihela ngupfu, wetowe na iwana ingupfu. Utwapfile ghwe IMNDEWA, Imulungu wetu, mana twokuhuwila ghweghwe, na kwa taghwa lyako tutsa kwitowa na iwanu awano iwali wengi. Twapfile ghwe IMNDEWA, ghweghwe kwa Imulungu wetu, uleke kumleka imunu yakuhume." 12 IMNDEWA kawatowa Waesiopia hambele ha Asa na hambele ha iwanu wa Yuda. Na Waesiopia watsuma. 13 Asa na iwanu wake wawawinzilitsa mbaka Gerari, wawakoma Waesiopia wengi ng'ani, kuduhu hata yumwe iyadahile kwima keli yetowe, tsawatowighwa na IMNDEWA imwenyegho na iwanu wake. Iwanu wa Yuda tsawawaboka pfinu bwelele. 14 Wapfihinya pfijiji pfose pfili mmbalimbali mwa Gerari, kwaapfila iwanu iwakalile mna imiji ayo tsawampfuka IMNDEWA Imulungu. Maasikali wasola pfinu pfingi pfinoghile kulawa mna imiji ayo. 15 Maasikali wawatowa iwadimi, wasola wang'olo wengi na ngamia. Kuya woya Yerusalemu.