1 Kuya Yehoshafati kafa, katsikighwa hanu hawatsikighwe iwahenga wake kuna ghumji ghwa Daudi naye Yehoramu, imwanaghe katawala hanu hake.

2 Yehoramu tsakana wadodo tsake sita, iwanaghe Yehoshafati, Azaria, Yehieli, Zekaria, Azariahu, Mikaeli na Shefatia. 3 Aba wawo tsakaweng'a nzawadi bwelele tsa fetsa, na tsa nzahabu, na tsa pfinu pfingi pfa bei ng'ulu, tsakaweng'a na imiji ya Yuda itsungulusighwe ubanda. Lekeni kamwing'a ufalume Yehoramu kwaapfila yeye tsa mwanaghe chaudele. 4 Yehoramu hayakalile mna ichighoda chake cha ufalume na ufalume wake hawimile, kawakoma ndughu tsake wose, pfipfila kawakoma iwakulu wangi wa Isiraeli. 5 Yehoramu tsakana miyaka salasini na mili hayawile mfalume, naye kaitawala Yuda kwa miyaka minane aku kokala Yerusalemu. 6 Kwaapfila tsakamkwela neghe Ahabu, kawinza nzila tsihile tsa iwanu wa ilukolo lwa Ahabu na wafalume wangi wa Isiraeli. Katenda ghehile hambele ha IMNDEWA. 7 Lekeni IMNDEWA ng'abamile baye kulukoma ilukolo lwa Daudi kwa lilaghano lyayekile na Daudi ka ghamatsuwa ghose kutsakuwa na munu kulawa mna ilukolo lwa Daudi iyatsotawala. 8 Mna ghamatsuwa gha Yehoramu iwanu wa Edomu walema kutawalighwa na mfalume wa isi ya Yuda, wamwika mfalume wawo wenyegho. 9 Apfo Yehoramu na ipfilongotsi wa maasikali na mituka yake yose ya ukukweghighwa waghenda Edomu. Kuko maasikali wa Waedomu wawapfingilila yeye na maasikali wake, lekeni nechilo katsuma. 10 Apfo isi ya Edomu ilema kutawalighwa na isi ya Yuda mbaka leloli. Matsuwa ghagho pfipfila iwanu wa Libina nawo walema kutawalighwa naye kwaapfila Yehoramu tsakamleka IMNDEWA, Imulungu wa iwahenga wake. 11 Kuya katengenetsa tsimatsabahu tsa hanu henulighwe ha ukutambikila milungu ingi mna ipfidunda pfa Yuda na kawahonza iwanu wa Yerusalemu waitambikile milungu ingi na kawaghitsa iwanu wa Yuda. 12 Nabii Eliya kamghalila mfalume Yehoramu baluwa ilonga apfino, "IMNDEWA, Imulungu wa mhenga wako Daudi, kolonga apfino, ‘Ghweghwe ng'utendile baye ka pfayatendile aba wako Yehoshafati, au sekulu wako Asa, mfalume wa Yuda, 13 ila kutenda ka pfawatendile wafalume wa Isiraeli. Kuya kuwalongotsa iwanu wa Yuda na Yerusalemu waitambikile milungi ingi ka pfawatendile wanu wa lukolo lwa Ahabu. Kuya kuwakoma ndughu tsako ghumwenyegho, iwanu wa ng'anda ya aba wako, iwanu iwanoghile kubita ghweghwe. 14 Lelo IMNDEWA katsowatowa iwanu wako, na iwanagho, na wehe tsako, na kutsihinya mali tsako tsose. 15 Ghweghwe ghumwenyegho kutsoghula utamu wihile wa munda chila hakukucha, mbaka utamu awo utende usapi wako ulawe kunze.’ "

16 Imulungu kawatenda Wafilisti na Waarabu iwakalile habehi na Waesiopia wamwonele maya Yehoramu na wetowe naye. 17 Apfo waipfamila isi ya Yuda, wasola mali tsose itsikalile mna ing'anda ya mfalume, kuya wawaghogha iwanaghe wose na wehe tsake, ila Ahasia mwanaghe mdodo ng'asolighwe baye. 18 Kuya Imulungu kamghalila mfalume utamu wa munda ing'auhoneka baye. 19 Kaghendelela kughula, na utamu wake wongetseka chila hakukucha, na ghumwaka ghwa kabili haghung'ali ghomala usapi wake ulawa kunze kwa utamu wake awo iyali nawo, kuya kafa kwa usungu mkulu. Iwanu wake ng'awabwinile baye ghumoto wadomboketse ka pfawatendile kwa iwahenga wake. 20 Yehoramu tsakandusa kutawala aku kana miyaka salasini na mili na katawala aku kakala Yerusalemu kwa miaka minane. Hayafile kuduhu imunu wowose iyonile usungu. Kuya wamtsika mna ghumji ghwa Daudi, ila si hanu hawotsikighwa wafalume baye.