1 Hambele, Wamoabu na Waamoni na Wameuni wamwenga watsa kwitowa na Yuda. 2 Iwanu wamghendela Yehoshafati, wamlongela, "Maasikali wengi iwolawa Edomu, kumwambu mwa ibahali ya Shamu watsa wetowe na ghweghwe. Sambi wapfika Hazazoni Tamari." Kuya hanu aho litaghwa lyake lingi Eni Gedi. 3 Yehoshafati tsakapfuka, kamlomba IMNDEWA yamlongotse. Tsakawalongela iwanu wose wa Yuda waleke ukuja. 4 Iwanu wa Yuda tsawetingana hamwe wamlombe IMNDEWA yawapfile, watsa ghendo kulawa mna chila ghumji wambame IMNDEWA. 5 Yehoshafati kema mna ghumtingano ghwa iwanu wa Yerusalemu na wa Yuda, hambele ha iluwa lwa sambi lwa ing'anda ya IMNDEWA, 6 kalomba kwa litsi kulu, kalonga, "Ghwe IMNDEWA, Imulungu wa iwahenga wetu, angu ghweghwe si Imulungu baye iyokala kulanga? Ghweghwe kwa mfalume wa tsifalume tsose tsili muisi; tsingupfu na uwetso pfammoko mwako, na kuduhu munu iyodaha kwima yetowe naghwe. 7 Ghweghwe Imulungu wetu yuwawingile iwanu iwakalile mna isi aino hambele ha iwanu wako Isiraeli na kuweng'a iwana wa sale yako Abrahamu iwe isi yawo ghamatsuwa ghose. 8 Nawo wakala amwo, na wakutsengela ing'anda yako kwa ukulitambikila litaghwa lyako, aku wolonga, 9 ‘Maghayo ghang'atutsila, ghawe gha ing'ondo, au gha utamu, au gha nzala, tutsakutsa twime hambele hako hana ing'anda yako aino itsengighwe tukutambikile, tutsokulilila apfila pfatughaya, naghwe kutsotuhulika na kutukombola.’ 10 Lelo iwanu wa Amoni na Moabu na wa ichidunda cha Seili, iwanu awala yuwaghomile wahenga wetu waleke kutsitowa isi tsawo hawalawile Misiri, apfo wahenga wetu tsawabita kutali waleka kuwakoma, 11 ulole lelo apfila pfawotuliha! Wakutsa kutulapfa mna isi yako yautwing'ile iwe yetu. 12 Ghweghwe kwa Imulungu wetu! Angu ng'utsowahigha baye? Kwaapfila twetwe twahela ngupfu ya kwitowa na maasikali wengi awano iwotutsila. Ng'atumanyile baye choni cha ukutenda, lekeni tsinenge tsetu tsokulola ghweghwe utwapfile." 13 Iwamale wose wa Yuda na wehe wawo na iwana wawo tsawang'ali wema baho hambele ha IMNDEWA. 14 Baho muhe wa Imulungu kamtsila Mlawi yumwe iyakalile baho, taghwa lyake Yahazieli mwana wa Zakaria, mwana wa Benaya, mwana wa Yeieli, mwana wa Matania, wa lukolo lwa Asafu. 15 Yahazieli kalonga, "Nitegheletse mfalume Yehoshafati, na iwanu wose wa Yuda, na iwanu wose wa Yerusalemu! Imulungu komlongeleni apfino; ‘Mleke kupfuka wala kutenyuka ghumoyo kwaapfila pfawali na maasikali wengi. Ing'ondo aino si yenu baye, ila yakwake yeye Imulungu. 16 Ilupfi mhulumke mghende mkawatowe ahala hawatsogheluka kubitila hana ing'alo ya Zizi. Mtsetingana nawo akula kwachitsighila ichiwala habehi na inyika ya Yerueli. 17 Ng'ambamighwa baye kwitowa mna ing'ondo aino. Mwemwe mwime hela, kuya mbete, na mtsakona apfila IMNDEWA pfayatsowakombola. Mwemwe muwanu wa Yuda na muwanu wa Yerusalemu, mleke kupfuka wala kutenyuka ghumoyo. Ghendani mketowe nawo ilupfi, naye IMNDEWA katsakuwa hamwe namwe!’" 18 Baho mfalume Yehoshafati kawinamitsa uhanga wake mbaka hasi, na iwanu wose wa Yuda na wa Yerusalemu wenamitsa ipfihanga pfawo hasi wamtamanila IMNDEWA. 19 Nawo Walawi wa lukolo lwa Kohathi na Kora wema na kumwimbila IMNDEWA, Imulungu wa Isiraeli kwa kulapfa litsi kulu ng'ani. 20 Ilupfi yake walamka lupfipfili, waghenda mbaka hana inyika ya Tekoa. Hawanzile ghumwanza, Yehoshafati kema kawalongela, "Mniteghelese mwemwe muwanu wa Yuda na muwanu wa Yerusalemu! Mumtoghole IMNDEWA, Imulungu wenu, namwe mtsakwima ghendo. Muwatoghole manabii wake, namwe mtsobweda!" 21 Yehoshafati hayamalitse ukulonga na iwanu, kawasaghula iwanu walongole hambele ha waasikali wamwimbile IMNDEWA na wamtunye yeye kwaapfila pfayenzeluke na pfayanoghile. Tsawemba apfino,

"Mumlongele Imulungu mighede,

kwaapfila kotukunda matsuwa ghose."

22 Hawanduse ukwimba na ukumtunya, IMNDEWA kaghala iwaasikali wake wawatowa iwanu wa Amoni na wa Moabu na wa chidunda Seiri iwatsile kwitowa na Yuda tsiweghele, nawo watowighwa. 23 Wanu wa Amoni na wanu wa Moabu wawatowa wanu wa chidunda Seiri, nawo wawakoma ghendo. Hawamalitse ukuwakoma iwanu wa ichidunda cha Seiri wandusa kwikoma wenyegho kwa wenyegho. 24 Iwanu wa Yuda hawapfikile hanu ha ukulolesela kunyika, walola akula kwawakalile maasikali wengi, na wona ng'uli tsa iwanu tsiwasa hasi. Kuduhu munu wowose iyahonile. 25 Apfo Yehoshafati na maasikali wake waghenda kuboka pfinu pfawo, ako wona tsimali, na maghwanda, na pfinu pfingi pfinoghile. Waduta ipfinu apfo kwa matsuwa madatu, lekeni ng'awapfimalitse baye, kwaapfila tsapfingi sideke. 26 Tsuwa lya kane wetingana mna ulwanda lwa Beraka, kuko wamtunya IMNDEWA. Apfi pfipfo pfaili kwa ulwanda alwo kukemighwa lwanda lwa Beraka, mana yake tsibalaka mbaka leloli aino. 27 Iwanu wose wa Yuda na wa Yerusalemu aku wolongotsighwa na Yehoshafati, woya Yerusalemu aku wodeng'elela, kwaapfila IMNDEWA tsakawapfila ukuwatowa maaduwi tsawo. 28 Hawapfikile Yerusalemu, walumbilila mbaka kuna Ing'anda ya IMNDEWA aku wotowa pfinanda na pfing'weng'we na malati. 29 Wafalume wose wa tsiisi wengila wogha hawahulike IMNDEWA pfayawatowile maadui wa Isiraeli. 30 Apfo ufalume wa Yehoshafati ukala tulu ghendo, kwaapfila IMNDEWA kamleka yabwihile mna chila ubali.

31 Yehoshafati tsakana miyaka selasini na tano hayawile mfalume wa Yuda, na katawala aku kokala Yerusalemu kwa miyaka ishilini na tano, na mai wake tsakakemighwa Azuba neghe Shilihi. 32 Katenda ighanoghile ghayatendile Asa aba wake, na ng'aghalekile baye, katenda ighanoghile hambele ha IMNDEWA. 33 Lekeni chila hanu henulighwe ha ukutambikila ng'ahahinyile baye. Iwanu ng'ana wahunduke baye na kumtambikila Imulungu wa iwahenga tsawo kwa mimoyo yawo yose. 34 Ghangi ghayatendile Yehoshafati tangiya hayanzile mbaka ufalume wake haumalile, ghandikighwa mna ichitabu cha kumbukumbu cha Yehu mwana wa Hanani, ighali mna ichitabu cha wafalume wa Isiraeli. 35 Hambele, Yehoshafati mfalume wa Yuda kelaghana na Ahazia mfalume wa Isiraeli, iyatendile ghehile sideke. 36 Wepatana ukutengenetsa naye tsimeli tsa ukughenda Tarishishi, Watsitengenetsela ako Ezioni Geberi. 37 Lekeni Eliezeri mwana wa Dodafahu iyolawila ghumji ghwa Meresha tsakamtabilia Yehoshafati, tsakalonga, "Kwaapfila kwilaghana na Ahazia, IMNDEWA katsotsibena meli tsose tsamwitengenetsele." Kuya meli atso tsibenekabeneka, apfo ng'atsidahile baye kughenda Tarishishi.