1 Mfalume Selemani katengenetsa imatsabahu ya shaba utali wake futi salasini, na ughatsi wake futi salasini na chimo chake futi kumi na tano. 2 Kuya kalubula shaba kafina bigha kulu ghendo ilikemighwe Bahari. Utali wake kughenda hasi libigha alyo tsa futi saba na nusu, na utali wake mwambu na mwambu tsa futi kumi na tano, na mtsunguluko ghwake futi alubaini na tano. 3 Hasi mwa ukingo wa libigha alyo tsawafina pfinyagho pfa ng'ombe wamale iwakalile mna misululo mili, ghumwe tsaghukala hasi na ghungi tsaukala uchanya. Wang'ombe awo tsawafinighwa hamwe na libigha alyo. 4 Libigha alyo likighwa mchanya mwa pfinyagho pfa ng'ombe wamale kumi na weli wa shaba, wadatu walola kasikazini, wadatu walola kusini, wadatu walola mashariki na wadatu walola maghalibi. 5 Unene wake tsa nchi ndatu, na mna ukingo wake libigha lighala na chikombe, ka luwa lya yungiyungi, na ling'ali likwingila lita ka elufu sitini tsa matsi. 6 Pfipfila tsakafina ipfiya pfa ukwopfughila tsinyama tsa tsinambiko tsa ukulakatsighwa. Pfiya pfitano kapfika ubali we kusini na pfingi pfitano kapfika kasikazini ing'anda ya Imulungu mwa. Libigha alila kulu wang'ali wonawila iwatambika. 7 Kuya kafina pfigutso kumi pfa nzahabu pfa ukwikila pfitasa ka pfailaghitsighwe, kapfika mna chikuta chikulu cha ing'anda ya Imulungu, pfitano kapfika ubali wa kuisini na pfitano ubali wa kasikazini mwa ing'anda ya Imulungu. 8 Kuya katengenetsa metsa kumi, natso katsika mna ichikuta cha ing'anda ya Imulungu katsika tano ubali wa kuisini na tano ubali wa kasikazini wa ing'anda ya Imulungu. Kuya katenda ghamabakuli miya gha nzahabu. 9 Katsenga luwa lwa mghati lwa iwatambika na luwa lungi lukulu wa kunze, na imilango ya iluwa iyaighubike ishaba. 10 Libigha alila kulu ilikemighwe bahari kalika hana imembe ili kusini mashariki mwa ing'anda ya Imulungu. 11 Huramu pfipfila kafina pfinongo, makoleo, na mabakuli gha kughidila. Apfi pfipfo pfayamalitse tsing'onde tsotse tsa ing'anda ya Imulungu tsayeng'ighwe na mfalume Selemani yatende, 12 tsingutso atsila mbili, ghamatwi meli ighali ka bakuli mchanya mwa tsingutso, na tsinyapfu mbili tsa ukuhamba ghamatwi agho meli ighali mchanya mwa tsingutso, 13 ipfinu ipfoneke ka ghamatunda gha makomamanga miya nne mna imisululo mili mna chila inyapfu imwe, ikighwe mchanya mwa ghamatwi ighali mchanya mwa tsingutso atso, 14 pfipfila katengenetsa matololi kumi, na pfia pfake kumi, 15 na libigha alila likulu ilikemighwe Bahari, limile mna ipfinyagho pfa ng'ombe wamale kumi na weli, 16 kuya kafina pfinongo, makoleo na mabakuli. Ipfinu pfose apfino ipfili mna ing'anda ya IMNDEWA, Huramu pfayamtengenetsele Selemani, tsa pfa shaba ikuwighwe. 17 Mfalume kalaghitsa ipfinu apfo pfifinighwe mnna ipfombo pfa lidongo lya widi mna ichiwala cha Yoridani, haghati ha Sukoti na Saretani. 18 Selemani ng'apfilingile baye utito wa ipfinu pfose apfino kwaapfila tsa pfingi ng'ani, apfo utito wa ishaba ng'aumanyike baye. 19 Pfipfila Selemani kafina pfinu pfa nzahabu pfiwe pfa ing'anda ya IMNDEWA, kafina matsabahu ya nzahabu, imetsa ya nzahabu ya ukwikila ipfighate ipfilapfighwa kwa Imulungu, 20 pfigutso na pfitasa pfa nzahabu inoghile tsa ukulangatsila hanu ahala Haenzeluka Ng'ani ghendo, ka pfailaghitsighwe, 21 malumbo gh amaluwa, tsitala, na uma, apfo pfose tsa pfa nzahabu inoghile ghendo, 22 pfipfila kafina pfisahani, mikasi, masiniya gha ukudusulila upfumba, pfihali pfa ukuhalila ghumoto, ghumlango ghwa Hanu Haenzeluke Ng'ani, na ghumlango ghwa ichikuta cha ing'anda ya Imulungu. Apfo pfose tsapfinighwa kwa nzahabu inoghile.