1 Manase tsakana miyaka kumi na mili hayawile mfalume wa Yuda, kawa mfalume ako Yerusalemu kwa miyaka hamsini na tano. 2 Katenda ighehile hambele ha IMNDEWA, tsakaigha ipfinu pfa ukudesa pfawatendile iwanu wa isi tsingi iwawingighwe na IMNDEWA hambele ha Waisiraeli. 3 Katsitsenga keli tsimatsabau tsa hanu henulighwe ha ukutambikila milungu ingi ipfimwaghighwe na Hezekia, aba wake, katsenga imatsabahu ya ukumtambika mulungu Baali, na kafina tsingutso tsa Ashera. Manase pfipfila kapfinamila na kupfitambikila ipfinu pfose pfa kulanga. 4 Katsenga matsabahu tsa ukutambikila milungu ingi mna ing'anda ya IMNDEWA, ing'anda iyalongile IMNDEWA, "Mna Yerusalemu kuko iwanu watsolitambikila litaghwa lyangu matsuwa ghose." 5 Mna ipfibwalu pfose pfili pfa ing'anda ya IMNDEWA, katsenga tsimatsabahu tsa ukutambikila ipfinu pfa kulanga. 6 Kawabititsa iwanaghe mna ghumoto wawe nambiko tsa ukulakatsighwa hana lwanda lwa mwana wa Hinomu. Katoa bau, kalaghula, kapfala tsifubalo; kuya kasang'ana na walaghutsi wa mitsimu na iwahawi. Katenda ghehile ghendo hambele ha IMNDEWA, na kumtenda yamwonele maya. 7 Kasola chinyagho chayafinile kachimitsa mna ing'anda, hanu IMNDEWA hayawalongele Daudi na imwanaghe Selemani apfino, "Mna ing'anda aino na mna Yerusalemu, nisaghula kulawa mna ghamakabila ghose gha Isiraeli hawe hanu ha ukunitambikila taghwa lyangu matsuwa ghose. 8 Na ka iwanu wa Isiraeli watsotenda ghose ka pfaniwalaghitse, wang'akinda ghamalaghitso, imiko na malamtsi ghanimwing'ile Musa, sitsowaleka ghendo baye wawingighwe kulawa mna isi aino iyaniweng'ile wahenga wawo." 9 Lekeni Manase kawaghitsa iwanu wa Yuda na iwenyekaye wa Yerusalemu, kawalongotsa mna ukutenda ghehile ghendo kubita iwanu wa isi tsingi, awala IMNDEWA wayawawingile hambele ha iwanu wa Isiraeli.

10 Naye IMNDEWA kamkanya Manase na Iwanu wake, lekeni ng'awamtegheletse baye. 11 Apfo IMNDEWA kawaghalila pfilongotsi wa maasikali wa mfalume wa Ashuru. Pfilongotsi awo tsawamghogha Manase wamtobola imula na induwano, na wamwoha tsipingu tsa shaba, wamghala Babeli. 12 Hayakalile mna ghamaghayo, kamlomba IMNDEWA, Imulungu wake, kehulumsa ghendo hambele ha Imulungu wa iwahenga wake. 13 Kamlomba ghendo, naye IMNDEWA kahulika ghayalombile, kamuyitsa Yerusalemu kuna ufalume wake. Baho Manase katanga ka IMNDEWA yuyo Imulungu. 14 Haghamalile agho, Manase katsenga ubanda ungi ubali wa kunze mwa ghumji ghwa Daudi, ubali wa kwalikuswela litsuwa wa Gihoni, mlwanda, kaughendelesa mbaka Lilango lya Wasomba, nawo utsunguluka mbaka chidunda cha ghamatuta, aho kawinula uchanya ghendo. Hamwe na agho, keka pfilongotsi wa maasikali mna imiji yose ya Yuda ili mna tsingome. 15 Kailapfa milungu yose ya chigheni na ipfinyagho mna Ing'anda ya IMNDEWA. Pfipfila katsibomola tsimatsabahu itsitsengighwe kuna ichidunda cha Ing'anda ya IMNDEWA ako Yerusalemu, kuya kapfasa kunze mwa ghumji. 16 Kuya koyitsa imatsabahu ya IMNDEWA, na mchanya mwake kalapfa nambiko tsa ukala tseghamba na tsa ukumlongela Imulungu mighede, kawalaghitsa iwanu wa Yuda wamtammbikile IMNDEWA, Imulungu wa Isiraeli. 17 Hata apfo iwanu waghendelela kulapfa nambiko hanu henulighwe, lekeni wamlapfila IMNDEWA, Imulungu wawo yaliyeka.

18 Aghala ghose ghayatendile Manase, ghamalombi ghake kwa Imulungu wake na aghala ghawamlongele manabii kubitila taghwa lya IMNDEWA, Imulungu wa Isiraeli, agho ghose ghandikighwa mna ichitabu cha kumbukumbu cha wafalume wa Isiraeli. 19 Ghamalombi ghake, na Imulungu pfayambokele, nzambi tsake na ukuleka kwake kuwa mwenyepfale, hanu hayatsengile ha ukutammbikila, na pfayatendile tsingutso tsa Ashera, na ipfinyagho, hayakalile ng'ana yoye baye kwa Imulungu, agho ghandikighwa mna kumbukumbu tsa manabii. 20 Manase kafa na katsikighwa mna ing'anda yake ya ufalume, naye Amoni, imwanaghe katawala hanu hake.

21 Amoni tsakana miyaka ishirini na mili hayanzile kutawala Yuda. 22 Katenda ghehile hambele ha IMNDEWA ka pfayatendile Manase, aba wake. Kuya kalapfa nambiko tsa ukupfitambikila ipfinyagho pfayasongole Manase, aba wake. 23 Lekeni yeye ng'ehulumse baye hambele ha IMNDEWA ka pfayatendile Manase, ila yeye tsakongetsa ukutenda ghehile ghendo. 24 Hambele iwatumighwa wake wamtendela tsengwe, wamkoma mna ing'anda yake ya chifalume. 25 Lekeni wanu wa Yuda wawakoma awo wose iwamtendele tsengwe Amoni; kuya wamtenda Yosia, imwanaghe yawe mfalume hanu hake.