1 Abiya kanza kuitawala isi ya Yuda mna ghumwaka ghwa kumi na nane ghwa mfalume Yeroboamu kuiatawala isi ya Isiraeli. 2 Katawala kwa miyaka midatu ako Yerusalemu. Mai wake tsakakemighwa Maaka, neghe Urieli wa Gibea.

Kuya tsakulawila ng'ondo, Abiya ketowa na Yeroboamu. 3 Abiya kaghenda kung'ondo aku kana maasikali laki nne iwadahile ukwitowa, naye Yeroboamu kaghenda na maasikali wake laki nane iwadahile kwitowa. 4 Mfalume Abiya tsakema kuna chidunda cha Semaraimu, mna isi ya ipfidunda pfa Efuraimu, kamkemela Yeroboamu na wanu wa Isiraeli, "Unitegheletse ghwe Yeroboamu na iwanu wose wa Isiraeli! 5 Apfi ng'ammanyile baye ka IMNDEWA, Imulungu wa Isiraeli, tsakeka laghano ing'alibeneka baye na Daudi ka wafalume wose watsolawila mna ilukolo lwake? 6 Lekeni Yeroboamu mwana wa Nebati, mtumwa wa Selemani, mwana wa Daudi tsakenuka na kumbiduka imkulu wake. 7 Kuya kawakema mahenze henze wawe naye, nawo wamlema Rehoboamu mwana Selemani, wambama yatende aghala ghawobama wawo, naye ng'adaile baye kuwalemela kwaapfila tsayangali msongolo na yang'ali yowapfuka. 8 Sambi mwoghamba mwodaha kuulema ufalume wa IMNDEWA uli mna ghamoko gha iwanu wa ilukolo lwa Daudi, kwaapfila mna maasikali wengi na mna pfinyagho pfa nzahabu pfa imwana wa ing'ombe pfayatengenetse Yeroboamu pfiwe milungu yenu. 9 Angu mwemwe ng'amuwawingile baye iwatambika wa IMNDEWA, awala iwana wa Aruni, na iwana wa Walawi, kuya mwisaghulila wenyegho watambika wenu ka pfawotenda iwanu wa isi tsingi? Munu wowose iyakutsa yetende yele aku kana mwana we ng'ombe na wang'olo saba kodaha kuwa mtambika wa pfinu ipfikoneka milungu yenu. 10 Lekeni kuna twetwe, IMNDEWA, yuyo Imulungu wetu, wala ng'atumlekile baye. Iwana wa Aruni wawo iwomtambikila IMNDEWA, na iwana wa Walawi wawo iwowapfila. 11 Chila mitondo na mihe, wawo womlapfila IMNDEWA nambiko tsa ukulakatsighwa na nambiko tsa ukupfukitsa ubani iunung'ila ghoya, kuya wakwika pfighate mna imetsa ya nzahabu inoghile, pfighate ipfikwikighwa hambele ha Imulungu, na wotuwa pfitasa ipfili mna ichinala cha nzahabu chila mihe. Apfo twetwe twoghawinza ghamalaghitso gha IMNDEWA, Imulungu wetu, lekeni mwemwe mumleka. 12 Lelo mlole, Imulungu mwenyegho kahamwe na twetwe, yeye kachilongotsi wetu. Watambika wake ma wakinda malati tsawo kututowela twanze ing'ondo na mwemwe. Mwemwe wanu Isiraeli wa makabila gha kasikazini, mleke kwitowa na IMNDEWA, Imulungu wa iwahenga wenu. Ng'amdaha baye kuhuma!" 13 Lekeni Yeroboamu tsakawatuma maasikali wake wawatsingile kwa kuchughu maasikali wa Yuda, aku maasikali wake wangi wawatsila kwa hambele. 14 Iwanu wa Yuda hawahunduke, wona maasikali wakuchughu kwawo na wangi wahambele hawo. Wamlilila IMNDEWA na watambika watsitowa malati tsawo. 15 Baho maasikali wa Yuda wakemelela lukemo lwa ng'ondo. Iwanu wa Yuda hawang'ali wokemelela, Imulungu kamtowa Yeroboamu na wanu wose wa Isiraeli hambele ha Abiya na Wayuda. 16 Wanu wa Isiraeli wawatsuma iwanu wa Yuda, naye IMNDEWA kawaghogha na kawatenda wanu wa Yuda wahume. 17 Abiya na maasikali wake wawatowa ghendo Waisiraeli, tsawawakoma maasikali laki tano wa Isiraeli iwadahile ukwitowa ghoya. 18 Apfo iwanu wa Yuda wahuma mna ing'ondo ayo, na wanu wa Isiraeli tsawatowighwa ghendo, kwaapfila iwanu wa Yuda tsawamlolela IMNDEWA, Imulungu wa iwahenga wawo. 19 Abiya na maasikali wake wamuwinga Yeroboamu, kuya tsakamboka imiji yake, Beteli na pfijiji pfake na Yeshana na pfijiji pfake, na Efuroni hamwe na pfijiji pfake. 20 Mna ghamatsuwa gha Abiya, Yeroboamu ng'apatile ngupfu keli baye, kuya IMNDEWA kamtowa, naye hambele kafa. 21 Lekeni Abiya tsakaghendelela kuwa na ngupfu. Tsakakwela mapinga kumi na wane, na tsakana wana wamale ishilini na weli na wana mapinga kumi na sita. 22 Aghala ghangi ghayatendile Abiya mna utawala wake, ghayatendile na ghayalongile, ghose ghandikighwa mna ichitabu cha "Isimo cha nabii Ido".