1 Mfalume Yehoshafati wa Yuda tsakana mali na yang'ali yomanyika sideke, naye keka laghano na Ahabu wa mfalume wa Isiraeli, kabama imwanaghe yamkwele neghe Ahabu, mfalume wa Isiraeli. 2 Miyaka chidogho haifosile Yehoshafati kaghenda Samaria kumwangila mfalume Ahabu. Ahabu kamchinjila wang'olo na wang'ombe bwelele hamwe na iwanu iyelongotse nawo, kuya Ahabu kamdedetsa yaghende naye kughutowa ghumji ghwa Ramati Gileadi. 3 Ahabu mfalume wa Isiraeli kamghutsa Yehoshafati mfalume wa Yuda, "Pfihi kutsoghenda hamwe na nene kwighutowa ghumji ghwa Ramoti Gileadi?" Yehoshafati kamwidika Ahabu, "Nene na ghweghwe twa chinu chimwe, Maasikali wangu ka maasikali wako. Tutsakuwa hamwe naghwe mng'ondo." 4 Kuya Yehoshafati kaghendelela kumlongela mfalume wa Isiraeli, "Lekeni tanu umghutse IMNDEWA yolonga choni." 5 Lelo mfalume Ahabu kawakema hamwe manabii wose iwopfika miya nne, kawaghutsa, "Pfihi ng'ende kughutowa ghumji ghwa Ramoti Gileadi au ndeke kughenda?" Nawo wamwidika, "Ghenda, IMNDEWA katsokutenda uhume." 6 Lekeni Yehoshafati kaghutsa, "Angu ahano haduhu nabii wa IMNDEWA yatudaha kumghutsa?" 7 Naye mfalume Ahabu wa Isiraeli kamwidika Yehoshafati, "Kabaha yumwe iyakalile, ayo twodaha kumghutsa IMNDEWA kubitila yeye, taghwa lyake Mikaya mwana wa Imla, lekeni nene nomwihila kwaapfila ng'olonga chinu chochose baye chinoghile mna nene, lekeni yeye kalongagha ghehile ghaliyeka." Yehoshafati kedika, "Ng'apfinoghile baye mfalume yalonge apfo." 8 Baho Ahabu kamkema mtumighwa wake yumwe kamlongela, "Ngalileni Mikaya mwana wa Imla sambi baha." 9 Apfo mfalume wa Isiraeli na mfalume Yehoshafati wa Yuda wakala mna ipfighoda pfawo pfa ufalume hana ichibwalu cha ukubetela aku wapfala maghwanda ghawo gha chifalume, hana lilango lya ghumji, lya ukwingilila Samaria, na manabii wose wang'ali wotabiri hambele hawo. 10 Naye Sedekiya mwana wa Kenaana, yumwe wa manabii, tsaketengenetsela membe tsa chuma, kalonga, "IMNDEWA kolonga apfino, ‘Kwa tsimembe atsino kutsowoyitsa kuchughu Wasiriya mbaka wakomighwe.’ " 11 Na awala manabii wamwenga wose wang'ali wolonga chinu chicho, walonga, "Ghenda ukaghutowe Ramoti Gileadi, na IMNDEWA katsokwapfila umtowe mfalume wake." 12 Na imsenga ayula iyaghendile kumkema Mikaya, kamlongela, "Lola, manabii wose wolonga mfalume katsowatowa maaduwi, naghwe nokulomba utende ka wawo, utabili ighanoghile kuna yeye." 13 Lekeni Mikaya kamwidika, "Neleha kwa IMNDEWA iyali mgima, nitsomlongela chichila chayonongela IMNDEWA." 14 Mikaya hayapfikile, mfalume kamghutsa, "Pfihi tughende tukaghutowe ghumji ghwa Ramoti Gileadi au tuleke kughenda?" Naye kamwidika, "Ghenda naghwe kutsoghutowa, IMNDEWA katsokwapfila ughutowe ghumji aghwo." 15 Mfalume kamlongela, "Nikutenda wilahe mala ngapi ili haulonga na nene kwa taghwa lya IMNDEWA ulonge igholongesa?" 16 Kuya Mikaya kamwidika, "Niwona Waisraeli wapwililika mpfidunda ka wang'olo iwalihela mdimi, na IMNDEWA kalonga, ‘Iwanu awano wahela munu wa ukuwalongotsa, mleke chila munu yoke tseghamba ukaye yake.’ " 17 Baho mfalume wa Isiraeli kamlongela Yehoshafati, "Kwakona? Nene sikulongele baye ka yeye ng'alongagha ghanoghile baye kuna nene ila ighehile ghaliyeka?" 18 Kuya Mikaya kalonga, "Lelo tegheletsa chayolonga IMNDEWA: Nimwona IMNDEWA kakala hana ichighoda chake cha ufalume akuno malaika wema kujilo kwake na kumoso kwake. 19 Naye IMNDEWA Imulungu kaghutsa, ‘Nani yatsombugha Ahabu yaghende yakakomighwe ako Ramoti Gileadi?’ Baho ayuno kolonga apfino, na yungi kolonga apfino. 20 Kuya muhe yumwe kema hambele ha IMNDEWA, kalonga, ‘Nene nitsombugha.’ IMNDEWA kamghutsa, kwa nzila yachi? 21 Naye kedika, ‘Nitsoghenda na kwitenda muhe wa ughutsu na kuwatenda manabii wake wose walonge ughutsu’ Imulungu kamlongela, ‘Ghweghwe kutsodaha ukumbugha, ghenda ukatende apfo.’

22 "Apfo lelo, IMNDEWA kawatenda manabii wako wose walonge ughutsu. IMNDEWA kalonga ghehile ghakupate."

23 Baho Sedekiya mwana wa Kenaana, kamsoghelela Mikaya, kamtowa mwikanza kuya kamghutsa, "Muhe wa IMNDEWA yalawiletse yandeke nene yatse kulonga na ghweghwe?"

24 Mikaya kamwidika, "Alyo kutsomanyalimanya mna litsuwa hautsakwingila wipfise mna ichiheleto chili mghati."

25 Ahabu kalaghitsa, "Msoleni Mikaya mmuyitse kwa Amoni, mkulu wa ghumji, na kwa Yoashi, mwana wa mfalume. 26 Kuya walongeleni wamwohe mwigelatsa, na wamwing'e chighate chidogho, na ghamatsi mbaka nene hanikuya mgima."

27 Mikaya kalonga, "Ka kwakuya mgima, IMNDEWA ng'alongile na nene baye." Kuya kaghendelela kulonga, "Mwemwe wanu wose mghakumbuke aghano!"

28 Apfo mfalume Ahabu wa Isiraeli na mfalume Yehoshafati wa Yuda wagheluka waghenda Ramoti Gileadi kughutowa. 29 Mfalume Ahabu kamlongela Yehoshafati, "Hanighenda ukwitowa nene nitsopfala magwanda ghangu ghangi ili ndeke kwoneka ka nene mfalume, lekeni ghweghwe pfala magwanda ghako gha chifalume." Apfo mfalume wa Isiraeli kaghenda kung'ondo aku kapfala magwanda ghangi.

30 Mfalume wa Siriya tsakawalaghitsa iwakulu wa ing'ondo iwemilile imituka ya ukukweghighwa na falasi, kawalongela, "Mleke ukwitowa na munu wowose ayula, yawe mdodo au mkulu, mwemwe mumtowe mfalume wa Isiraeli yaliyeka." 31 Iwakulu wa ing'ondo hawamwonile Yehoshafati walonga, "Ayuno mfalume wa Isiraeli ghendo." Apfo wahunduka waghenda wakamtowe, lekeni Yehoshafati hayakemelele, IMNDEWA kamwapfila. Imulungu kawaghala kutali waleke kumsoghelela. 32 Nawo wakulu wa ing'ondo hawatangile ka yeye si mfalume wa Isiraeli baye, waleka ukumuwinzilitsa. 33 Lekeni iasikali yumwe kasa mshale kamhoma mfalume wa Isiraeli bila kumanya hanu halilunga ligwanda lyake lya chuma. Ahabu kamlongela iyakwendesa ghumtuka ghwake ghwa ukukweghighwa, "Yuitsa ghumtuka ghwako kuchughu, undapfe akuno kung'ondo, miyagho wandagha pfihile." 34 Ing'ondo tsaighendelela mna imisi yose. Naye mfalume wa Isiraeli yang'ali yolebela mna ghumtuka ghwake aku kowalola maasikali wa Aramu. Nemihe litsua haling'ali likuswa, kafa.