1 Yosia tsakana miyaka minane hayanzile kutawala, katawala miyaka selasini na ghumwe aku kokala Yerusalemu. 2 Katenda ghanoghile hambele ha IMNDEWA. Tsakawinza nzila tsa Daudi, sekulu wake na kakinda ghamalaghitso ghose gha Imulungu.

3 Mna ghumwaka ghwa kane ghwa ufalume wake, hayang'ali kamsongolo, kanza ukumbama Imulungu wa Daudi, sekulu wake. Na hayakalile na miyaka kumi na mili kanza kuitenda Yuda na Yerusalemu yele kwa kutsihinya tsimatsabau tsa hanu henulighwe tsa ukutambikila milungu ingi, na kapfihinya ipfinyagho pfa Ashera na pfinyagho pfingi pfa ukusongola na pfa ukulubula. 4 Iwanu wake watsibomola tsimatsabahu tsa Mabaali, na matsabahu tsa ukudusulila upfumba itsikalile mchanya mwake, kuya katsihonda tsingutso tsa Ashera na pfinyagho pfingi pfa ukusongola, na katsidugha tsiwa timbwisi, nalyo litimbwisi kalighela mchanya mwa ipfibaka pfa iwanu iwapfilapfilile nambiko. 5 Pfipfila kailakatsa imipate ya iwatambika wa milungu ayo mna tsimatsabau tsawatambikile, kaitenda Yuda na yerusalemu yele. 6 Katenda apfo mna imiji ya Manase, Efuraimu, Simeoni, mbaka Naftari, na mna ghamahame ighatsunguluke imiji ayo. 7 Katsihonda honda tsimatsabahu na ngutso tsa Ashera mbaka tsiwa timbwisi. Kuya tsakaghanaghana tsimatsabahu tsa ukudusulila upfumba mna isi yose ya Isiraeli. Kuya koya Yerusalemu.

8 Mna ghumwaka ghwa kumi na nane ghwa ukutawala kwake, hayamalitse kuitenda isi na ing'anda yele katuma wanu wadatu, Shafani mwana wa Asalia, Maaseya mkulu wa ghumji, na Yoa, mwana wa Yoazi, imwandishi, ili waghende kuitsenga keli ing'anda ya IMNDEWA, Imulungu wake. 9 Awo wamghendela Hilikia mtambika mkulu, wamwing'a sendi itsighalighwe mna ing'anda ya Imulungu na Walawi iwakalitse ghamalango, tsawabokele kulawa kwa iwanu wa Manase, Efuraimu na kulawa mna isi yose ya Isiraeli, isi yose ya Yuda na Benjamini, na kulawa kwa wenyekaye wa Yerusalemu. 10 Weng'ighwa iwemilile isang'ano ya ukuitsenga ghoya keli ing'anda ya Imulungu na iwanu awo iwemilile wawaliha iwanu iwatsengile keli ing'anda ya Imulungu. 11 Kuya waweng'a tsisendi atso iwanu iwosongola mibiki na iwanu iwotsenga, tsiwe tsa ukughulila ghamabwe ighasongolighwe, na mbao tsa ukulumbila, na mighamba ya kutumila mna sang'ano ya ukutenda keli tsing'anda atsila itsilekighwe ka mahame na wafalume wa Yuda. 12 Iwanu awo watenda isang'ano ayo kwa ukotogholighwa, na wang'ali wolongotsighwa na Walawi wane, Yahati na Obadia, Walawi iwalawile mna ilukolo lwa Merari, na Zakaria na Meshulamu iwalawile mna ilukolo lwa Kohati. Walawi wose iwakubuhu mna ukutowa ipfinu pfa ukwimbila, 13 tsawawemilila waduta mitsigho na kuwalongotsa wose iwatendile sang'ano tsingi. Walawi wamwenga tsawawa iwaandishi, na wakulu, na wamwenga wang'ali wokalitsa imilango. 14 Hawang'ali wolapfa kunze tsisendi itsighalighwe mna Ing'anda ya Imulungu, mtambika Hilikia kachona ichitabu cha Ghamalaghitso gha IMNDEWA ighalapfighwe kubitila Musa. 15 Hilikia kamlongela Shafania imwandishi, "Nichona ichitabu cha Ghamalaghitso mna ing'anda ya Imulungu." Kuya Hilikia kamwing'a Shafani ichitabu acho. 16 Naye Shafani kamghalila mfalume, kuya kamlongela, "Ghose ghautulaghitse twetwe iwatumighwa tughatenda." 17 Tutsilapfa tsisendi itsikalile mna ing'anda ya Imulungu, kuya tuweng'a iwanu iwasang'ane na iwemilile ing'onde. 18 Kuya Shefani kamlongela mfalume, "Mtambika Hilikia kangaya chitabu achino." Naye Shafani kachisoma hambele ha mfalume. 19 Mfalume hayaulike pfagholonga ghamalaghitso ighali mna ichitabu acho, kadegha maghwanda ghake kwa wogha. 20 Kamlaghitsa mtambika Hilikia, na Ahikamu mwanaghe Shafani, na Akibori mwanaghe Mikaya hamwe na imwandishi Shafani na Asaya mtumighwa wa mfalume, kawalongela, 21 "Mghende mkangutsile nene kwa IMNDEWA na mkawaghutsile iwanu wa Yuda aghala ighandikighwe mna ichitabu achino ichoneke. IMNDEWA katughudubukila kwaapfila iwahenga wetu ng'awategheletse baye ghamalonga gha ichitabu achino, na ng'awatendile baye aghala ighandikighwe twetwe tutende." 22 Apfo Hilikia hamwe na awala iwatumighwe na mfalume wamghendela nabii yumwe pinga iyakemighwe Hulida, mwehe wa Tokati mwana wa Hasra, mlolesa ghamaghwanda ighatumike mna ing'anda ya Imulungu. Yeye tsayang'ali yokala Yerusalemu mna ichijiji cha kabili, nawo walonga naye aghala ighalawile. 23 Naye pinga ayo kawalongela, Achino chicho chayolonga IMNDEWA, Imulungu wa Isiraeli, namwe mlongeleni apfino imunu iyawatumile kuna nene, 24 IMNDEWA kolonga apfino, "Nitsoghala ghehile hanu ahano na mna iwanu wake, ka chila chinu ichandikighwe mna ichitabu acho chayasomile mfalume wa Yuda pfachilonga. 25 Kwaapfila wandema nene, na wadusula ubani kuna imilungu ingi na kunitenda nene nighudubuke kwa pfinyagho pfawatendile kwa ghamoko ghawo, imaya yangu itsakwaka hanu ahano, na kuduhu wa kuitsima. 26 Mlongeleni mfalume wa Yuda iyawatumile mwemwe mtse kuna nene mumghutse IMNDEWA, ‘Apfi pfipfo pfayolonga IMNDEWA, Imulungu wa Isiraeli mna aghala ghauhulike. 27 Kwaapfila ghumoyo ghwako tsaghukutama na kwihulumsa hambele hangu nene MNDEWA ahala hauhulike apfila pfanihalongile hanu ahano na iwanu wake, ka wang'alighitighwe na kulekighwa mahame. Kwa ukudegha kwako ghamagwanda na ukulila kwaulilile nene nikutegheletsa, yolonga apfo IMNDEWA 28 Sitsoghala baye ighehile agho hanu ahano mbaka ghweghwe hautsakufa na kutsikighwa, tsinenge tsako ng'atsitsakona baye ighehile ghanitsoghala hanu ahano.’ "

29 Kuya mfalume Yosia kawakema hamwe wanzehe wose wa Yuda na Yerusalemu. 30 Naye mfalume kaghenda kuna ing'anda ya IMNDEWA aku kelongotsa na wamale wose wa Yuda na wa Yerusalemu, iwatambika na manabii, na iwanu wose wadodo kwa wabala. Kawasomela aghala ghose ighandikighwe mna ichitabu cha laghano, ichoneke mna ing'anda ya IMNDEWA. 31 Mfalume kema habehi na ingutso yake, keka laghano hambele ha IMNDEWA, ka katsomuwinza IMNDEWA, kwa ukughakinda ghamalaghitso ghake, imiko yake na ghamalamutsi ghake, kwa ghumoyo ghwake ghwose, ghumuhe ghwake ghwose, na katsotenda aghala ighandikighwe mna ichitabu acho cha lilaghano. 32 Kuya kawatenda iwanu wose iwakalile Yerusalemu na Benjamini watoghole kukinda lilaghano. Nawo iwenyekaye wa Yerusalemu pfipfio pfawatendile, wakala kwa kulikinda lilaghano lya IMNDEWA, Imulungu wa iwahenga wawo. 33 Pfipfila Yosia kapfilapfa ipfinyagho pfose ipfidesa ipfikalile mna Isiraeli yose, na kawakomangitsa iwanu wose wa Isiraeli wamtumikile IMNDEWA, Imulungu wawo. Mna ugima wake wose ng'awamlekile baye IMNDEWA, Imulungu iwahenga wawo.