1 Mfalume Selemani kalaghitsa itsengighwe ing'anda ya ukumtambikila Imulungu, na ing'anda yake ya chifalume. 2 Keka wamale elufu sabini wawe waduta mitsigho, na wanu elufu semanini wawe wasongola mabwe mpfidunda, na wamwenga elufu ndatu na miya sita wawe wemilitsi wawo. 3 Kuya Selemani katuma nume kwa Hiramu mfalume wa Tiro, kamlongela, "Unendele ka pfaumtendele aba wangu Daudi, ahala haumghalile mikataluba ya ukutsengela ing'anda ya ichifalume. 4 Lelo na habehi ukutsenga ing'anda ya ukumtambikila IMNDEWA, Imulungu wangu. Nitsoilapfa kwa IMNDEWA, nayo itsakuwa hanu ha ukudusulila ubani iunung'ila ghoya hambele hake, kuya hatsakuwa hanu ha pfighate pfa ukwikighwa hambele hake matsuwa ghose, na nambiko tsa ukulakatsighwa nemitondo na nemihe, na mna ghamatsuwa gha Sabato, na mna ukudeng'elela kwa mlawo ghwa ghumwetsi, na pfihungo pfimwenga pfa IMNDEWA, Imulungu wetu, ka pfayailaghitse Isiraeli ukutenda apfo matsuwa ghose. 5 Ing'anda yanibama ukutsenga itsakuwa ng'ulu ng'ani, kwaapfila Imulungu wetu kamkulu kubita milungu yose. 6 Lekeni angu nani iyodaha kumtsengela ing'anda ka kulanga kwenyegho ng'akumwenela baye, wala kuchanya kwa kulanga? Lelo nene nili nani mbaka nimtsengele ing'anda, ka si hanu hela ha ukudusulila ubani? 7 Lelo ungalile munu iyomanya ukutengenetsa pfinu pfa nzahabu, pfa fetsa, pfa shaba, na pfa chuma na pfa tsinguwo tsa langi ya nzambarao na ndung'u na buluu, na iyodaha kwika unzolingo kwa ukwangula yasang'ane na iwanu wangu iwali muisi ya Yuda na Yerusalemu iwasaghulighwe na aba wangu Daudi. 8 Pfipfila ngalile mikataluba, miberoshi na misandali kulawa Lebanoni, kwaapfila nomanya iwanu wako wa isang'ano womanya sideke kwa ukubatsula tsimbao ako Lebanoni. Na iwanu wangu watseyapfila na iwanu wako, 9 ili wanitulile mbao nyingi, kwaapfila ing'anda yanibama ukutsenga ng'ulu na ya ukukangawatsa. 10 Nitsoweng'a iwanu wako awala iwatula tsimbao, nitsolapfa tani elufu mbili tsa ingano idughighwe, na tani elufu mbili tsa shayiri, na lita laki nne dipfai, lita laki nne tsa mapfuta gha mitseituni."

11 Naye Hiramu, mfalume wa Tiro kamwidika Selemani kwa ibaluwa, kalonga, "Kwaapfila IMNDEWA kawakunda iwanu wake, kakutenda uwe mfalume wawo. 12 Yatunyighwe IMNDEWA Imulungu wa Isiraeli, iyaumbile lilanga na isi! Kamwing'a mfalume Daudi imwana yana ihekima, na tsimbutsi, iyatsomtsengela IMNDEWA ing'anda, na iyatsetsengela imwenyegho ing'anda ya chifalume. 13 Lelo nokughalila munu iyokemighwa Huramu Abi, imunu iyadahile ukutengenetsa pfinu pfingi, 14 yeye ka mwana wa pinga yumwe wa kabila lya Dani na aba wake yang'ali yokalagha Tiro. Ayo kamanya ghendo kutungenetsa pfinu pfa nzahabu, pfa fetsa, pfa shaba, pfa chuma, pfa mabwe, pfa mibiki, na pfa rangi ya nzambarao, buluu ndung'u na tsinguwo tsinzelu. Kuya kodaha ghendo kwika unzolingo na kukwangula chila chinu kwa kuwinzilitsa chinu chochose chayakwing'ighwa. Yeye katsosang'ana na iwanu wako, wanu wa imkulu wangu, Daudi aba wako. 15 Lelo mkulu wangu, ipfinu apfo pfaulongile: ingano, ishayiri, ghamapfuta na idipfai, nokulomba upfighale kwa watumwa wako, 16 na twetwe tutsotula mbao kulawa ako Lebanoni ka pfaubama, kuya totsoha hamwe tsiyeluke mmatsi mbaka Yopa. Kulawa ako kutsotsighala Yerusalemu."

17 Kuya mfalume Selemani kawapeta iwagheni wose iwakalile mna isi ya Isiraeli ka Daudi, aba wake pfayawapetile. Tsahana wanu wagheni laki imwe, elufu hamsini na ndatu, na miya sita. 18 Mna iwagheni awo, Selemani kasaghula wanu elufu sabini wawe waduta mitsigho, na wanu elufu semanini wasongole ghamabwe mpfidunda, na wanu elufu ndatu na miya sita wawemile wayawo ahala hawosang'ana ing'onde.