1 Ichihungo hachimalile, iwanu wose wa Isiraeli tsawaghenda mna chila mji ighuli Yuda, kuko watsibena bena tsingutso tsa ghamabwe na kupfigana gana ipfinyagho pfa Ashera, mulungu pinga, kuya watsihinya tsimatsabau na hanu henulighwe ha ukutambikila milungu ingi. Watenda pfipfo mna chila hanu ako Yuda, Benjamini, Efuraimu na ako Manase mbaka hawamalitse kuhinya chila chinu. Kuya woya mna imiji yawo, chila munu ukaye yake.

2 Mfalume Hezekia kawaghola keli iwatambika na Walawi mna makingili, kwa ukulola sang'ano tsawo. Kaweng'a iwatambika na Walawi ing'onde ya ukalapfa nambiko tsa kulakatsighwa, na nambiko tsa ukukala tseghamba na Imulungu, na kusang'ana hana ghamalango gha ing'anda ya IMNDEWA, na ukumlongela Imulungu mighede na ukumwimbila. 3 Kulawa mna imifugho yake imwenyegho mfalume kalapfa wanyama wake wawe nambiko tsa ukulakatsighwa nemitondo na nemihe, na wawe nambiko tsa Litsuwa lya Kubwihila, na wawe nambiko mna ipfihungo pfa ukudeng'elela mlawo ghwa ghumwetsi, na wawe nambiko mna ipfihungo pfingi ipfandikighwe mna ghamalaghitso gha IMNDEWA. 4 Kubita agho, mfalume kawalaghitsa iwanu iwakalile Yerusalemu walapfe pfinu pfawobamighwa waweng'e iwatambika na Walawi, ili wawo welapfe ghendo mna ukughatenda aghala ghose ighali mna ghamalaghitso gha IMNDEWA. 5 Iwanu wa Isiraeli hawahulike lilaghitso alyo, walapfa bwelele ipfijo pfikwanza ukwipfa, idipfai, ghamafuta, uki na pfinu pfose ipfilawile kuna imighunda, na walapfa tsaka bwelele ya chila chinu. 6 Iwanu wa Isiraeli na Yuda iwakalile mna imiji ya Yuda pfipfila waghala tsaka tsa wang'ombe na wang'olo na pfinu pfingi, pfipfila walapfa tsaka kwa Imulungu. Tsawapfika ipfinu apfo mna ghamabughulu. 7 Mna ghumwetsi ghwa kadatu wandusa kupfilundika ipfinu apfo mna malundo malundo, nawo wamalitsa mna ghumwetsi ghwa saba. 8 Mfalume Hezekia na pfilongotsi wake hawatsile kughona ghamalundo agho, wamtunya Imulungu na wawabaliki iwanu wa Isiraeli. 9 Mfalume Hezekia kawaghutsa iwatambika na Walawi apfila ghamabughulu agho pfaghali makulu. 10 Azaria mtambika mkulu iyolawa mna ilukolo lwa Zadoki kamwidika, "Tangiya iwanu hawanzile kughala nambiko tsawo mna Ing'anda ya IMNDEWA, tupata pfijo pfingi pfa ukuja, na pfimwenga twakwika. Tupata pfinu pfose apfino kwaapfila IMNDEWA kawabaliki iwanu wake." Apfo ghamabughulu aghano ghaukona pfipfo ipfinu ipfisighale. 11 Kuya mfalume Hezekia kawalaghitsa watsenge ing'anda ya ukwikila ipfinu ako kuna ing'anda ya Imulungu, nawo walitsenga, 12 amwo tsaweka nambiko, tsaka na pfinu pfose ipfikighwe wakifu. Kuya wamwika Konania Mlawi, yawe mkulu wa ukulolesa ipfinu apfo, na Shimei, ndughu yake kamwapfila. 13 Nawo tsina Yehieli, Azazia, Nahathi, Asaheli, Yeremothi, Yosabadi, Elieli, Ismakia, Mahathi na Benaya tsawekighwa wawapfile tsina Konania na Shimei ndughu yake. Awano wose tsawasaghulighwa na mfalume Hezekia na Azariya, mkulu wa ing'anda ya Imulungu. 14 Kore mwana wa Imna, Mlawi iyang'ali yololesa Lilango lya mashariki lya ing'anda ya Imulungu, tsakemilila ipfijo pfose ipfilapfighwe kwa Imulungu, pfawalapfile iwanu kwa ukubama wenyegho, na yang'ali yopfighola ipfinu apfo pfa IMNDEWA, na pfinu pfingi ipfilapfighwe pfiwe pfa Imulungu. 15 Nawo tsina Edeni, Miniamini, Yeshua, Shemaya, Amaria na Shekania, tsawamwapfila pfinoghile ghendo ng'onde ayo ya ukuwagholela iwatambika iwakalile mna imiji ingi. Wawagholela ndughu tsawo Walawi ipfijo, wabala kwa wadodo, 16 bila kulola kolo tsawo kwawandikighwe. Kuya wawagholela iwamale wana imiyaka midatu na kughendelela wana ghamataghwa ighandikighwe mna ipfitabu pfa ukukumbuka, awala iwadahile kwingila mna ing'anda ya Imulungu kusang'ana ng'onde tsawo tsa chila tsuwa, chila mtambika na Mlawi tsakabokela ipfinu apfino kwa ukulola ing'onde iyasang'ane. 17 Wawagholela iwatambika iwandikighwe mna ipfitabu pfa kumbukumbu kwa kulola ilukolo lwao, na wawagholela Walawi iwana miyaka ishilini na kughendelela kwa ukulola sang'ano tsawo na apfila pfawawagholeke. 18 Wawagholela mbaka iwana wawo wadowado, wehe tsawo, wana wawo wamale na neghe tsawo, na mtingano wose, kwaapfila wawo iwenyegho tsawetenda wela. 19 Pfipfila mna iwana wa Aruni, watambika iwakalile mna imighunda itsunguluke imiji yawo, tsahana wanu iwasaghulighwe ukughola ipfijo kwa chila mmale mna tsikaye tsa iwatambika, na chila munu iyandikighwe mghati mwa Walawi. 20 Apfo pfipfo mfalume Hezekia pfayatendile mna isi yose ya Yuda ighanoghile, ighagholoke na ghakutogholeka hambele ha IMNDEWA, Imulungu wake. 21 Mna chila chinu chayatendile mna ing'anda ya Imulungu na mna ukukinda ghamalaghitso na imiko, yeye tsakambama Imulungu wake na kamsang'anila kwa ghumoyo ghwake ghose, Apfo tsakebweda mna chila chinu.