1 Iwanu wa Yerusalemu wamwika Ahazia, imwana mtsuwanda wa Yehoramu yawe mfalume yatawale hanu ha aba wake, kwaapfila iwabala wake wose tsawakomighwa na mitsinu ihile itsile na Warabu kuna indalo. Apfo Ahazia mwana wa Yehoramu kawa mfalume wa Yuda, kanza kutawala 2 Ahazia tsakana miyaka alubaini na mili hayawile mfalume, katawala Yuda kwa mwaka ghumwe aku kokala Yerusalemu. Mai wake tsakakemighwa Atalia, mtsukulu wa Omri. 3 Naye pfipfila katenda ghaghala ghawatendile iwanu wa ing'anda ya Ahabu, kwaapfila mai wake yang'ali yomlongotsa mna ukutenda ghaghala ighehile. 4 Katenda ghehile hambele ha IMNDEWA ka pfawatendile iwanu wa ing'anda ya Ahabu, kwaapfila aba wake hayafile, wawo wang'ali womfunda mna ukutenda ghehile. 5 Pfipfila kawinza ghawamlongele, kaghenda na Yoramu, mwana wa Ahabu mfalume wa Isiraeli kwitowa na Hazaeli mfalume wa Shamu ako Ramoti Gileadi. Ako Waashamu wamlagha Yoramu. 6 Apfo mfalume Yoramu koya mna isi ya Yezireeli yahone ipfilonda pfake pfawamlaghile iwanu wa Aramu ako Ramoti hawang'ali wetowa na mfalume wa Aramu. Naye Ahazia mwana wa Yehoramu mfalume wa Yuda kahulumka kaghenda Yezireeli kumwona Yoramu mwana wa Ahabu yana ipfilonda. 7 Imulungu tsakabama ghendo Ahazia yakomighwe ahala hayamwangile Yoramu. Kwaapfila hayapfikile ako, tsakalawa na Yoramu, waghenda kwitingana na Yehu, mwana wa Nimshi iyasaghulighwe na Imulungu yawakome iwanu wa ing'anda ya Ahabu. 8 Yehu hayang'ali yowahigha iwana wa Ahabu ketingana na wakulu wa Yuda hamwe na iwana wamale wa ndughu tsake Ahazia iwelongotse na Ahazia, Yehu kawakoma. 9 Kuya iwanu wake Yehu wambama Ahazia, na wamghogha hayang'ali kepfisa ako Samaria. Nawo wamghala kwa Yehu, kuko Yehu kamkoma. Walutsika lukuli lwake mana tsawalonga, "Yeye mtsukulu wa Yehoshafati, iyambamile Imulungu kwa ghumoyo ghwake ghose."

Apfo kuduhu hata munu yumwe wa ing'anda ya Ahazia iyadahile kuwa mfalume.

10 Naye Atalia, mai wake mfalume Ahazia, hayonile imwanaghe kafa, kalaghitsa iwanu wose wa ikaye ya ing'anda ya chifalume ya Yuda wakomighwe. 11 Lekeni Yehosheba, imwana pinga wa mfalume Yehoramu kamsola chinyelenyele Yoashi, mwana wa Ahazia, kulawa kuna iwana wa mfalume iwabamighwe kukomighwa. Kampfisa na yaya wake mna ichiheleto cha ukwikila ipfilagho ipfili mna ing'anda ya Imulungu. Apfo Yehosheba neghe mfalume Yehoramu, iyali mwehe wa mtambika Yehoyada, na tsa lumbu wake Ahazia, kampfisa imwana ayo yaleke kukomighwa na Atalia. 12 Naye Yoashi kakala na Yehosheba kwa miyaka sita, aku kapfisighwa mna ing'anda ya Imulungu, ahala Atalia hayang'ali yotawala isi ya Yuda.