1 Yotamu tsakana miyaka ishilini na mitano hayawile mfalume, katawala aku kokala Yerusalemu kwa miyaka kumi na sita. Mai wake tsakakemighwa Yerusha, neghe Sadoki. 2 Katenda ighanoghile hambele ha IMNDEWA ka apfila Uzia, aba wake pfayatendile, ila yeye ng'engile baye kudusula upfumba mna ing'anda ya IMNDEWA. Hata apfo iwanu tsawaghendelela ukutenda ghehile. 3 Yotamu kalitsenga keli Lilango lya Kuchanya lya ing'anda ya IMNDEWA. Kuya katenda ng'onde ng'ulu ya ukutsenga keli ubanda uli kuchidunda cha Ofeli. 4 Kuya katsenga miji mna isi ya ipfidunda pfa Yuda, pfipfila katsenga mibanda na minala ako kumihulo. 5 Yotamu ketowa na mfalume wa Amoni, na kamhuma. Ghumwaka agho Waamoni wamliha tani ndatu na nusu tsa fetsa, tani elufu imwe tsa ngano, na tani elufu imwe tsa shayiri. Waamoni waghendelela kutenda apfo mna ghumwaka ghwa kabili na ghwa kadatu. 6 Mfalume Yotamu kaghendelela kuwa na ngupfu, kwaapfila tsayang'ali yomtegheletsa IMNDEWA, Imulungu wake. 7 Ghangi ghayatendile Yotamu, tsing'ondo tsayetowile, na chila chinu chayatendile, ghose ghandikighwa mna ichitabu cha kumbukumbu cha wafalume wa Yuda. 8 Yotamu tsakana miyaka ishilini na mitano hayawile mfalume, katawala Yerusalemu kwa miyaka kumi na sita. 9 Kuya kafa na katsikighwa kuna ghumji ghwa Daudi, kwawatsikighwe wahenga wake. Ahazi imwanaghe kawa mfalume, hanu hake.