1 Mna ghumwaka ghwa salasini na sita ghwa ufalume wa Asa, mfalume Baasha wa Isiraeli kaitowa isi ya Yuda, kuya katsenga ubanda utsunguluke ghumji ghwa Rama, ili munu wowose yaleke kulawa wala kwingila mna isi ya mfalume Asa wa Yuda. 2 Baho mfalume Asa kasola fetsa na nzahabu itsikalile mna ing'anda ya IMNDEWA na ing'anda yake ya chifalume, katsighala Damaski kwa mfalume Beni Hadadi, mfalume wa Shamu, aku katuma nume, kamlongela, 3 "Nobama twilaghane, nene na ghweghwe, ka apfila aba wangu na aba wako pfawelaghane. Lola, nokughalila nzahabu na fetsa, ili laghano lyawikile ghweghwe na Baasha mfalume wa Isiraeli litsighe na yeye yawalapfe asikali wake kuna nene woke." 4 Beni Hadadi kamtogholela mfalume Asa, kawatuma wakulu wa maasikali wake wakaitowe imiji ya Isiraeli. Waghusola ghumji ghwa Iyoni, na ghwa Dani, na ghwa Abeli Beti Maaka, na ghwa Kineroti, na miji yose ya Nafutali ina tsikano tsa ipfijo. 5 Mfalume Baasha hayahulike tsimbuli atso, kaleka kughutsenga ghumji ghwa Rama, na kaileka isang'ano ayo. 6 Mfalume Asa kawakema hamwe iwanu wose wa Yuda, wakadute ghamabwe na mibiki kulawa Rama, iyang'ali yotsengela Baasha. Kuya mfalume Asa kasola ghamabwe agho na imibiki ayo katsengela ubanda wa ghumji ghwa Geba, na ubanda wa ghumji ghwa Mispa.

7 Ghamatsuwa agho, nabii Hanani, kamghendela mfalume Asa wa Yuda, kamlongela, "Kwaapfila tsakwihuwila mfalume wa Shamu, kuleka ukwihuwila IMNDEWA, Imulungu wako, maasikali wa Shamu waswekuka kulawa kuna ghamoko ghako. 8 Angu awala Waesiopia na Walibiya tsang'awawile na maasikali wengi baye, na tsang'awawile na mituka na wadina falasi wengi baye? Lekeni kwaapfila tsakwihuwila IMNDEWA, naye tsakaweka mna ghamoko ghako." 9 IMNDEWA kololesa pfinoghile ghendo mna isi yose, iyalanguse ingupfu yake kwa awala iwalapfile imimoyo yawo kumlolela yeye. Ghweghwe kutenda chinu cha ubotsi ghendo, apfo kulawa sambi kutsakuwa na ng'ondo chila mala. 10 Imbuli ayo imtenda Asa yamwonele maya ng'ani nabii Hanani, apfo kamwoha mna ligeletsa. Na mna ghamatsuwa ghagho Asa kanza kuwadununza ghendo iwanu wamwenga.

11 Ghayatendile Asa kulawa hayanzile mbaka hayamalitse, ghose ghandikighwa mna ichitabu cha kumbukumbu cha wafalume wa Yuda na Isiraeli. 12 Mna ghumwaka ghwa salasini na tisa ghwa ufalume wake, Asa kapata utamu wa ghamaghulu. Hata ka ghamaghulu ghang'ali ghomtama ng'ani, Asa ng'abamile baye IMNDEWA yamwapfile, lekeni kawabama iwaghanga wamwapfile. 13 Kuya Asa kafa mna ghumwaka ghwa alubaini na ghumwe wa ufalume wake. 14 Katsikighwa mna likabuli liyalisongole imwenyegho mna libambalawe ako kuna ghumji ghwa Daudi. Wamwika mna lisanduku limemile pfilungo ipfinung'ila ghoya pfa chila aina, kuya wabwina moto mkulu sideke kwa ukutambula ukulu wake.