1 Amazia tsakana miyaka ishilini na mitano hayawile mfalume, na katawala kwa miyaka ishilini na tisa aku kokala Yerusalemu. Mai wake tsakakemighwa Yehoadani, iyolawa Yerusalemu. 2 Yeye katenda ighanoghile hambele ha IMNDEWA lekeni ng'aghatendile baye kwa ghumoyo ghwake ghose. 3 Ufalume wa Amazia hawimile ghoya, kawakoma iwatumighwa iwamkomile mfalume Yoashi, aba wake. 4 Lekeni ng'awawakomile baye iwana wa awala iwamkomile aba wake, ka pfayandikighwe mna ichitabu cha malaghitso cha Musa ahala IMNDEWA hayalaghitse, kalonga, "Aba au mai ng'atsokomighwa baye kwa inzambi iyatendile imwanaghe, na imwana ng'atsokomighwa baye kwa inzambi iyatendile aba wake au mai wake, chila munu katsakufa kwa inzambi iyatendile imwenyegho."

5 Mfalume Amazia tsakawakema hamwe iwamale wa Yuda na Benjamini. Kuko kaweka wakele mna makingili gha wamale elufu imwe imwe, na wamwenga walongotse wanu miya imwe imwe, kwa ukulola tsikolo tsa aba tsawo. Kuya Kawapeta iwanu wana imiyaka ishilini na kughendelela, baho kapata wanu elufu ndatu iwakalile ghoya kwa kughenda kung'ondo na iwadahile kwitowa kwa migoha na tsingawo. 6 Kuya kawakodi wamale laki imwe kulawa Isiraeli iwadahile ukwitowa ghoya na kawaliha kilo ka elufu ndatu tsa fetsa. 7 Lekeni imunu wa Imulungu kamghendela, kamlongela, "Ghwe mfalume, uleke kwilongotsa na maasikali wa Isiraeli kung'ondo, kwaapfila IMNDEWA ng'ali hamwe na iwanu wa Isiraeli baye, ng'ali hamwe na awala iwana wa Efuraimu baye. 8 Hata ka koghenda kwitowa kwa tsingupfu tsako tsose, Imulungu katsokutenda utsume hambele ha maadui tsako, kwaapfila Imulungu kenatso tsingupfu tsa ukwapfila na tsa ukughwisa hasi."

9 Amazia kamghutsa imunu ayo wa Imulungu, "Lelo pfihi fetsa tsila tsatuwalihile maasikali kulawa Isiraeli?" Imunu wa Imulungu kamwidika, "Imulungu kodaha kukwing'a fetsa nyingi kubita atso."

10 Baho Amazia kawalekelela maasikali iyawakodile kulawa Efuraimu woye mmakaye mwawo. Nawo woya mmakaye mwawo aku wawaghudubukila ghendo iwanu wa Yuda. 11 Amazia keghuma ingupfu imwenyegho, kawalongotsa maasikali wake, kaghenda kuna Lwanda lwa Ghumkele. Kuko kawakoma maasikali elufu kumi kulawa Edomu. 12 Kuya wawaghogha maasikali elufu kumi, wawadinitsa mchidando mwa libambalawe kulu, kuya wawatupa hasi kulawa kuna libambalawe alyo, nawo wafa aku wabenekabeneka. 13 Kuya maasikali awala wa Isiraeli iyawalekile Amazia woye mmakaye mwawo, iyawaghomile waleke kughenda naye kung'ondo, waghenda kuipfamila imiji ya Yuda kulawa Samaria mbaka Beti Horoni, kuya wawakoma iwanu elufu ndatu na waboka pfinu pfingi. 14 Amazia hayoile kulawa kuwatowa Waedomu koya na milungu ya wanu wa Edomu, kaimitsa wima iwe milungu yake, kaitambikila na kuidusulila upfumba. 15 Chinu acho chimtenda IMNDEWA yone maya, apfo kamtuma nabii yaghende kwa Amazia. Nabii ayo kamghutsa Amazia, "Heule ghweghwe koitambikila milungu ya wanu wangi, milungu aila ing'aidahile kuwakombola iwanu wake wenyegho kulawa mna ghamoko ghako?"

16 Lekeni hata ng'ana yamalitse baye ukulonga, Amazia kamlongela, "Nyamale! Angu tukusaghule tsuwachi uwe munu yumlangulitsa mfalume? Angu ghweghwe kobama ukukomighwa?"

Nabii ayo kamlongela apfino, "Nomanya ghendo Imulungu kobama yakukome, kwaapfila kutenda ghose aghano, kuya koghabetsa aghano ghanikulongela." Kuya kaleka ukulonga naye.

17 Apfo mfalume Amazia wa Yuda tsakalonga na iwashauli wake, kuya katuma nume ighende kwa Yehoashi, mwana wa Yehoahazi, mwana wa Yehu mfalume wa Isiraeli, kamlongela, "Utse twitowe." 18 Lekeni Yehoashi mfalume wa Israeli kamwidika Amazia mfalme wa Yuda, kalonga, "Luchongoma luli Lebanoni tsalutuma nume kuna ghumbiki ghwa mwerezi ighuli kuko Lebanoni, ghulonga, ‘Umleke mwanagho pinga yakwelighwe na imwanangu.’ Kuya kabita mnyama wa kubagho kalubajugha iluchongoma alula. 19 Ghweghwe kwelongela ghumwenyegho ka kuwatowa ghendo Waedomu, na sambi kotamba na kweghoda, lekeni nokulongela ukale ukaye yako, heule wibamila ghamaghayo ighatsokukoma ghweghwe ghumwenyegho hamwe na iwanu wako wa Yuda?"

20 Lekeni Amazia ng'ategheletse baye alyo kwaapfila Imulungu mwenyegho tsakabama Amazia yatowighwe, kwaapfila Amazia tsakaitambikila imilungu ya Edomu. 21 Apfo Yehoashi mfalume wa Isiraeli kagheluka, kaghenda kwitowa na mfalume Amazia wa Yuda. Wetingana uhanga kwa uhanga ako Beti Shemesi mna isi ya Yuda. 22 Waisiraeli wawatowa iwanu wa Yuda, na chila munu katsumila ukaye yake. 23 Yehoashi mfalume wa Isiraeli kamghogha Amazia mfalume wa Yuda, imwana wa Yoashi, na mtsukulu wa Ahazia ako Beti Shemesi. Kuya kamghala Yerusalemu na kuko kaumwagha ubanda wa Yerusalemu kwanzila lilango lya Efuraimu mbaka lilango likalile hana imembe, utali wake tsa futi miya sita. 24 Kasola inzahabu yose na ifetsa yose na ipfinu pfose ipfoneke mna ing'anda ya Imulungu, ipfing'ali pfilolesighwa na Obedi Edomu na pfinu pfose ipfikalile mna ing'anda ya chifalume. Kuya kasola iwanu iyawaghoghile, na koya Samaria. 25 Amazia imwana wa Yoashi, mfalume wa Yuda kakala miyaka kumi na mitano tangiya hayafile Yehoashi mfalume wa Isiraeli. 26 Ghose ghayatendile Amazia tangiya hayanzile ufalume mbaka hayamalitse tsaghandikighwa mna ichitabu cha kumbukumbu cha wafalume wa Yuda na Isiraeli. 27 Kulawa matsuwa aghala Amazia hayamlekile IMNDEWA, iwanu watenda tsengwe ako Yerusalemu lya ukumkoma Amazia, apfo katsumila Lakishi, lekeni iwanu awo watuma wanu wamuwinzilitsa ako Lakishi na wamkomela kuko. 28 Ilukuli lwake waluyitsa kwa kuludinitsa mna ifalasi, na wamtsika Yerusalemu kuna ghumji ghwa Daudi, kwawatsikighwe sekulu tsake.