1 Ufalume wa Rehoboamu hawimile ghoya na kuwa na ngupfu, yeye hamwe na Waisiraeli wose tsawaleka kughawinza malaghitso gha IMNDEWA. 2 Kwaapfila ng'awamtegheletse baye IMNDEWA, Shishaki, mfalume wa Misiri kaghutsingila ghumji ghwa Yerusalemu mna ghumwaka ghwa tano ghwa ufalume wa Rehoboamu. 3 Katsa na mituka elufu imwe na miya mbili na wadina falasi elufu sitini na maasikali wengi kulawa Libiya na Sukii na Kushi ing'awopeteka baye, wayelongotse nawo kulawa Misiri. 4 Mfalume Shishaki kaisola imiji ya Yuda itsungulusighwe ubanda, mbaka kapfika Yerusalemu. 5 Baho nabii Shemaya kamghendela mfalume Rehoboamu na iwakulu wa Yuda iwetingane ako Yerusalemu kwawatsumile kumpfuka Shishaki, kawalongela, "IMNDEWA Imulungu kolonga apfi, ‘Mwemwe mndeka nene, na nene nimlekani mna ghamoko gha Shishaki.’ " 6 Baho mfalume na iwakulu wa Isiraeli wona achila ichihile chawatendile, walonga, "IMNDEWA kotenda ihaki." 7 IMNDEWA hayonile watanga chawatendile, kalonga keli na nabii Shemaya, kamlongela, "Kwaapfila watoghola ghehile ghawatendile, sitsowakoma baye, lekeni nitsowakombola chidogho Sitsakona maya baye na kuihinya Yerusalemu kubitila Shishaki, 8 lekeni watsakuwa watumwa wa Shishaki, nawo watsomanya ghendo kumbe pfinogha kunitumikila nene kubita kuwatumikila wafalume wa isi tsingi." 9 Apfo mfalume Shishaki wa Misiri kaghupfamila ghumji ghwa Yerusalemu, kasola pfinu pfose pfili mna ing'anda ya IMNDEWA na pfinu pfose pfili mna ing'anda ya mfalume. Kasola chila chinu, hamwe na tsingao tsa nzahabu tsayatendile mfalume Selemani. 10 Apfo mfalume Rehoboamu katengenetsa ngawo tsingi tsa shaba hanu ha atsila tsa nzahabu itsisolighwe, kuya kaweng'a iwakalitsi wakulu watsibetetse, awala iwang'ali wokalitsagha lilango lya ing'anda ya mfalume. 11 Chila mala mfalume hayaghendile kuna ing'anda ya Imulungu, iwakalitsi watsikinda tsingawo atso, na hambele watsuyitsagha kuna ichiheleto cha iwakalitsi. 12 Kwaapfila Rehoboamu tsakehulumsa, IMNDEWA naye kaleka ukumghudubukila na ng'amkomile baye. Pfipfila mna isi ya Yuda chila chinu chighenda ghoya.

13 Apfo mfalume Rehoboamu tsakema ghoya mna ufalume wake ako Yerusalemu. Tsakanza kuitawala isi ya Yuda aku kana miyaka alubaini na ghumwe, na katawala miyaka kumi na saba kuna ghumji ghwa Yerusalemu, ghumji ghuyasaghule IMNDEWA kulawa ghamakabila ghose gha Isiraeli, ghuwe hanu ha ukumtambikila yeye. Na mai wake kakemighwa Naama, munu wa Amoni. 14 Rehoboamu tsakatenda ghehile, kwaapfila ghumoyo ghwake ng'aghumbamile baye IMNDEWA. 15 Ghose ghayatendile mfalume Rehoboamu kulawa hayanzile mbaka hayamalitse ghandikighwa mna ichitabu cha nabii Shemaya, na nabii Ido, tsaghandikighwa kwa ukulola tsikolo. Rehoboamu na Yeroboamu wang'ali wetowagha matsuwa ghawo ghose. 16 Kuya Rehoboamu kafa, wamtsika mna ghumji ghwa Daudi, na Abiya imwanaghe katawala hanu hake.