1 Chilo achila mfalume kakala meso, apfo kalaghitsa ichitabu ichandikighwe ighalawile chila tsuwa ahala hayang'ali yotawala, kuya chisomighwa hambele hake. 2 Yoneka yandikighwa mchitabu acho ka Modekai tsakatanga ka Bigitana na Tereshi, wakulu wabili wa mfalume iwakalitse lilango, tsawatenda tsengwe lya ukumkoma mfalume. 3 Mfalume kaghutsa, "Angu Modekai tsatumwing'ile ukulu wachi na tumghwekile choni kwa ichinu achino?" Iwatumighwa wake wamwidika, "Ng'atendelighwe chinu chochose baye." 4 Mfalume kaghutsa, "Pfihi kuna mkulu wowose kuna ichikuta?" Baho Hamani kengila mna ichikuta cha kunze cha ing'anda ya mfalume. Tsakatsa kwa mfalume yalombe Modekai yakomighwe mna ghumbiki ghwa ukukomela ghwayaghutengenetse. 5 Iwatumighwa wamwidika mfalume, "Hamani kabaha, kema mchikuta." Mfalume kawalongela, "Mlongeleni yengile mng'anda." 6 Hamani hayengile mng'anda, mfalume kamghutsa, "Pfihi yatendelighwe choni imunu ayula mfalume iyobama yamtende yawe mkulu?" Hamani kafikitsa mmoyo mwake, "Angu imunu ayo mfalume iyobama kumwing'a ukulu nani? Ambe nene!" 7 Apfo Hamani kamwidika mfalume, "Imunu ayo mfalume iyonoghelwa naye kumwing'a ukulu, 8 pfinogha iwatumighwa wako waghale magwanda ghayapfalagha mfalume, na falasi iyamdinagha, iyapfatsighwe litaji lya chifalume mwitwi mwake. 9 Yumwe wa iwatumighwa wako iyotegheletsighwa sideke, yampfatse imunu ayo magwanda ghako gha chifalume, kuya yamlongotse imunu ayo aku kadina ifalasi wako kubitila inzila ng'ulu ya ghumji, aku kolonga, ‘Apfi pfipfo pfayotendelighwa imunu ayula mfalume iyombama yamwing'e ukulu.’ " 10 Baho mfalume kamlaghitsa Hamani, "Tenda hima! Sola ghamagwanda agho na ifalasi, ukamtende Modekei yawe mkulu, Myahudi iyokala hana lilango lya ing'anda ya mfalume. Uleke kuleka kumtendela hata chinu chimwe mna agho ghaulongile." 11 Apfo Hamani kasola ghamagwanda agho na ifalasi, kampfatsa Modekai, kamdinitsa mchanya mwa ifalasi kamlongotsa mna inzila ng'ulu ya ghumji, akuno kolonga, "‘Apfi pfipfo pfayotendelighwa imunu ayula mfalume iyombama yamtende yawe mkulu.’" 12 Kuya Modekai koya hana lilango lya ing'anda ya mfalume. Lekeni Hamani katsumila ukaye yake, aku kana usungu mkulu na keghubika litwi lyake kwa ichinyala. 13 Ako ukaye kawapetela Zereshi mwehe wake, na sale tsake ghose ighamlawile. Zereshi na sale tsake awo wamlongela, "Ka ayuno Modekai, yuwanduse kumwinamila Myahudi, ghweghwe ng'umdaha baye, ayo katsokuhuma ghendo."

14 Hawang'ali wolonga naye, watumighwa wa mfalume wasumka ukutsa, wamsola Hamani waghenda naye kuna ichijo chayambike Esta.