1 Tsuwa lya kumi na tatu lya mwetsi ghwa kumi na mbili, ighukemighwa Adari, halipfikile litsuwa lya ukutenda ghayalaghitse mfalume, maaduwi wa Wayahudi tsawalolela kuwahuma Wayahudi, lekeni ng'aiwile apfo baye, ila Wayahudi wawahuma wawo. 2 Wayahudi wetingana hamwe mna imiji yawo ili mna imikowa yose ya mfalume Ahasuero kuwatowa awala wose iwabamile kuwakoma. Na kuduhu munu wowose iyadahile kwima yetowe nawo, kwaapfila iwanu wa tsiisi tsingi tsawawapfuka. 3 Iwakulu wose wa imikowa na pfilongotsi wa maasikali na iwakulu wa mfalume pfipfila tsawawapfila Wayahudi, kwaapfila wose tsawampfuka Modekai. 4 Modekai tsakakala munu mkulu mna ing'anda ya mfalume, na ukumanyika kwake ako tsakwenela mna imikowa yose, na ukulu wake ung'ali ukongetseka ng'ani. 5 Apfo Wayahudi wawatowa maaduwi tsawo kwa ghamapanga, wawakoma na wawatenda ka pfawabamile, awala wose iwawehile.

6 Ako kuna ingome ya ghumji ghwa Shushani, Wayahudi wawakoma wanu miya tano. 7 Pfipfila wawakoma Parishandata, Dalifoni, Asipata, 8 Porata, Adalia, Aridata, 9 Parimashita, Arisai, Alidai, na Waizata. 10 Awano tsa wana wamale kumi wa Hamani, iyakalile aduwi wa Wayahudi, imwana wa Hamedata. Hata apfo ng'awawabokile baye tsimali tsawo.

11 Litsuwa lilyo mfalume kalongelighwa iwanu iwakomighwe mna ghumji ghwa Shushani. 12 Kuya mfalume kamlongela malikiya Esta, "Mna ghumji ghwa Shushani, Wayahudi wawakoma wanu miya tano, hamwe na wana kumi wa Hamani, angu koghamba ako kuna imikowa watendiletsa! Lelo chaubama choni? Nongele chubama naghwe kutsakwing'ighwa. Nongele chinu chingi chaubama naghwe kutsotendelighwa." 13 Esta kalonga, "Ghwe mfalume, ung'ona pfinogha, ilupfi uwaleke Wayahudi iwali Shushani watende ka pfawatendile leloli. Kuya ulaghitse iwana kumi wa Hamani wakondekighwe mna imibiki ya ukukomela." 14 Naye mfalume kalaghitsa agho ghatendeke, na tangatso lilapfighwa ako Shushani. Iwana awala kumi wa Hamani wakondekighwa aku iwanu wolola. 15 Tsuwa lya kumi na nne lya ghumwetsi ghwa Adari, Wayahudi wetingana keli, wawakoma wanu wengi kubita miya ndatu mna ghumji ghwa Shushani. Lekeni ng'awawabokile baye tsimali tsawo.

16 Matsuwa ghagho Wayahudi iwakalile mna imikowa ya mfalume wetingana hamwe, wekinga waleke ukukomighwa. Wakombolighwa kulawa kwa maaduwi tsawo, na wawakoma maaduwi tsawo iwopfika elufu sabini na tano, lekeni ng'awawabokile baye tsimali tsawo. 17 Tsuwa alyo tsaliwa lya kumi na kadatu lya mwetsi ghwa Adari. Tsuwa liwinzile, lya kumi na nne, wabwihila, na walitenda litsuwa alyo liwe lya chihungo na ukudeng'elela. 18 Lekeni Wayahudi wa ghumji ghwa Shushani, pfipfila wetingana hamwe mna litsuwa lya kumi na kadatu, na lya kumi na nne, na mna litsuwa lya kumi na tano wabwihila, watenda chihungo, na wadeng'elela. 19 Apfo Wayahudi iwokala mna ipfijiji na mna imiji midodo wobwihila mna litsuwa lya kumi na nne lya mwetsi ghwa Adari ka chihungo cha ukudeng'elela, na ukwighalila tsinzawadi.

20 Modekai kaghandika aghano ghose, kuya kawaghalila tsibaluwa Wayahudi wose iwakalile mna imikowa ya mfalume Ahasuero, iwakalile habehi na iwakalile kutali. 21 Kawalaghitsa watende chihungo chila mwaka, mna litsuwa lya kumi na nne na litsuwa lya kumi na tano lya ghumwetsi ghwa Adari, 22 kwaapfila matsuwa aghano meli tsa matsuwa Wayahudi hawawahumile maaduwi tsawo. Mna ghamatsuwa agho, na mna ghumwetsi agho, usungu wawo ughaluka kuwa ndeng'elo, na pfililo pfawo pfighaluka pfiwa chihungo. Walaghitsighwa waghakumbuke ghamatsuwa agho kwa ukutenda chihungo, weghalile nzawadi tsa ipfijo na waweng'e ipfinu iwahingwa. 23 Apfo Wayahudi wetogholela ukutenda ka pfawanduse, na ka Modekai pfayawandikile. 24 Hamani mwana wa Hamedata iyelekighwe na Agagi, na iyakalile aduwi wa Wayahudi, tsakatenda tsengwe yawakome Wayahudi, pfipfila kasa Puri, kwa taghwa lingi yokemighwa simbi, ili yalole litsuwa lya ukuwahonda na ukuwakoma Wayahudi. 25 Lekeni imbuli ayo haimpfikile mfalume, kalaghitsa kwa ukwandika ibaluwa aghala ighehile Hamani ghayabamile ghawapate Wayahudi ghampate yeye imwenyegho, na iwanaghe wakomighwe kwa ukukondekighwa mna imibiki ya ukukomela. 26 Apfo waghakema ghamatsuwa agho Purimu, kulawa kuna lilonga likemighwa puri, kwa taghwa lingi simbi. Apfo kwa ibaluwa ya Modekai na aghala ghawonile iwenyegho na ighawapatile, 27 Wayahudi wachitenda ichinu acho chiwe chihendo kuna wawo, na iwana wawo, na kwa munu wowose iyelunga nawo, ka mna ghamatsuwa ighasaghulighwe, chila mwaka ghamatsuwa agho meli ghadeng'elelighwe ka pfayalaghitse Modekai. 28 Kuya wetogholela chila kaye ya Wayahudi, kulawa mweleko ghumwe mbaka mweleko ghungi, mna chila mkowa, na mna chila mji, wachikumbuke ichihendo acho cha Purimu, na wachideng'elele kwa matsuwa ghose. 29 Baho malikiya Esta neghe Abihaili hamwe na Modekai, Myahudi, wandika tsibaluwa kwa ukulu iwali nawo, waghakomangitsa ghayandike Modekai kwa tsimbuli tsa Purimu. 30 Tsibaluwa atso wandikilighwa Wayahudi wose, na tsinakala tsake tsighalighwa mna imikowa yose miya imwe na ishilini na saba ya utawala wa Ahasuero. Tsibaluwa atso tsiwabama Wayahudi wakale tseghamba. 31 Pfipfila tsibaluwa atso tsiwakomangitsa wawo na iwana wawo wakumbuke ukutenda ichihungo cha Purimu mna ghamatsuwa ghake ighasaghulighwe, ka pfawang'ali woghakumbuka ghamalaghitso gha ukufunga ukuja mna ghamatsuwa gha ukudomboketsa. Ghamalaghitso aghano ghalapfighwa na Modekai, Myahudi hamwe na malikiya Esta. 32 Lilaghitso lya Esta likomangitsa tsimbuli tsa Purimu, na lyandikighwa mna ichitabu.