1 Tsuwa lilyo, mfalume Ahasuero kamwing'a malikiya Esta mali tsose tsa Hamani, aduwi wa Wayahudi. Esta kamlongela mfalume ka Modekai tsandughu yake. Apfo kulawa litsuwa alyo, Modekai kalekelelighwa yamwone mfalume. 2 Mfalume katsula ipete yake ya ghumuhuli iyambokile Hamani, kamwing'a Modekai. Naye malikiya Esta kamsaghula Modekai yemilile tsimali tsa Hamani.

3 Kuya Esta kalonga keli na mfalume, keghwisa hasi, hana ghamaghulu gha mfalume, aku kolila, kamlomba mfalume yaghaghome aghala ighehile Hamani wa ilukolo lwa Agagi ghayabamile kuwatendela Wayahudi. 4 Mfalume kamgholosela malikiya Esta ingw'eku yake ya nzahabu, naye Esta kenuka kema hambele hake, kalonga, 5 "Ka kwakona pfinogha ghwe mfalume, naghwe ung'anitogholela, naghwe ka kwakona pfinogha ukutenda apfo, nokulomba wandike laghitso, ughaghome ighandikighwe mna tsibaluwa tsa Hamani mwana Hamedata, iyolawa mna ilukolo lwa Agagi, chayapangile yawakome Wayahudi wose mna imikowa yose. 6 Kwaapfila nidahatse kududumila ukuwona iwanu wangu wohinyighwa? Na nidahatse kuwona iwanu wangu wokomighwa?"

7 Mfalume Ahasuero kamwidika malikia Esta na Modekai, ayula Imyahudi, "Mlole, nimwing'a Esta tsimali tsa Hamani, naye ma wamkondeka kuna ghumbiki ghwa ukukomela, kwa litsengwe lyayawatendele Wayahudi. 8 Mwodaha kuwandikila Wayahudi chinu chochose chambama. Kuya mwodaha kwandika kwa taghwa lyangu na kwika ghumhuli ghwa ipete ya mfalume, kwaapfila ibaluwa ililapfighwa kwa litaghwa lya mfalume na kwikighwa mhuli ghwa ipete ya mfalume, nayo ng'aidaha kughalusighwa baye."

9 Apfo mna litsuwa lya ishilini na tatu lya mwetsi ghwa kadatu ighukemighwa Siwani, Modekai kawakema makatibu wose wa mfalume, kawalaghitsa wandike baluwa kwa Wayahudi na kwa iwakulu, watawala na iwakulu wa imikowa yose miya imwe na ishilini na saba, kwanzila India mbaka Esiopia. Tsibaluwa atso tsandikighwa chila mkowa kwa lugha yawo na ka pfawandikagha, pfipfila na kwa Wayahudi. 10 Modekai katsandika tsibaluwa atso kwa taghwa lya mfalume Ahasuero, katsika ghumuhuli ghwa ipete ya mfalume. Na iwatsighalile tsawakala watumighwa iwadinile falasi wana tsingupfu iwotsuma ng'ani.

11 Kubitila tsibaluwa atso, mfalume kawalekelela Wayahudi mna chila mji wetingane hamwe ili weyamile ugima wawo. Tsawalekelighwa kuhinyighwa, ukukoma bila kulyonela libatsi kingili lyolyose lya iwanu au isi, iliwatsila kuwatowa na tsisilaha hamwe na iwapinga na iwana wawo, na kutsiboka tsimali tsawo. 12 Ichinu acho ching'atendeke mna imikowa yose ya mfalume Ahasuero, mna litsuwa lya kumi na tatu lya mwetsi ghwa kumi na mbili ighukemighwa Adari. 13 Tsibaluwa atso ililapfighwe ka laghitso mna chila ghumkowa, tsatsighalighwa kwa chila munu mna ghumkowa, ili Wayahudi wetande kutenda aghala ka pfawabamile kutendighwa, litsuwa alyo halitsopfika. 14 Kwa laghitso lya mfalume, watumighwa iwadinile falasi wana tsingupfu iwotsuma ng'ani, tsawatsuma. Tsibaluwa atso pfipfila tsatsilapfighwa mna ingome ya ghumji mkulu ghwa Shushani.

15 Modekai hayalawile mna ing'anda ya mfalume, aku kapfala magwanda gha chifalume gha langi ya buluu na nzelu, lijoho tselu linoghile lya langi ya nzambalau, na litaji kulu lya nzahabu, iwanu wose wa ghumji ghwa Shushani wadeng'elela na watowa lukenze. 16 Apfo Wayahudi wakala na ndeng'elo, ukubweda na ukutunyighwa. 17 Mna chila mkowa na chila mji, chila hanu litangatso alyo halisomighwe, Wayahudi wadeng'elela na watenda chihungo, wabwihila, na iwanu wangi wetenda wawe Wayahudi, mana tsawawapfuka ng'ani Wayahudi.