1 Mna ghamatsuwa agho, malaika mkulu Mikaeli iyowalolesa ghoya iwanu wako katsolawila. Nawo iwanu watsoghaya ng'ani kubita matsuwa ghose ighapfosile, ahala iwanu hawanzile ukukala muisi. Lekeni mna ghamatsuwa agho chila yumwe iyandikighwe taghwa lyake mna ichitabu cha ugima katsokombolighwa. 2 Iwanu wengi iwafile watsotsilihuka, wamwenga watsakuwa na ugima wa matsuwa ghose ing'aghohupa, na wamwenga watsopata chinyala na watsobetsighwa matsuwa ghose ing'aghohupa. 3 Awala wana ihekima watsong'ala ka pfaling'ala lilanga, na awala iwowalongotsa iwanu wengi ukutenda ihaki, watsong'ala ka tsinondo matsuwa ghose ing'aghohupa. 4 Lekeni ghweghwe Danyeli ugheke mmoyo ghamalonga aghano, na uchike muhuli ichitabu mbaka ghamatsuwa gha ukutsigha ghapfike. Na iwanu wamwenga watsotsuma akuno na akuno ili wamanye ighatsolawila. 5 Kuya nene Danyeli tsandola, niwaona wanu wangi weli wema mmbalimbali mwa ghumto, yumwenga kema ubali auno, na yungi kema ubali ungi. 6 Munu yumwe kamghutsa imunu ayula iyapfalile tsinguwo tsinzelu iyemile mchanya mwa ghumto, "Angu ipfinu apfino pfa ukukangawatsa pfitsokala apfino mbaka tsuwachi?" 7 Imunu ayula iyemile mchanya mwa ghamatsi gha ghumto iyapfalile tsinguwo tsinzelu kenula ghamoko ghake kulanga kelaha kwa ayula iyali mgima ghamatsuwa ghose kalonga, "Itsakuwa miyaka midatu na miyetsi sita haghotsomala ghamaghayo gha iwanu iwelile, baho aghano ghose haghotsotimila." 8 Tsanihulika lekeni tsasimanyile baye. Apfo nighutsa, "Mndewa wangu, aghano haghotsomala itsakuwatse?"

9 Naye kanyidika kalonga, "Danyeli uka ahano, kwaapfila imbuli aino ipfisika ghendo, na ikighwa muhuli mbaka matsuwa gha ukutsigha ghapfike. 10 Wanu wengi watsodeghetetsighwa, watsohopfughighwa na watsotendighwa wele. Lekeni iwanu iwehile watsoghendelela ukutenda ghehile, na mna wawo kuduhu hata yumwe iyatsomanya chayotenda Imulungu, ila iwanu wana ihekima wawo iwotsomanya.

11 "Kulawa hawatsotenda tsinambiko tsa ukulakatsighwa tsileke ukughendelela mbaka ukutenda ing'anda ya Imulungu ihe, itsakuwa matsuwa elufu imwe, miya mbili na tisini. 12 Katsobweda gheno imunu ayula iyobetetsa mbaka matsuwa elufu imwe, na miya tatu na selasini na tano ghatimile.

13 "Lekeni ghweghwe Danyeli ghenda ukabwihile, matsuwa agho haghatsopfika ghweghwe kutsotsilihuka na kutsopata ghweko lyako."