1 Nene mfalume Nebukadineza nomwandikilani iwanu wa ghamakabila ghose, iwanu wa tsiisi tsose, na iwanu wa lugha tsose iwokala muisi yose, nolonga mkale tseghamba. 2 Nene mbona pfinogha niwalongele ipfitango na ipfinu pfa ukukangawatsa pfayanitendele Imulungu iyali kuchanya ng'ani. 3 Pfitango pfake pfikulu na ipfinu pfake pfa ukukangawatsa napfo pfikulu ng'ani! Ufalume wake wokala matsuwa ghose ing'aghohupa, na ukulu wake wokala kulawa lweleko lumwe mbaka lweleko lungi. 4 Nene Nebukadineza tsanikala mna ing'anda yangu ya ufalume aku niyanzala na nobweda. 5 Haniwasile mwisatsi mwangu nilota ndoto initendile nipfuke, ghamawatso na ghamaono ighakalile mwitwi mwangu ghanitenda nyalangule. 6 Apfo nilaghitsa iwanu wose wa Babeli wana ihekima waghalighwe hambele hangu ili wanongele indoto aila ilonga choni. 7 Baho wengila iwaghanga, iwahawi, Wakalidayo, na awala iwotabili kwa kulola tsinondo, na niwasimlila indoto yangu lekeni ng'awadahile baye ukunongela ilonga choni. 8 Kuya katsa Danyeli iyakemighwe Beliteshaza, litaghwa lya imulungu wangu, na mghati mwake yokala loho ya imilungu iyelile, na nene nimsimlila indoto aila, nilonga, 9 Ghwe Beliteshaza yuli mkulu wa iwaghanga, nomanya ka iloho ya imilungu iyelile ya mghati mwako, wala kuduhu imbuli ipfisika kuna ghweghwe. Unongele indoto yangu yanilotile na choni chailonga. 10 Indoto yanilotile haniwasile mlusatsi mwangu ikala apfino, haghati ghati ha isi mbona mbiki mtali ng'ani. 11 Ghumbiki agho ghukula na ghuneneha, utali wake upfika mbaka kulanga, na ghung'ali ghukoneka chila hanu mna isi yose. 12 Imitsani yake tsaidegheta, ghukala na matunda mengi ighaweneletse iwanu wose. Ghuweng'a chimbeho iwanyama wose wa kubagho, na wapfideghe wa kulanga wang'ali wokala mna ghamaputila ghake. Pfilumbe pfose tsapfipata ichijo kulawa kuna ghumbiki agho.

13 "Mna ghamaono ghambonile haniwasile mlutsatsi mwangu, mbona malaika iyelile kohulumka kulawa kulanga, 14 kakemelela kalonga, ‘Ghukaneni ghumbiki aghuno na mghasangule ghamaputila ghake, muhulule imitsani yake na ghamatunda ghake mghapwililise, wanyama wali hasi ha ghumbiki agho watsume woke, na wapfideghe wali mna ghamaputila ghake waghuluke woke. 15 Lekeni mchileke ichisiki cha lisina lyake mna lidongo aku chohighwa kwa tsipingu tsa chuma na shaba mna imitsani mibisi ili mlukonde.

"‘Chilekeni chipate ghamatsi kwa litungwe lya kulanga, chilekeni chikale hamwe na iwanyama wa kubagho hamwe na imitsani ili muisi. 16 Ghumoyo ghwake ghughaluke ghuleke kuwa moyo ghwa imunu, ila yeng'ighwe moyo ghwa mnyama, na yakale pfipfo mbaka ipfike miyaka saba. 17 Malaika wawo iwahighile apfino, na iwelile wawo iwalamle apfino, ili iwanu wose wamanye ka Imulungu iyali kuchanya ng'ani yuyo iyotawala mna tsifalume tsa iwanu, naye komwing'a ufalume imunu wowose iyombama, kuya komtenda imunu iyali nyondenyonde yautawale.’

18 "Aino iyo indoto yanilotile nene mfalume Nebukadneza." "Lelo ghweghwe Beliteshaza nongele ilonga choni, kwaapfila iwanu wana ihekima iwali mna ufalume wangu wose ng'awodaha baye kunilongela, ila ghweghwe kodaha kwaapfila iloho ya imilungu iyelile yokala mghati mwako."

19 Baho Danyeli iyakemighwe Beliteshaza tanu kakangawala na kengila wogha. Mfalume kamlongela, "Ghwe Beliteshaza indoto aino, wala mana ya indoto ileke kukutenda ukangawale!"

Beliteshaza kedika, kalonga, "Ghwe Imndewa wangu ng'apfu indoto aino iwapate awala iwokwihila, na mana ya indoto iwapate maaduwi tsako. 20 Ghumbiki mkulu aghula na ghumkomu ghwaughonile, na utali wake upfikile mbaka kulanga, na ighoneke chila hanu musi, 21 ghukalile na imitsani yake ideghete na matunda mengi gha ukweneletsa iwanu wose, na hasi hake iwanyama wapata chimbeho, na mna ghamaputila ghake wang'ali wokala wapfideghe wa kulanga.

22 "Ghwe mfalume ghweghwe yuyo mbiki aghula, ighukulile na kuwa na ngupfu, na ukulu wako upfika mbaka kulanga, na utawala wako wenela mna isi yose. 23 Kuya, ghwe mfalume, kwaapfila tsakumwona imkalitsi kulawa kulanga kohulumka, kolonga, ‘Ghukaneni ghumbiki aghuno na kughuhinya, lekeni mchileke ichisiki imitsitsi ya lisina lyake mna lidongo aku chohighwa kwa pingu ya chuma na shaba mna imitsani mibisi ili mlukonde, chipate ghamatsi kwa litungwe lya kulanga, chilekeni chikale hamwe na iwanyama wa kubagho mbaka ibite miyaka saba.’

24 "Lelo, ghwe mfalume aino iyo mana ya indoto yako, ka apfila Imulungu mkulu yali kuchanya ng'ani pfayalaghitse ikulawile ghweghwe mndewa wangu mfalume. 25 Ghweghwe kutsowingighwa ughende kutali na tsikaye tsa iwanu! Kutsokala na iwanyama wa kubagho, na kutsonanayitsighwa uje imitsani ka ing'ombe, naghwe kutsopfulumka kwa litungwe lya kulanga. Kutsokala pfipfo kwa miyaka saba, mbaka hautsomanya ka Imulungu mkulu iyali kuchanya ng'ani yuyo iyotawala mna tsifalume tsose tsa iwanu, naye komwing'a ufalume imunu wowose iyombama. 26 Na kwaapfila tsawalaghitsa wachileke ichisiki cha lisina lyake, ufalume wako utsakuwa na ngupfu ahala hautsomanya ka Imulungu iyali kuchanya yuyo iyotawala. 27 Lelo ghwe mfalume utegheletse na utoghole chanilonga, uleke tsinzambi tsako, utende aghala ighali gha haki, uleke kutenda ighehile, uwonele libatsi iwanu wahingwa songaha ghamatsuwa ghako gha ukubweda ghatsakongetsighwa."

28 Agho ghose ghamlawila mfalume Nebukadneza. 29 Haipfikile miyetsi kumi na mili, mfalume Nebukadneza yang'ali yakwanga mchiswili cha ing'anda ya chifalume chikalile ka chibwalu ili mna ghumji ghwa Babeli. 30 Mfalume kalonga, "Ng'ambe ghumji aghuno mkulu ghwa Babeli ghwanitsengile kwa ngupfu tsangu ghuwe kaye yangu ya chifalume ili ufalume wangu utunyighwe!"

31 Ng'ana yamalitse ukulonga apfo, kahulika litsi kulawa kulanga, lilonga, "Ghwe mfalume Nebukadneza, aghano igholongighwa kolongelighwa ghweghwe! Ghweghwe kubokighwa ufalume wako! 32 Ghweghwe watsokuwinga ughende kutali na iwanu! Kutsokala hamwe na iwanyama wa kubagho, na kutsakuja imitsani ka ng'ombe! Kutsokala pfipfo kwa miyaka saba mbaka hautsomanya ka Imulungu mkulu iyali kuchanya ng'ani yuyo iyotawala mna tsifalume tsa iwanu, naye komwing'a ufalume imunu wowose iyombama."

33 Baho imbuli ayo itimila, Nebukadneza kawingighwa yaghende kutali na iwanu, yang'ali yakuja mitsani ka ng'ombe. Na ilukuli lwake lupfulumka kwa litungwe lya kulanga, hata tsimvili tsake tsikula na tsidimka ka mighala ya magengele, na tsinumba tsake ka tsa chideghe.

34 "Imiyaka ila saba haimalile, nene Nebukadneza nyinula tsinenge nilola kulanga, na baho tsimbutsi tsangu tsimbuyila. Tsanimlongela mighede Imulungu iyali kuchanya ng'ani yokala matsuwa ghose ing'aghohupa.

Ukulu wake wokala matsuwa ghose,

na ufalume wake wokala lweleko mbaka lweleko.

35 Na iwanu wose iwokala muisi wakoneka si chinu baye,

naye kotenda ka pfayobama kuna ipfiumbe wa kulanga na iwanu iwokala muisi.

Haduhu munu iyodaha kumghoma ukutenda chinu,

wala iyodaha kumghutsa chotenda.

36 "Baho tsimbutsi tsangu tsimbuyila, na nibokela keli ukulu wangu ka mfalume, apfo iwanu wanza kunitunya ka mfalume mkulu, iwashauli wangu na pfilongotsi wangu wakulu watsa kunibama na mbuyitsighwa mna ufalume wangu, na nene tsa niwa mkulu kubita aho mwanduso.

37 "Lelo nene Nebukadneza nomtunya na nomtegheletsa mfalume wa kulanga. Kwaapfila ghamatendo ghake ghose gholongesa na tsinzila tsake tsigholoka na kowahulumsa hasi awala iweghoda."