1 Mna ghumwaka ghwa kadatu Yehoyakimu hayakalile mfalume wa Yuda, Nebukadneza mfalume wa Babeli kaghenda na maasikali wake kughutsingila ghumji ghwa Yerusalemu yaghutowe. 2 IMNDEWA kamleka Yehoyakimu mfalume wa Yuda yaghoghighwe na mfalume Nebukadineza, hamwe na ipfinu pfa ing'anda ya Imulungu, naye kaghenda napfo mbaka kuna isi ya Shinari. Kuko kapfingitsa ipfinu apfo kuna ing'anda ya ukwikila ipfinu pfa Imulungu wake. 3 Kuya mfalume kamlongela Ashipenazi, imkulu wa iwanu wa ing'anda ya chifalume yawasaghule iwana wamale wa Isiraeli iwolawa mna tsikolo tsa chifalume, na mna tsikolo tsa iwanu iwomanyika. 4 Iwana awo waleke kuwa na chilema, wawe na pfihanga pfinoghile, na ihekima, na tsimbutsi, ili wadahe kwima mna ing'anda ya mfalume. Kuya kamlongela yawalangulitse ukwandika na kuisoma ilugha ya Wakalidayo. 5 Imfalume ayo kalaghitsa iwana awo weng'ighwe ichijo chayakuja yeye imwenyegho, na weng'ighwe idipfai iyakunwa yeye imwenyegho, tsawabamighwa wafundighwe kwa miyaka midatu, hawomalitsa waghende wakamsang'anile mfalume. 6 Mna iwana awo iwasaghulighwe mumo tsamna iwana wa kabila lya Yuda iwakemighwe, Danyeli, Hananiya, Mishaeli na Azaria. 7 Imkulu wa iwanu wake iwasaghulighwe tsakaweng'a mataghwa ghangi, Danyeli kamkema Beliteshaza, Hananiya kamkema Shedraki, Mishaeli kamkema Meshaki, na Azaria kamkema Abedinego. 8 Lekeni Danyeli kepfikitsa mna ghumoyo ghwake yaleke ukwitenda yehe kwa ukuja ichijo cha mfalume na ukunwa idipfai ya mfalume, apfo kamlomba Ashipenazi yaleke ukumwing'a. 9 Apfo Imulungu kamtenda Ashipenazi imkulu wa iwanu iwomsang'anila mfalume yamwonele libatsi na yamtogholele Danyeli. 10 Imkulu wa ipfilongotsi kamlongela Danyeli, "Nene nompfuka imkulu wangu mfalume, iyalaghitse ichijo chenu na idipfai yenu, hebali yapfone ipfihanga pfenu ng'apfideghete baye ka ipfihanga pfa iwasongolo wayenu? Ukutenda apfo mtsonihonza nene nikomighwe na mfalume". 11 Baho Danyeli kamlongela imunu iyowemilila, iyekighwe na chlongotsi mkulu yawemilile yeye Danyeli, Hananiya, Mishaeli na Azaria, 12 "Utughetse twetwe watumighwa wako kwa matsuwa kumi, kwa kutwing'a tsimboghambogha tuje na ghamatsi tunwe." 13 Kuya upfilinge ipfihanga pfetu na ipfihanga pfa iwasongolo awala iwakuja ichijo cha mfalume, na baho ulamle ka apfila pfautsakona. 14 Naye kawatogholela, kawaghetsa kwa matsuwa kumi. 15 Haghamalile matsuwa kumi, ipfihanga pfawo pfoneka pfidedemka na ng'uli tsawo tsidegheta kubita iwasongolo wose iwajile ichijo cha mfalume. 16 Baho imwimilitsi ayula ng'aweng'ile baye ichijo chawalaghitsighwe waje, na idipfai iyawalaghitsighwe wanwe, kaweng'a tsimboghambogha tsiliyeka. 17 Apfo iwasongolo awo wane Imulungu kaweng'a tsimbutsi, ihekima na ukusoma na ukwandika. Naye Danyeli yang'ali yomanya ghamaono ghose na tsindoto. 18 Ghamatsuwa aghala ghayalaghitse mfalume gha ukuwaghala hambele hake haghamalile, ichilongotsi mkulu wa awala iwasang'ane kwa mfalume kawaghala iwasongolo wose hambele ha mfalume Nebukadneza. 19 Naye mfalume kalonga nawo, na mna wose awo kuduhu iyeghalile na Danyeli, Hananiya Mishaeli na Azaria, apfo watogholighwa kumsang'anila mfalume. 20 Na mna chila chinu cha ihekima na ukumanya chayawaghutsile mfalume, kawona wanogha mala kumi kubita iwaghanga na wahawi wose iwakalile mna ufalume wake. 21 Naye Danyeli kaghendelela kusang'ana kuna ing'anda ya mfalume mbaka ghumwaka ghwa kwanza ghwa ukutawala mfalume Koreshi.