1 Mfalume Dario kona pfinogha yasaghule maliwali miya na ishilini ili wamwapfile mna ufalume wake wose. 2 Pfipfila kawasaghula iwakulu wadatu, naye Danyeli tsa yumwe wa iwakulu awo, wawo wawemilitse iwakulu awala ili chila chinu chitendeke ghoya. 3 Matsuwa chidogho hambele Danyeli koneka kosang'ana pfinoghile kubita iwakulu wemilitsi na kubita iwakulu awala wose kwaapfila iloho iyelile tsaikala mghati mwake. Apfo mfalume kamtenda yawe mkulu mna ufalume wose. 4 Baho iwakulu awala na iwemilitsi wabama nzila ya ukumpfughulila ghomba Danyeli kwa tsisang'ano tsake tsayang'ali yotenda lekeni ng'awapatile baye. Danyeli tsakakala kahela totso, wala ng'atendile chinu chochose chihile baye kwaapfila yeye tsakakala munu wa ukutogholighwa. 5 Baho iwanu awala walonga, "Ng'atudaha baye kupata nzila yoyose ya ukumpfughulila ghomba Danyeli, ila tulole mna ghamalaghitso ighoghomighwa gha Imulungu wake." 6 Apfo iwakulu awala na iwemilitsi wamghendela mfalume walonga, "Ghwe mfalume Dario, Imulungu yakwike, ukale matsuwa ghose! 7 Twetwe, wemilitsi, maliwali, walamlitsi na iwakulu wa isi twilaghana apfino, twakona pfinogha ulapfe laghitso na chila munu yalikinde. Naghwe ulaghitse apfino, Kwa matsuwa selasini kuleke kuwa na munu wowose yatsolekelelighwa yalombe chinu kwa Imulungu au kwa munu wowose ila yakulombe ghweghwe. Imunu wowose ing'ayokinda lilaghitso alyo katsakwasighwa mna lipondo lya simba. 8 Lelo ghwe mfalume wandike lilaghitso alino, na wike ghumuhuli ghwa litaghwa lyako, nalyo litsakuwa laghitso lya Wamedi na Waajemi, na laghitso alyo likaleghe pfipfo." 9 Baho mfalume Dario keka ghumhuli kwa litaghwa lyake. 10 Danyeli hayatangile ka lilaghitso alila lilapfighwa, koya ukaye yake kuna ichiheleto chake china ghamadilisha ighalolile Yerusalemu. Danyeli ka pfayatendagha, katowa magoti mala ndatu kamlomba Imulungu wake na kulonga mighede. 11 Baho iwanu awala wetingana hamwe, wengila mng'anda, wampfika Danyeli komlomba Imulungu wake. 12 Kuya wose waghenda kwa mfalume Dario walonga imbuli ya lilaghitso lya mfalume, "Ghwe mfalume, ng'ambe tsakulaghitsa kwa matsuwa selasini imunu wowose yatsomlomba chinu Imulungu au imunu na si kuna ghweghwe baye, imunu ayo katsakwasighwa mna lipondo lya simba?"

Naye kedika kalonga, "Ona, apfo pfipfo pfaili. Alyo laghitso iliwalongotsa Wamedi na Waajemi, nalyo litsokala pfipfo."

13 Nawo wamlongela mfalume, "Danyeli, yumwe wa awala iwahamile kulawa isi ya Yuda ng'okutegheletsa baye, wala ng'okinda baye lilaghitso lyawikile, naye kolomba mala ndatu kwa chila tsuwa." 14 Mfalume hayahulike agho kaghanzika ng'ani mna ghumoyo ghwake, naye kabama yamkombole Danyeli, kefikitsa yatende choni ili yamkombole mbaka litsuwa lihonga. 15 Baho iwanu awala wetingana na waghenda hamwe kwa mfalume Dario wamlongela, "Ghwe mfalume, umanye ka malaghitso ghoghose au imiko yoyose ya Wamedi na Waajemi ikwikighwa na mfalume kuduhu munu iyodaha kuighalusa."

16 Baho mfalume Dario kalaghitsa wamghale Danyeli, nawo wamghala wamwasa mna lipondo lya simba. Mfalume kamlongela Danyeli, "Imulungu wako yumsang'anila matsuwa ghose katsokukombola." 17 Nawo wasola libwe walika mchanya mwa lipondo. Naye Mfalume keka muhuli ghwake imwenyegho, na mihuli ya iwakulu wake, ili haleke kuwa na munu wa ukumkombola Danyeli. 18 Kuya mfalume kaghenda kuna ing'anda yake ya chifalume, ako kakala meso, ng'ajile baye wala kunwa chochose, wala ng'atendile ichihungo chochose baye. 19 Nemitondotondo mfalume Dario katsuma kaghenda kuna lipondo lya simba. 20 Hayapfikile habehi na lipondo kamkema Danyeli kwa usungu, "Danyeli, mtumighwa wa Imulungu iyali mgima! Pfihi Imulungu wako yumsang'anila matsuwa ghose kakukombola na iwasimba awano?" 21 Danyeli kamwidika "Ghwe mfalume Imulungu yakwike ukale matsuwa ghose! 22 Imulungu wangu katuma malaika wake waidiwa imilomo ya simba, nawo ng'awandaghile baye, katenda apfo kwaapfila sitendile chochose chihile kuna yeye, wala kuna ghweghwe." 23 Bahala mfalume kadeng'elela ng'ani, kalaghitsa Danyeli yalapfighwe mna lipondo. Nawo wamlapfa, naye Danyeli ng'alaghike hata chidogho kwaapfila tsakehuwila Imulungu wake. 24 Mfalume kalaghitsa iwanu awala iwampfughulile ghomba Danyeli waghoghighwe, nawo wasighwa mna lipondo lya simba hamwe na wapinga wawo na iwana wawo. Ng'ana wapfike hasi baye ha lipondo alila, simba wawatsahulatsahula na wabenabena imipate yawo.

25 Baho mfalume Dario kawandikila iwanu wa kabila tsose, iwanu wa isi tsose, na iwanu wa lugha tsose,

Mkale tseghamba! 26 Nene nolaghitsa apfino, "Mna ufalume wangu iwanu wose wampfuke na wamtegheletse Imulungu wa Danyeli.

Yeye yuyo Imulungu iyali na ugima,

kokala matsuwa ghose,

kuduhu munu iyodaha kuhinya ufalume wake,

na utawala wake wokala matsuwa ghose.

27 Yeye kohonetsa na kokombola,

kotenda pfihulo na pfinu pfa kukangawatsa kulanga na muisi.

Yeye kamkombola Danyeli hayang'ali yobama ukukomighwa na simba."

28 Apfo Danyeli tsakakala kwa ukubweda mna ghamatsuwa ghayatawale mfalume Dario, na mfalume Koreshi wa Uajemi.