1 Chilo chimwe mna ghumwaka ghwa keli ghwa utawala wake, mfalume Nebukadneza kalota ndoto, na indoto ayo imtenda yalangule mbaka ng'adahile ukuwasa baye. 2 Kuya mfalume kawakema iwaghanga, iwahawi, iwotabili kwa kulola tsinondo na Wakalidayo, watse wamlongele indoto yake ilongatse. Wose watsa wema hambele hake. 3 Mfalume kawalongela, "Nene nilota ndoto, nayo yonitenda nyalangule ng'ani, apfo nobama nimanye ilongatse." 4 Nawo wamlongela mfalume kwa lugha ya chiaramu, "Imulungu yakwike, ghwe mfalume! Tusimlile indoto yako natwe watumighwa wako tutsokulongela ilonga choni." 5 Mfalume kawalongela, "Nene nolonga ghendo, ka ng'amnongela baye indoto yanilotile, na chailonga choni mtsokanighwa pfihande pfihande na tsing'anda tsenu tsitsomwaghighwa. 6 Lekeni mng'anilongela indoto ayo na choni chailonga, nitsomghwekani, nitsowaliha na nitsowatenda mtunyighwe. Lelo nongeleni indoto ayo na achila chailonga." 7 Nawo wamwidika lwa keli walonga, "Mfalume tulongele indoto ayo natwe watumighwa wako tutsokulongela pfailonga." 8 Mfalume kedika kalonga, "Nomanya ghendo ka mwemwe mwobama mwongetsighwe ghumuda kwaapfila mwomanya achila chanilamle, 9 ka ng'amnilongela indoto yangu, wose mtsohighighwa lumwe. Mwemwe mwilaghana mnibughe na mnighutsukile aku mwofikitsa chanilamle chitsoghalambuka, lelo nilongeleni indoto ayo, na nene nitsomanya ka mwodaha kunilongela chailonga choni." 10 Wawo wamwidika mfalume walonga, "Kuduhu imunu wowose mna isi iyodaha kutenda chaubama ghweghwe mfalume. Pfipfila kuduhu mfalume wowose, hata yang'awa mkulu pfihi, au hata yang'awa na ngupfu yachi iyadahile kuwaghutsa imbuli ka ayo iwaghanga, iwahawi, iwotabili kwa kulola tsindoto na Wakalidayo. 11 Ghwe mfalume, imbuli yughutsa ng'aidahika baye, kuduhu imunu iyodaha kukulongela ila imilungu iliyeka ing'aikala hamwe na iwanu." 12 Mfalume hayahulike apfo kona maya ng'ani, na kaghudubuka, apfo kalaghitsa iwanu wose wa Babeli wana ihekima wakomighwe. 13 Baho lilaghitso lya ukuwakoma iwanu wose wana ihekima, lyenela muisi yose. Na iwanu watumighwa wawabame Danyeli na wayaghe wakomighwe.

14 Kuya Danyeli kamghendela Arioko, imkulu wa iwakalitsi wa mfalume, iyalaghitsighwe yawakome iwanu wana ihekima wa Babeli, kalonga naye kwa hekima na ukwalangitsa. 15 Kamghutsa Arioko, imkulu wa iwakalitsi wa mfalume, "Heule mfalume iyalapfile laghitso kali apfino?" Baho Arioko kamsimlila Danyeli ghose ighalawile. 16 Kuya Danyeli kamghendela mfalume kamlomba yabete chidogho, naye katsomlongela mfalume pfailonga indoto. 17 Kuya Danyeli hayoyile ukaye kawalongela imbuli ayo wayaghe tsina Hanania, Mishaeli na Azaria imbuli ayo, 18 kawalongela wamlombe Imulungu wa kulanga yawonele libatsi kwa imbuli ayo, ili Danyeli na wayaghe waleke ukukomighwa hamwe na wana ihekima wa Babeli. 19 Chilo chicho Imulungu kamghubulila Danyeli indoto ya mfalume mna ghamaono. Naye Danyeli kamtunya Imulungu wa kulanga, 20 kalonga, "Taghwa lyake Imulungu litunyighwe matsuwa ghose ing'aghohupa kwaapfila ihekima na ingupfu pfose pfake yeye. 21 Yeye kolongotsa ghamatsuwa na imisimu, kowalapfa iwafume na koweka iwafalume, koweng'a ihekima awala wana ihekima, na awala iwomanya kowongetsela ukumanya. 22 Yeye koghubula ipfinu ipfipfisike, na ipfili pfikomu kumanyika, komanya aghala ighali mchisi, na yeye kokala mna ghumwanga. 23 Nolonga mighede na kukutunya Imulungu wa iwahenga wangu, kungaya ihekima na ingupfu, kunitenda nimanye achila chatukulombile ghweghwe, kwaapfila kutulangusa imbuli aila ya mfalume."

24 Kuya Danyeli kamghendela Arioko, iyalaghitsighwe na mfalume yawakome wana ihekima wa Babeli kamlongela, "Uleke kuwakoma iwanu wa Babeli wana ihekima, unighale nene hambele ha mfalume, na nene nitsomlongela indoto ilongatse." 25 Baho Arioko kamghala himahima Danyeli hambele ha mfalume, kamlongela, "Nimpata munu yumwe mna iwana wa Yuda iwahamishighwe ahano Babeli iyodaha kukulongela indoto ilongatse."

26 Mfalume kamghutsa Danyeli pfipfila iyakemighwa Beliteshaza, "Pfihi kodaha kunilongela indoto yanilotile na mana yake?"

27 Danyeli kamwidika mfalume, kalonga, "Kuduhu wana ihekima, wala iwahawi, wala iwaghanga, wala iwotabili kwa ukulola tsinondo iyodaha kulonga chayaghutsile mfalume. 28 Lekeni kulanga kuna Imulungu iyoghubula tsimbuli itsipfisike, naye kamlangusa mfalume Nebukadneza ighatsolawila hambele, indoto na ghamaono ighakalile mwitwi mwako ghawonile mwisatsi aghano ahano.

29 "Ghwe mfalume, hauwasile mwisatsi mwako tsakulota ipfinu ipfitsolawila hambele, naye Imulungu iyoghubula tsimbuli itsipfisike, kakulangusa aghala ighatsolawila. 30 Lekeni nene sighubulilighwe baye imbuli aino ipfisike ka apfila nina hekima kubita iwanu wangi, ila nighubulighwa ili ghweghwe mfalume umanye indoto yako ilongatse, na umanye aghala ghaung'ali ukwalangula mna ghumoyo ghwako.

31 "Ghwe mfalume, haung'ali ulota tsakwona chinyagho chikulu, na ichibitilitse, chima hambele hako, nacho ching'ali chimeletseka ng'ani na ung'achilola choghuma wogha. 32 Litwi lya ichinyagho acho tsalikala lya inzahabu inoghile, imambagha yake na ghamoko ghake tsapfikala pfa fetsa, na lida lyake na ichuno chake tsa pfa shaba, 33 Ghamaghulu ghake tsaghakala gha chuma, na matsayo ghake ghahanganyighwa kwa chuma na dongo lya widi. 34 Haung'ali ulola, kwona libwe libuka lyenyegho kulawa kuchidunda bila imunu kulidonza, na ilibwe alyo litowa ghamaghulu gha ichinyagho ighakalile gha chuma na lidongo lya widi, lichibena ichinyagho acho pfihande pfihande. 35 Bahala ichuma achila, na lidongo lya widi, na ishaba, na ifetsa na inzahabu, pfose pfibeneka pfihande pfihande, pfiwa ka ng'umvi hanu ha ukubetela mna chipindi cha chiyangatsi, libeho lipfighulusa kutali wala ng'achikalile baye hata chihande chimwe. Na libwe alila libenile ichinyagho achila liwa dunda kulu, na limemesa isi yose.

36 "Ghwe mfalume, aino iyo indoto yako. Lelo tutsokulongela mana yake choni. 37 Ghweghwe kwa mfalume wa wafalume! Imulungu wa kulanga kakwing'a ufalume, uwetso, ingupfu na utunitso! 38 Kakutenda uwatawale iwanu wose, wanyama wa kubagho na wapfideghe wose wa kulanga, wose kaweka mmoko mwako, na kakutenda uwatawale wose kokose akula kwawokala. Ghweghwe kwa litwi alila lya inzahabu! 39 Ung'alawa ghweghwe utsakutsa ufalume ungi, lekeni ufalume awo utsakuwa wahela ngupfu ka wakwako. Hambele utsakutsa ufalume wakadatu, ufalume wa ishaba, nawo utsotawala isi yose. 40 Kuya utsakutsa ufalume wakane, awo una ngupfu ka ichuma. Ka apfila ichuma pfachihondahonda na kubenabena chila chinu, pfipfo ufalume awo pfautsobenabena na kupfulugha chila chinu ichitendeke mna tsifalume tsifosile. 41 Pfipfila tsakwona ghamatsayo na ipfidole pfa ichinyagho acho, pfifinighwa chidogho kwa chuma, na chidogho kwa dongo lya widi. Apfo ufalume awo utseghola, lekeni chidogho utsakuwa na ngupfu ka tsa chuma, kwaapfila ichuma tsachihanganyika na lidongo lya widi. 42 Ka apfila ipfidole pfake pfa mmaghulu tsapfifinighwa kwa ukuhanganya chidogho chuma na chidogho lidongo lya widi, pfipfo ufalume awo chidogho utsakuwa na ngupfu na chidogho utsakuwa wahela ngupfu. 43 Ka apfila pfawonile ichuma pfachihanganyike na lidongo, iwanu wa ufalume awo watsehanganya kwa ukuwakwela iwanu wa isi tsingi, lekeni ng'awatsodaha baye ukuwa chinu chimwe, ka apfila ichuma pfang'achidaha baye kuwa chinu chimwe na lidongo. 44 Mna ghamatsuwa gha iwafalume awo, Imulungu wa kulanga katsakwimisa ufalume ungi, ufalume awo ng'autsohinyighwa baye, wala iwanu wa isi tsingi ng'awatsouboka baye, lekeni ufalume awo utsobenabena tsifalume atso tsose, nawo utsokala matsuwa ghose ing'aghohupa. 45 Ka apfila pfawonile libwe libuka lyenyegho bila imunu kulidonza, na ilibwe alyo libena chinyagho ichifinighwe na ichuma, ishaba, lidongo lya widi, ifetsa na nzahabu, lelo Imulungu iyali mkulu kakughubulila aghala ighotsolawila hambele. Aino iyo indoto yako ghendo nayo yolongesa."

46 Baho mfalume Nebukadneza kamwinamila Danyeli mbaka uhanga udonza hasi, kalaghitsa wamlapfile tsiinambiko na wamdusulile ubani unung'ila ghoya. 47 Mfalume kamlongela Danyeli, "Imulungu wenu yuyo Mulungu wa milungu yose na Mndewa wa iwafulume, yeye kodaha kughubula aghala ighapfisike, kwaapfila ghweghwe kudaha kunighubulila imbuli aino ipfisike." 48 Kuya mfalume Nebukadneza kamtunitsa Danyeli, kamwing'a nzawadi nyingi na ng'ulung'ulu, na kamwika yawe mtawala wa ghumkowa ghose ghwa Babeli na mkulu wa iwanu wana ihekima wose wa Babeli. 49 Naye Danyeli kamlomba mfalume yaweke Shedraki, Meshaki na Abedinegho wawe pfilongotsi wakulu mna ghumkowa ghwa Babeli, naye mfalume kamtogholela, lekeni yeye Danyeli kaghendelela ukukala mna ing'anda ya chifalume.