1 Mna ghumwaka ghwa kwanza mfalume Belishaza hayanzile kutawala ghumji ghwa Babeli, Danyeli hayawasile mwisatsi mwake kapata maono na kalota ndoto. Naye kaghandika aghala ghayonile mna indoto yake.

2 Mna ghamaono ghangu nechilo mbona libeho kulawa chila ubali lyoduma kwa ngupfu mna ibahali ng'ulu. 3 Baho wanyama wakulu wane wakali walawa mna ibahali, chila yumwe ng'eghalile na miyaghe baye. 4 Imnyama wa kwanza keghala na simba, tsakana mapamanilo ka magengele. Haning'ali nimlola mapamanilo ghake ghakusuka, naye kema kwa maghulu meli ka munu. Kuya keng'ighwa ghumoyo ghwa munu.

5 Imnyama wa keli keghala na imyama iyokemighwa dubu, ubali wake umwe tsawinuka, na mipate midatu ya tsimbapfu tsaikala mna ghamatsino ghake, wamlongela, "Lelo winuke uje inyama mbaka wighute."

6 Kuya hambele hangu mbona mnyama yungi, naye keghala na chui, mna ghumghongo ghwake tsakana mapamanilo ka gha chideghe, imnyama ayo tsakana matwi mane, naye keng'ighwa tsingupfu tsa ukutawala.

7 Kuya mna indoto ayo nimwona mnyama wa kane, naye tsakana ngupfu ng'ani na ung'amlola kokughela wogha na kokutenda upfuke, ayo tsakana matsino makulu gha chuma, yang'ali yakuja na ukubenabena pfihande, na ipfijo ipfikalile yang'ali yopfibayughabayugha kwa maghulu ghake. Yeye ng'eghalile na awala wadatu baye, naye tsakana membe kumi. 8 Haning'ali nilola tsimembe atso, niyona membe ingi ndodo ilawilila mna tsimembe atsila kumi, ili imembe ayo ipate hanu ha ukukala, membe ndatu tsing'olighwa, Imembe ayo tsaina nenge ka tsa munu, na mlomo ghwake ghung'ali ghulonga kwa maghodo.

9 Haning'ali nighendelela ukulola, mbona ipfighoda pfa ufalume pfikighwa hanu aho, na baho tsakakala mnzehe yumwe iyakali miyaka mingi ya ghumwande iyapfalile nguwo nzelu chwee, na tsimvili tsake tsa nzelu ka sufu, ichighoda chake tsa imilambi ya ghumoto, na mataili ghake ghose ghakala gha moto ighukwaka. 10 Hana ichighoda acho gulawila mto ghwa moto ghubita hambele hake. Iwanu maelufu kwa maelufu, wema hambele hake wamsang'anile. Kuya walamtsi watsa wakala hasi na wapfughula ipfitabu apfila ipfandikighwe aghala ghawang'ali wotendagha iwanu.

11 Kuya nighendelela ukulola kwaapfila imembe aila ing'ali ighendelela ukulonga tsimbuli tsa ukwighoda, nilola mbaka imnyama ayo kakomighwa na ilukuli lwake walwasa mna ghumoto aghula ghung'ali ghukwaka. 12 Wanyama awala wangi wabokighwa tsingupfu tsawo tsa ukutawala, lekeni wawo iwenyegho walekighwa wakale chidogho.

13 Mna tsindoto tsangu nechilo mbona chinu ka munu kakutsa hamwe na libingu komghendela Imnzehe ayula wa ghumwande. Na iwanu wamsola wamghala hambele hake. 14 Naye keng'ighwa ukulu, utunitso na ufalume ili iwanu wa makabila ghose, wa isi yose, na lugha tsose wamtumikile. Utawala wake wokala matsuwa ghose ing'aghohupa, na ufalume wake ng'autsomala baye.

15 Lelo nene Danyeli, ghamaono ghambonile ghanitsupfa na ghanitenda nighanzike ng'ani mna ghumoyo ghwangu. 16 Apfo nimsoghelela yumwe wa awala malaika iwemile habehi nimghutsa mana ya aghano ghose. Naye kanongela mana ya ipfinu apfino. 17 "Iwanyama awo wane iwakulu watsakuwa wafalume wane iwatsolawila muisi. 18 Lekeni iwanu welile wa Imulungu iyali kuchanya watsakwing'ighwa ufalume, nawo watsolongotsa matsuwa ghose, ona matsuwa ghose ing'aghohupa."

19 Kuya nibama nimanye mana ya imnyama ayula wa kane yang'eghalile na wayaghe wose, na ung'amlola kopfuka, na ghamatsino ghake tsa gha chuma, na tsinumba tsake tsa shaba, imnyama iyajile na kubenabena pfihande na kubajughabajugha kwa ghamaghulu ghake ipfijo ipfikalile. 20 Pfipfila nibama nimanye mana ya tsimembe atsila kumi itsikalile mwitwi mwake, na imembe aila ilawilile ahala tsimembe ndatu hatsing'olighwe, imembe ikalile na tsinenge na mlomo ghwake ghulongile mbuli tsa ukwighoda na iyoneke ina ngupfu kubita membe tsingi.

21 Haning'ali nighendelela ukulola, niyona imembe ayo ing'ali iwatowa iwanu wa Imulungu, nayo iwahuma. 22 Kuya imnzehe wa ghumwande ayula katsa kaweng'a ihaki iwanu iwelile wa Imulungu iyali kuchanya ng'ani, na ghamatsuwa haghapfikile, iwanu welile wa Imulungu weng'ighwa ufalume.

23 Naye kanongela apfino, "Imnyama ayula wa kane utsakuwa ufalume wa kane utsolawilila muisi, nawo ng'autseghala na falume tsingi baye, na utsoihinya isi yose, kuibajughabajugha na kuibenabena pfihandehande. 24 Tsimembe atsila kumi watsakuwa wafalume kumi iwatsolawa mna ufalume auno. Wang'alawa awo, katsolawila mfalume yungi, yeye ng'atseghala na awala iwalongole ukutawala, naye katsowaghwisa wafalume wadatu. 25 Yeye katsomlonga pfihile Imulungu iyali kuchanya ng'ani na katsowadununza iwanu wake iwelile, na katsoghalusa ipfipindi na malaghitso ghawo, na katsowatawa iwanu wa Imulungu miyaka midatu na miyetsi sita. 26 Lekeni libalatsa litsomuhigha na katsobokighwa ukulu wake, na ufalume wake utsomala ghendo. 27 Baho ufalume, utawala na ukulu wa tsifalume tsose tsili muisi watsakwing'ighwa iwanu iwelile wa Imulungu iyali kuchanya ng'ani. Ufalume wawo utsakuwa wa matsuwa ghose ing'aghohupa, na watawala wose watsomtumikila na kumtegheletsa yeye."

28 Lelo imbuli aila itsighila ahano, nene Danyeli nidununzika ng'ani haning'ali nikwalangula mwitwi mwangu mbaka ichihanga changu chighaluka. Lekeni imbuli ayo tsaniika mna ghumoyo ghwangu, siisemwile baye.