1 Mfalume Nebukadneza kafina chinyagho cha nzahabu, chimo chake mita ishilini na saba na ughatsi wake mita ndatu, kachimitsa hana isi ya chiwala cha Dula mna ghumkowa ghwa Babeli. 2 Kuya mfalume katuma wanu wakawakeme maliwali, wemilitsi, washauli, iwolola tsihatsina, walamlitsi wakulu na walamlitsi wadodo, na iwakulu wa imikowa, watse kuna ichihungo cha ukwanza ukutambikila ichinyagho chayemitse. 3 Baho, maliwali, iwemilitsi, washauri, iwolola tsihatsina, iwalamlitsi wakulu na walamlitsi wadodo, na iwakulu wa imikowa wetingana hamwe na wema hambele ha ichinyagho chayemitse mfalume Nebukadneza. 4 Baho mtowa mbila kakema lukemwo kalonga, "Mwemwe iwanu wa makabila ghose, na iwanu wa tsiisi tsose na iwanu wa lugha tsose mwolaghitsighwa apfino, 5 hamtsohulika malati, chimbeta, chilimba, santuri, nzumari na tsingoma tsotowighwa mwobamighwa mghwe hasi na mchitambikile ichinyagho cha nzahabu ichimitsighwe na mfalume Nebukadneza. 6 Munu wowose iyolema kughwa hasi na kuchitambikila, baho katsakwasighwa mna litanulu ilikwaka ghumoto." 7 Apfo iwanu wose hawaulike imalati, ichimbeta, ichilimba, santuri, nzumari na tsingoma tsotowingwa waghwa hasi na kuchitambikila ichinyagho ichimitsighwe na mfalume Nebukadneza.

8 Baho wakaldayo wamwenga wawapfughulila lighomba wayahudi. 9 Wamlongela mfalume Nebukadneza, "Ghweghwe mfalume, Imulungu yakwike ukale matsuwa ghose! 10 Ghweghwe Mfalume tsakulaghitsa chila munu iyatsohulika imalati, chimbeta, chilimba, zeze, filimbi, tsumari na ngoma tsotowingwa yaghwe hasi na kuchitamanila chinyagho chila cha nzahabu, 11 na imunu wowose iyolema kughwa hasi na kuchitambikila ichinyagho acho, yasighwe mna litanulu ilikwaka ghumoto. 12 Lelo, kuna wayahudi wamwenga yuwekile wawe pfilongotsi wakulu mna ghumkowa ghwa Babeli, awala tsina Shedraki, Meshaki na Abedinego, ghwe mfalume, iwanu awano walema kukinda lilaghitso lyako. Walema kuitumikila milungu yako na kutamanila chinyagho chila cha inzahabu chawimitse." 13 Baho mfalume Nebukadneza kwona maya na kaghudubuka, kalaghitsa Shadraki, Meshaki, na Abednego waghalighwe hambele hake. Na iwanu awo waghalighwa kuna yeye. 14 Mfalume Nebukadneza kawaghutsa, "Apfi chanihulike cholengesa ka mwemwe Shadraki, Meshaki na Abednego mlema kuitumikila imulungu yangu wala kuchitambikila chinyagho achila cha inzahabu chanichimitse? 15 Lelo itsakuwa ng'apfu kuna mwemwe ka hamtsohulika imalati, filimbi, chilimba, zeze, santuli, zumali na tsingoma tsotowighwa mtsotoghola ukughwa hasi na kuchitambikila ichinyagho chanitengenetse, lekeni ka mtsolema, baho mtsakwasighwa mna litanulu ilikwaka ghumoto. Apfi mulungu wachi iyodaha kuwakombolani mna ghamoko ghangu?" 16 Baho, Shadraki, Meshaki na Abednego wamwidika mfalume walonga, "Ghweghwe Nebukadneza, mna alino twetwe twahela cha kukwidika. 17 Ka apfo pfipfo pfaili, Imulungu wetu yatumtumikila kodaha kutukombola kulawa kuna litanulu ilikwaka ghumoto, na katsotukombola kulawa kuna ghamoko ghako. 18 Lekeni hata ka ng'atsotukombola baye, twobama ghwe mfalume umanye ghendo ka twetwe ng'atutsoitumikila baye imilungu yako, wala kuchitambikila ichinyagho chako cha nzahabu chawimitse."

19 Baho mfalume Nebukadneza kawaghudubukila tsina Shedraki, Meshaki na Abedinego mbaka ichihanga chake chiwa chidung'u. Apfo kalaghitsa ghumoto ghongetsighwe mala saba kubita apfila pfaghwakagha. 20 Kuya kalaghitsa maasikali wana tsingupfu kubita wose kulawa mna maasikali wake, wawohe tsina Shedraki, Meshaki na Abedinego na wawase mna litanulu ilikwaka ghumoto. 21 Apfo iwanu awo wohighwa aku wapfala suluwali tsawo, magwanda ghawo, tsikanzu tsawo, na pfilemba pfawo, na mabwende ghao ghangi. 22 Kwaapfila laghitso lya mfalume tsakali ng'ani, na ghumoto ghung'ali ghukwaka ng'ani, imilambi ya ghumoto iwalakatsa na kuwakoma iwanu iwawengitse tsina Shedraki, Meshaki na Abedinego mna litanulu. 23 Apfo iwanu awala wadatu Shedraki, Meshaki na Abedinego wasighwa mna litanulu ilikwaka ghumoto aku wohighwa. 24 Baho mfalume Nebukadneza kakangawala, kenuka himahima kawaghutsa pfilongotsi wake, "Apfi ng'atuwohile wanu wadatu baye na kuwasa mna ghumoto?" Nawo wamwidika, "Ona, pfipfo ghwe mfalume!" 25 Kuya kawedika kalonga, "Lola nene nakwona wanu wane ng'awohighwe baye woghendaghenda mna ghumoto, nawo ng'awalakale baye, na munu wa kane kakoneka ka mwana wa imilungu!"

26 Apfo mfalume Nebukadneza kasoghela hana ghumlango ghwa litanulu ilikwaka ghumoto kawakemelela, Shedraki, Meshaki na Abednego, iwatumighwa wa Imulungu iyali kuchanya ng'ani, laweni mtse ahano! Nawo walawa mna ghumoto. 27 Na Maliwali, wemilitsi, wakulu wa tsiiisi, washauli wa mfalume iwetingane hamwe, wawona iwanu awala ghumuto ng'aghuwalakatse baye tsing'uli tsawo, wala tsimvili tsa ghamatwi ghawo, wala ghamabwende ghawo, wala ng'awanung'ile ghomoto baye. 28 Mfalume Nebukadneza kalonga, "Yatunyighwe Imulungu wa Shedraki, Meshaki na Abedinego iyamtumile imalaika wake yatse yawakombole iwatumighwa wake iwamtoghole. Wawo walema kukinda lilaghitso lyangu nene mfalume, watoghola ukufa kubita kuitumikila milungu ingi, wala kuitambikila, ila wamtumikile Imulungu wawo yaliyeka. 29 Apfo nakwika laghitso kwa chila kabila lya iwanu, na kwa chila iwanu wa isi, na kwa chila lugha yoyose, iwatsomlonga pfihile Imulungu wa Shedraki, Meshaki na Abedinego, watsokanighwa pfihande pfhande, na tsing'anda tsawo tsitsomwaghighwa na kuwa pfilundo, kwaapfila kuduhu mulungu yungi yodaha kukombola apfino." 30 Kuya mfalume Nebukadneza kaweka tsina Shadraki, Meshaki na Abedinego wawe pfilongotso wakulu mna ghumkowa ghwa Babeli.