1 Tsuwa limwe mfalume Belishaza kawatendela chihungo chikulu wapfilongotsi wake elufu imwe, na kanwa idipfai hamwe nawo. 2 Belishaza hayang'ali yolanza idipfai aila, kalaghitsa iwanu wapfighale ipfinu apfila pfa nzahabu na ifetsa pfayasolile aba wake Nebukadneza kuna ing'anda ya Imulungu ako Yerusalemu ili yeye mfalume, iwakulu wake, iwapinga wake, na wapfimada wake wapfinwele. 3 Baho wapfighala ipfinu apfila pfa nzahabu na fetsa ipfisolighwe kuna ing'anda ya Imulungu ako Yerusalemu. Naye mfalume, iwakulu wake, wapinga wake na pfimada wake wapfinwela. 4 Wang'ali wakunwa idipfai aku woitunya imilungu itengenetsighwe kwa nzahabu, fetsa, ishaba, chuma, imibiki na ghamabwe.

5 Baho pfidole pfa ghumoko ghwa munu pfilawila na pfandusa ukwandika mna ubanda wa ing'anda ya mfalume habehi na chighutso cha itala. Mfalume kona ichighanza cha ghumoko agho ighung'ali ghukwandika. 6 Baho ichihanga chake chighaluka, ilukuli lwake lukeng'eneka, na ghamaghoti ghake ghang'ali ghoghudema. 7 Mfalume Nebukadneza kakemelela, kalaghitsa iwahawi, Wakalidayo, wana ihekima, na iwotabili kwa ukulola tsinondo waghalighwe hambele hake. Naye kawalongela iwanu wa Babeli wana ihekima, "Munu wowose yodaha kusoma aghano ighandikighwe na kunongela mana yake katsopfatsighwa tsinguwo tsa langi ya nzambalau, na mkufwi ghwa nzahabu msingo mwake, naye katsakuwa chilongotsi wa kadatu mna ufalume wangu." 8 Baho iwanu wose wa mfalume wana ihekima wapfika, lekeni ng'awadahile baye kughasoma aghala ighandikighwe, wala kumlongela mfalume mana yake. 9 Kuya mfalume Belishaza ichihanga chake chighaluka, na iwakulu wake wang'ali wopfuka. 10 Malikiya, mai wake mfalume, hayahulike mfalume na iwakulu wake wakowela kengila mna ichikuta mwachili ichijo kalonga, "Ghwe mfalume ukale matsuwa ghose! Uleke kwiduka wala ichihanga chileke kughaluka! 11 Mna ufalume wako, mna munu yana iloho ya imilungu iyelile mghati mwake. Aba wako hayang'ali yotawala, imunu ayo koneka komanya pfinu pfingi, kana tsimbutsi na ihekima ka aila ya milungu. Aba wako, mfalume Nebukadineza kamtenda yawe mkulu wa iwaghanga, iwahawi, iwotabili kwa kulola tsinondo, na Wakaldayo wana ihekima. 12 Imunu ayo taghwa lyake Danyeli, lekeni aba wako kamkema Beliteshaza, yeye tsakakengela ng'ani, na yang'ali yomanya pfinu pfingi, yang'ali yolonga mana ya indoto, yangali yolonga imbuli ipfisike, na yang'ali yotenda ipfinu ing'apfidahika. Lelo umkeme naye katsokulongela mana ya aghano ighandikighwe."

13 Baho Danyeli kaghalighwa hambele ha mfalume, naye mfalume kamghutsa: "Angu ghweghwe yuyo Danyeli, yumwe wa iwanu iwaghalighwe na aba wangu mfalume kulawa kuna isi ya Yuda? 14 Nihulika ka iloho ya imilungu iyelile ya mghati mwako, na komanya pfinu pfingi, kuna tsimbutsi na kuna ihekima. 15 Iwanu wana ihekima na iwahawi waghalighwa hambele hangu wanisomele aghano ighandikighwe, lekeni ng'awadahile baye. 16 Lelo nihulika ka ghweghwe kodaha kutafasiri tsimbuli tsipfisike, na kolonga tsimbuli ing'atsidahika, ka kodaha kusoma aghano ghandikighwe na kunongela mana yake kutsopfatsighwa inguwo ya langi ya nzambalau na mkufwi ghwa nzahabu msingo mwako. Naghwe kutsakuwa munu wa kadatu kwa ukulu mna ufalume wangu."

17 Baho Danyeli kamwidika mfalume Belishaza kalonga, "Ghwe mfalume, tsinzawadi tsako ukale natso ghumwenyegho, au umwing'e munu yungi. Lekeni nene nitsokusomela aghano ighandikighwe na nitsokulongela gholonga choni.

18 "Ghwe mfalume, Imulungu iyali kuchanya ng'ani kamwing'a aba wako Nebukadineza ufalume, ukulu, na kamtenda yatunyighwe na yatunitsighwe. 19 Kwaapfila kamwing'a ukulu aba wako, iwanu wa tsikabila tsose, iwanu wa tsiisi tsose, na iwanu wa lugha tsose waghudema na wampfuka. Mfalume Nebukadneza kamkoma imunu wowose yabamile kumkoma, na kamleka mgima imunu wowose yabamile kumleka mgima. Ayala iyabamile kumtenda yawe mkulu tsakamtenda yawe mkulu, na awala iyabamile kuwahulumsa tsakawahulumsa. 20 Lekeni hayanduse kuwa msughu na ukwighoda, kalapfighwa mna ichighoda chake cha ufalume na kabokighwa mkufwi ghwake. 21 Kawingighwa yakale kutali na iwanu, na ghumoyo ghwake ghutendighwa ghuwe ka ghwa mnyama, tsakakala na pfihongwe wa kubagho, na yang'ali yakuja imitsani ka ing'ombe, naye kapfulumka kwa litungwe lya kulanga. Kakala pfipfo kwa miyaka saba mbaka hayamanyile ka Imulungu mkulu iyali kuchanya ng'ani yuyo iyotawala mna tsifalume tsose tsa iwanu, naye komwing'a ufalume imunu wowose iyombama.

22 "Lekeni Ghwe Belishaza, kwa imwanghe, hata ka agho ghose tsakughamanya, ng'wihulumse baye. 23 Ila ghweghwe kwitenda mkulu kubita IMNDEWA wa kulanga, wakughalila ipfinu pfa Ing'anda ya Imulungu, naghwe kupfinwela dipfai ghweghwe, iwakulu wako, iwapinga wako, na wapfimada wako, na kuitunya imilungu itendighwe kwa fetsa, nzahabu, ishaba, chuma, imibiki na ghamabwe. imilungu ing'aikona, ing'aihulika, wala ukumanya chochose. Lekeni ghweghwe ng'aumtoghole baye Imulungu iyokwing'a ughima na iyokona chila chinu chautenda. 24 Apfo Imulungu yuyo iyatumile ichighanza achila cha ghumoko chandike aghano.

25 "Naye kandika apfino, ‘MENE, MENE, TEKELI, NA PERESI.’ 26 MENE mana yake, ghamatsuwa gha ufalume wako Imulungu kaghapeta, na kaghatenda ghatsighe. 27 TEKELI mana yake wakulinga mna ghumzani naghwe koneka kwa mbewe. 28 PERESI mana yake ufalume wako waughola, na waweng'a Wamedi na Waajemi."

29 Baho mfalume Belishaza kalaghitsa Danyeli yapfatsighwe tsinguwo tsa langi ya nzambal ao na mkufwii ghwa nzahabu msingo mwake. Na ilongighgwa ka Danyeli kakuwa munu wa kadatu mna ufalume wake. 30 Na chilo chicho Belishaza mfalume wa Babeli kakomighwa, 31 naye Dario wa isi ya Umedi kawa mfalume aku kana miyaka sitini na mili.