1 Mna ghumwaka ghwa kadatu ghwa utawala wa mfalume Belishaza nene Danyeli nipata maono ghangi. 2 Mna ghamaono agho, nibona ka na mna ghumji ghwa Susa ghutsungulusighwe ubanda, ghumji mkulu ghuli mna ghumkowa ghwa Elamu, nyima hambalimbali ha ghumto ghwa Ulai. 3 Hanyinule tsinenge, mbona ng'olo mmale yana tsimembe mbili tsing'ulu kema habehi na ghumto aghwo, na membe imwe tsa ng'ulu ng'ani kubita imembe ingi, na hambele ighendelela ukukula. 4 Nimwona ing'olo ayo mmale kokunughitsa chila chinu ichikalile ubali wa maghalibi, kasikazini, na kusini, wala kuduhu mnyama wowose yadahile kwima hambele hake, wala iyadahile ukuhepa tsingupfu tsake, naye ketenda mkulu ka pfabamile mwenyegho. 5 Haning'ali nifikitsa imbuli aino, baho nimwona ng'unzu kana membe imwe ng'ulu ng'ani ikalile haghatighati ha tsinenge tsake kakutsa kulawa maghalibi, kadaluka kwa ngupfu bila kudonza hasi. 6 Naye kamghendela imvulati ayula yana tsimembe mbili yanimwonile kema habehi na ghumto, kampfamila kwa ngupfu tsake tsose. 7 Naye kamsoghelela ing'olo mmale ayula aku kamghudubukila, apfo kampfamila kwa ngupfu na katsibenabena tsimembe tsake mbili. Ing'olo mmale ayula ng'adahile baye ukumuhuma, apfo kamghwisa hasi imvulati ayula na kambajughabajugha, wala kuduhu iyadahile kumkombola na tsingupfu tsake. 8 Baho imene mmale ketutumla ng'ani, lekeni tsingupfu tsake hatsimalile, imembe yake ing'ulu ibeneka. Hanu hake tsota membe tsingi nne itsoneke mwatsimwatsi itsilolile chila ubali kulanga. 9 Kulawa mna imwe ya atsila tsimembe nne, ilawila membe ingi ndodo, ikula ng'ani ilola ubali wa kusini, mashariki na ilolesa isi aila inoghile ng'ani. 10 Imembe ayo ikula ng'ani mbaka tsingupfu tsake tsipfika kuna likingili lya ipfiumbe pfa kulanga, lilaghatsa hasi ipfiumbe wangi wa likingili alila, na tsinondo tsingi, na kutsibajughabajugha. 11 Imembe ayo ibona iyenyegho ng'ulu kubita imkulu wa pfiumbe wa kulanga. Na ileghusa tsinambiko tsa ukulakatsighwa itsing'ali tsilapfighwa kuna yeye chila tsuwa, na hanu hake helile haghwisighwa hasi. 12 Iwanu watenda nzambi, waleka kumlapfila Imulungu tsinambiko tsa ukulakatsighwa tsa chila litsuwa, lekeni wawo wailapfila imembe aila, na iwatenda iwanu iwotoghola ukweli waleke ukuutoghola. Imembe ayo idaha kutenda chila chinu ka pfaibamile. 13 Kuya nihulika malaika yumwe komghutsa malaika miyaghe kalonga, "Aghala ighalongighwe na ghamaono aghano ghatsoghendelela mbaka tsuwachi? Tsinambiko tsa ukulakatsighwa tsa chila tsuwa tsitsohinyighwa mbaka tsuwachi? Mbaka tsuwachi imembe ayo ndodo itsakuwa ngupfu mna hanu helile na kuwabajugha bajugha iwanu wa Imulungu?" 14 Miyaghe kamwidika, "Pfitsoghendelela kwa matsuwa elufu mbili na miya ndatu nemihe na nemitondo, na hambele Imulungu katsotenda ing'anda ya Imulungu yele keli."

15 Nene Danyeli hambonile ghamaono agho, na haning'ali nibama kumanya mana yake, baho mbona chinu ka munu chima hambele hangu. 16 Kuya nihulika imunu kokema kulawa kuna ghumto ghwa Ulai, "Gabulieli, mlongele imunu ayuno mana ya ghamaono aghano." 17 Gablieli kanisoghelela ahala hanyimile, nene nipfuka ng'ani mbaka nighwa hasi. Lekeni kanilongela, "Ghwe munu umanye ka ghamaono ghawonile gholonga iimbulu ya ukutsigha kwa ghamatsuwa." 18 Hayang'ali yolonga na nene, nighwa hasi na niwasa fofofo. Lekeni yeye kanikinda, kanyinula na nene nyima kwa maghulu ghangu. 19 Naye kanongela, "Tegheletsa, nitsokulongela ighatsolawila hambele mna ghamatsuwa gha ukutsigha, aho Imulungu hayatsoghudubuka, ghamaono gholangusa ka agho ghatsolawila mna ghamatsuwa gha ukutsigha ighekighwe na Imulungu.

20 "Ing'olo mmale ayula yana tsimembe mbili yumwonile, awo wawo wafalume wa Umedi na Uajemi. 21 Imene mmale ayula yana imighala mingi, ayo yuyo mfalume wa Uyunani. Na imembe aila ing'ulu ili haghatighati ha tsinenge tsake, ayo yuyo mfalume wake iyakwandusa ukutawala. 22 Imembe aila ibeneke kuya membe tsingi nne tsote hanu hake, mana yake ufalume umwe utseghola uwe falume nne, lekeni tsifalume atso ng'atsitsakuwa na ngupfu baye kubita ufalume aula wa mwanduso.

23 "Iwafalume awo hawatsomalitsa ukutawala, na iighehile haghatsakongetseka, mfalume yumwe iyali mkali, msughu, na iyali na ichidandali katsolawila. 24 Katsakuwa na ngupfu ng'ani, lekeni tsingupfu atso ng'atsitsolawa kuna yeye imwenyegho baye, na yeye katsohinya pfihile ghendo, na katsobweda na kutenda chochose chayobama. Katsowakoma iwanu wana tsingupfu, na iwanu iwelile wa Imulungu. 25 Kwaapfila kakengela katsotenda aghala ghayobama ukutenda, na katsetunya mna ghumoyo ghwake, na iwanu iwakalile tseghamba katsowakoma kwa ukwidikitsa, naye katsetowa na ayula iyali Mkulu wa iwakulu, lekeni katsokomighwa bila tsingupfu tsa imunu. 26 Ghamaono agho gha tsinambiko tsa nemihe na nemitondo ghaulangusighwe, agho gha kweli, ila ghweghwe ugheke mmoyo, kwaapfila ghatsobita matsuwa mengi mbaka haghatsolawila." 27 Ghamaono agho haghamalile, nene Danyeli nitsilika na niwa mtamu kwa matsuwa chidogho. Hanibwighinduke nighendelela kusang'ana tsing'onde tsa mfalume, lekeni ghamaono aghala ghanikangawatsa, na nene simanyile mana yake choni.