1 Mna ghumwaka ghwa kadatu ghwa mfalume Koreshi wa Uajemi, Danyeli iyakemighwe Beliteshaza tsakaghubulighwa maono. Ghamaono agho tsaghakala gha kweli, lekeni makomu ukumanyika. Hata apfo yeye kamanya ghamaona agho kwaapfila tsakeng'ighwa ukumanya ghamaono. 2 Chipindi acho nene Danyeli ning'ali nidomboketsa kwa majuma madatu. 3 Na chipindi chose cha majuma madatu, sijile chinu chinoghile wala inyama, sinwele dipfai, wala sibakile ghamapfuta baye mlukuli lwangu. 4 Na mna litsuwa lya ishilini na nne, nene tsanyima mmbalimbali mwa ghumto Tigiri. 5 Tsanyinula tsinenge tsangu ndola, nimwona munu kapfala magwanda matselu na mchuno koha msipi ghwa nzahabu ighulawile Ufazi. 6 Lukuli lwake tsalukala ka zabalajadi, na chihanga chake ka umeme, na nenge tsake ka milambi ya ghumoto. Ghamaghulu ghake na ghamoko ghake tsaghang'aika ka ishaba ikuwighwe ng'ani. Na litsi lyake tsalihulikika ka litsi lya wanu wengi. 7 Nene Danyeli niliyeka yuyo yambonile ghamaono agho. Iwanu awala iwakalile hamwe na nene ng'awonile baye ghamaono agho, lekeni tsawapfuka ng'ani, watsuma waghenda kwipfisa. 8 Apfo wanileka niliyeka nolola ghamaono agho. Ichihanga changu chighaluka mbaka kuduhu munu iyanitangile, na nikala nahela ngupfu. 9 Hanihulike litsi lyake nighwa hasi na tsinongo nito tsinitsila. 10 Baho ghumoko ghunikinda ghunyinula na kuning'a ngupfu ghamaghulu na ghamoko ghangu.

11 Malaika kanilongela, "Ghwe Danyeli, yukundighwa ng'ani, wime utegheletse ghanikulongela, kwaapfila nitumighwa kuna ghweghwe." Hayang'ali yonilongela agho nyima aku noghudema.

12 Kuya kanilongela, "Danyeli uleke ukupfuka, Imulungu wako kahulika ghaung'ali ulomba kulawa litsuwa alila lya mwanduso ahala hawihulumse hambele hake ili umanye. Na nene nitsa kwaajili ya aghala ghaulombile. 13 Lekeni imkulu wa ufalume wa Uajemi ng'anilekile nibite baye kwa matsuwa ishilini na moja. Lekeni Mikaeli, yumwe wa iwakulu, katsa kunyapfila. Apfo nimleka ako ketowa na imkulu wa ufalume wa Uajemi, 14 na nene nitsa nikulongele ighatsowapata iwanu wako mna ghamatsuwa ighakutsa kwaapfila ghamaono ghawonile gha chipindi ichikutsa."

15 Hayang'ali yolonga agho, nene ninamila hasi sidahile ukulonga baye kwaapfila ning'ali nipfuka ng'ani. 16 Kuya yumwe iyakalile ka munu kadonza milomo yangu, na baho nimlongela ayula yemile habehi na nene, "Mndewa wangu, ghamaono aghano ghanitenda nighanzike na nikeng'eneke. 17 Nene mtumwa wako nidahatse ukulonga naghwe? Nene nahela ghendo tsingupfu mbaka sidaha ukuhumula baye."

18 Kuya ayula yakalile ka imunu kanidonza keli kanighuma ngupfu. 19 Naye kanilongela, "Uleke ukupfuka ghweghwe yukundighwa ng'ani, ukale tseghamba na uwe na tsingupfu."

Hayalongile na nene nipata ngupfu keli nilonga, Nilongele achila chubama ukulonga. 20 Naye kanilongela, "Apfi komanya heule nitsile? Lelo nitsakuya ili niketowe na mkulu wa Uajemi, mfalume wa Uyunani katsolawila. 21 Lekeni nitsokulongela aghala ighandikighwe mna chitabu cha ukweli. Kuduhu imunu yatsonyapfila ila mkulu wenu Mikaeli.