1 Mna ghumwaka ghwa mwanduso ghwa Dario imwana wa Ahasuero yalawile mna ilukolo lwa Wamedi hayanduse kuwa mtawala mna ufalume wa Wakalidayo, 2 nene Danyeli ning'ali nisoma ipfitabu ipfilonga mbuli tsa Imulungu, na mumo niimanya imbuli aila ya imiyaka sabini IMNDEWA iyamlongele nabii Yeremia ya ukukala mahame kwa ghumji ghwa Yerusalemu. 3 Apfo nihunduka nimlomba IMNDEWA Imulungu, nifunga ukuja na kupfala maghunila na kwibakatsa lipfu. 4 Nimlomba IMNDEWA, Imulungu wangu, na kumlongela tsinzambi tsangu na tsa iwanu wangu, "Ghwe Imulungu mkulu na wa ukupfukighwa, ghweghwe kotimitsa laghano na kowatendela uluso awala iwokukunda na iwokinda malaghitso ghako, 5 twetwe tutenda nzambi, na tutotsa, tutenda ighehile na tuleka kukutoghola ghweghwe, tukulema ghweghwe, na ng'atuwinzile baye ghamalaghitso ghako na imiko yako, 6 wala ng'atuwategheletse baye iwatumighwa wako manabii, wawo walonga usenga wako na wafalume wetu, iwakulu wetu, aba tsetu na iwanu wose wa isi. 7 Ghwe IMNDEWA, matsuwa ghose ghweghwe kotenda ighali gha haki, lekeni leloli twetwe twakona chinyala kwaapfila ng'atukotoghole ghweghwe baye, na kwaapfila tukutendela ghehile, twetwe iwanu wa Yuda, iwanu itukala Yerusalemu, na Waisiraeli wose yauwapwililse kuna isi itsili habehi na itsili kutali kwa ghamatotso ghawo ghawakutendele. 8 Ghwe IMNDEWA, twetwe, na wafalume wetu, iwakulu wetu na aba tsetu twakona chinyala kwaapfila tukutendela nzambi. 9 Ghwe IMNDEWA, hata ka twetwe tutenda nzambi, lekeni ghweghwe kotwonela libatsi na kotuleghusila tsinzambi. 10 Ghwe IMNDEWA, Imulungu wetu, twetwe tulema kukutegheletsa ghweghwe na ng'atukindile baye ghamalaghitso ghako ghautwing'ile kubitila iwatumighwa wako manabii. 11 Waisiraeli wose ng'awakindile baye malaghitso ghako, walema kutegheletsa achila chaulongile, lelo kwaapfila tukutendela nzambi, malighito ighandikighwe mna ghamalaghitso gha imtumighwa wako Musa ghose ghatupfikila twetwe. 12 Apfo ghweghwe kughatenda aghala ghaulongile kutsotutendela twetwe hamwe na iwatawala wetu. Naghwe kutughalila majanga makulu mna ghumji ghwa Yerusalemu kubita imiji yose ili muisi. 13 Kututowa ka pfayandikighwe mna malaghitso gha Musa, lekeni mbaka sambi ghwe IMNDEWA Imulungu wetu, ng'atukulombile baye utwonele libatsi ili tutsileke tsambi tsetu, na tutende aghala ighotogholeka. 14 Apfo Ghwe IMNDEWA Imulungu wetu tsakubama kutuhigha, na kutenda ka pfubamile kwaapfila matsuwa ghose kotenda ighali gha haki natwe ng'atukutegheletse ghweghwe baye.

15 "Ghwe IMNDEWA, Imulungu wetu, kuwalapfa iwanu wako kuna isi ya Misiri, na kwa tsingupfu tsako kwitenda mkulu mbaka sambi, lelo twolonga, tutenda nzambi, na tutenda ghehile. 16 Ghwe IMNDEWA, kwaapfila ghweghwe kotenda ighali gha haki, uleke kughonela maya au kughudubukila ghumji ghwako ghwa Yerusalemu, chidunda chako ichelile. Iwanu wose wa tsiisi itsili habehi na iwanu wako waghubetsa ghumji ghwa Yerusalemu kwaajili ya tsinzambi tsetu na ighehile ghawatendile iwahenga wetu. 17 Lelo, ghwe Imulungu wetu, utegheletse ghanikulomba na ghanikudedetsa nene mtumighwa wako, kwaapfila ghweghwe kuna libatsi, kwaajili yako ghwe IMNDEWA, uitsenge keli ing'anda yako ihinyike. 18 Ghwe Imulungu wetu uwambe lighutwi uhulike, ufumbule tsinenge ulole ghumji aghula ghwaughusaghule, ukulomba kwatulomba si ka twetwe tutenda ighokunoghela, ila kwaapfila ghweghwe kotwonela libatsi ng'ani. 19 Ghwe IMNDEWA utuhulike na utuleghusile nzambi tsetu. Ghwe IMNDEWA, utegheletse na uleke kukawa ukutenda kwaapfila ghumji aghuno na iwanu awano wa kwako ghweghwe ghumwenyegho."

20 Lelo, haning'ali nilonga na ukumlomba Imulungu yanileghusile tsnzambi tsangu na tsinzambi tsa iwanu wangu wa Isiraeli na ukumlomba kwaajili ya ichidunda chake ichelile, 21 Gabulieli, imalaika ayula yanimwonile mna ghamaono aho mwanduso, kahulumka himahima mbaka hanu ahala hanikalile, nacho tsachikala chipindi cha ukulapfa inambiko ya nemihe. 22 Naye kanilongela, "Ghwe Danyeli, nitsa nikwing'e ihekima na nikutende udahe ukumanya ipfinu apfino. 23 Haung'ali ulomba, Imulungu kakwidika, na nene nitsa nikulongele kwaapfila kokukunda ng'ani. Lelo ufikitse ghoya na ughamanye ghamaono aghano.

24 "Imulungu kalaghitsa chipindi cha majuma sabini kwa iwanu wako, na kwa ghumji ghwako ighwelile, gha ukumalitsa ghamatotso, na ukuleka ukutenda tsinzambi, uwaleghusile ghehile ghawatendile, na uwetendele ighali haki, na ugheke muhuli ghamaono, na uhabake mapfuta ihanu ihelile ng'ani. 25 Lelo umanye na utange mbuli aino, kulawa haghatsolapfighwa ghamalaghitso gha ukutsenga keli ghumji ghwa Yerusalemu mbaka hayatsakutsa imunu iyasaghulighwe na Imulungu yatawale, itsakuwa chipindi cha majuma saba. Na ghumji ghwa Yerusalemu ghutsotsengighwa keli kwa majuma sitini na meli, nagho ghutsakuwa na nzila ng'ulu na mahandaki, lekeni ichipindi acho chitsakuwa na maghayo. 26 Na ghamajuma agho sitini na meli haghotsomala, ichilongotsi ayula iyasaghulighwe na Imulungu katsokomighwa na ng'atsokala na chinu baye. Iwanu wa imkulu iyatsakutsa watsoghuhinya ghumji na hanu helile ghendo kwa ngupfu nyingi ka tsa ghamatsi ighamememile pfaghokulusa ipfinu, na iwanu watsoghendelela ukwitowa ka Imulungu pfayalaghitse. 27 Imtawala ayo katsakwika laghano na iwanu wengi kwa miyaka saba. Na ing'abita miyaka madatu na nusu katsoghoma tsinambiko na ipfinu ipfilapfigwa. Kuya hanu hake helile ihenulighwe hatsakwima chinu ichidesa na ichihinya, na hatsokala pfipfo mbaka ayula iyachimise yakomighwe ka Imulungu pfayalaghitse."