19 Au mutangiteli panga yi’ga yinu nga nyumba ya Loo Mpeleteu ywabile nkati yinu ywamupeyilwe na Nnu’ngu'? Namwenga mwa mali yinu mwabeneli. 20 Mwanjaa, Nnu’ngu' aampi’mite kwa bei. Kwa nnyo, yi’ga yinu inkwi’ye Nnu’ngu'.

27 Ila niiku’su’mbwa yi’ga yangu' na kwiyobeleka komeya li’nga bu’ka pa kwaalya bandu Abali Inannoga, nenga namwene naakane obeya upo yo sinda.

3 Ata nikapiya mali yangu' yoti na kwapeya aki’ba, kai' na kwipiya yi’ga yangu' itinike mwoto, mana nikotwike baa na upendo, iyangatiali kili’be.

13 Kwa mwanjaa twaboti tubatisilwe ubatiso wa Loo yumo ata manaitei Ayahudi au Ayunani, wammanda au wangwana, tupeyilwe aywo Loo yumo li’nga tupange yi’ga yimo.

4 Kati mu’lu' mwamutangite, yi’ga yimo, lakini ibile na ili’mbi’li’mbi' yambone, na kila kili’mbi’li’mbi' kibile na kasi yake. 5 Nyinyonyo na twenga twatubile twabaingi, tubile na yi’ga yimo mu Kilisitu, na kila yumo ywitu nga kili’mbi’li’mbi' sa nnyine.

8 Kwa mwanjaa kwiyobeleka yi’ga ipate makakala kwendapwaika pasene, lakini kwiyobeleka bi’ngi’ya gapala Nnu’ngu' kubi na pwaila mumakowe goti ga ukoto wa nambi’yambi' na ga nsimu wawaaisa, kati mwalagi Nnu’ngu'.

41 Mukeleke na mulu’be li’nga mwaakane yingya mumapayilwo, kwa mwanjaa, loo yinu ipala panga makowe manogau, lakini yi’ga yinu nga kigopi."

29 Manaitei liyo lyako lyammalyo likupanga upange sambi, uliyokwe na kulitaikulya kuutalu. Nantali obeya kili’mbi’li’mbi' simo muyi’ga yako, kulikoni yi’ga yako yoti taikulilwa kumwoto wangayomoka.

25 "Kwa nyo nimmakianga panga, kanemuauke mubwu’mi winu bu’kana na kilyo, au kinywo, wala payi’ga yinu muwale ki’li'. Kwa mwanjaa bwu’mi nga wangama kulikoni kilyo, na yi’ga yangama kulikoni mawalo.

28 Kanemwayogope balu' bababulaga yi’ga bai, lakini bakombwali bulaga loo. Munomuno munnyogope Nnu’ngu' ywakombwa langamisa yi’ga pamope na kwipeleka loo kumwoto wangayomoka.

1 Bandu maelupu baatikusikana no li’batana, Yesu aatumbwi wi’ti' kwabakia banamasi' bake, "Mwili’ndi’le na uyi’me wa ulu’u wa Mafalisayo nga unapiki. 2 Lakini ntu’pu' sakiwi’ki’lilwe, sasaakotoka umukulwa, kila sakiyu’bite salu’a kwipulwa. 3 Kwa nyo, kila samulongei mulubi’ndu', bandu balu’a kiyu’wa pabweya, na kila gamulongei kwo yu’yu’tana kuungati milyango iyigalilwe, galu’a bayilwa panani ya mwagala wa nyumba.

4 "Nimmakianga mwenga mwa mambwiga bangu', kanemwayogope balu' babakombwa bulaga yi’ga bai, lakini bakombwali yendelya panga kikowe si’ngi' mana babulige. 5 Nilu’a kummakianga yu’lu' ywapalikwa kunnyogopa, Munnyogope yu’lu' ywakombwa bulaga na kuntaikulya mundu kumwoto. Eloo, nimmakianga munnyogope ywo. 6 Itanganikwe panga injosi tano ipi’mi’yi’lwa kwa ela njene muno, au nyonyoli? Lakini nnu’ngi' ya Nnu’ngu', alibalilwali ata yumo. 7 Lakini ata nywili ya mumitwe yinu ibalangilwe yoti. Kanemuyogope, mwenga nga mwampu’ku’bi’la kulikoni injosi yambone.

8 "Nimmakianga kakape, kila mundu ywaniyi’ki’tya nnu’ngi' ya bandu panga ywembe ywangu', Mwana wa Mundu nembe alu’a kunnyi’ki’tya nnu’ngi' ya malaika ba Nnu’ngu' panga mundu ywo ywake. 9 Lakini mundu ywoywoti ywanikana nnu’ngi' ya bandu, nembe alu’a kanilwa nnu’ngi' ya malaika ba Nnu’ngu'.

10 "Ywoywoti ywalongela likowe lyo kana kunnyi’ki’tya Mwana wa Mundu, alu’a samilwa, lakini ywannongelya ubu’su' Loo Mpeleteu, alu’a samilwali.

11 "Pabampelekanga mwenga nnu’ngi' ya mayumba ga kunnu’ba Nnu’ngu' na nnu’ngi' ya api’ndo na atawala, kanemwalendeme gania panga mukaikengya, au mukayangwa buli. 12 Kwa mwanjaa popopo, Loo Mpeleteu alu’a kunnyi’gana si’lu' samupalilwa yangwa."

13 Mundu yumo palu' pakipi’nga sa bandu aatikummakia, "Mwalimu, ummakiye nnunangu' yu', tubagane ulisi wabatuleki tati'." 14 Yesu annyangwi, "Mbwiga, nyai ywanibi’i nenga panga na mundu wa kwakenga au kwa awana pakati yinu?"

15 Bai, ngaabakia boti, "Mwili’ndi’le na kila uyi’me wa bwimi, kwa mwanjaa ukoto wa mundu ubu’kanali no yoloka kwa ili’be yabile nayo." 16 Bu’kapo, ngaalongelya kwa lukongo lu’no, "Kwabile na tayili yumo ywembe munng’unda wake aatimeya munomuno. 17 Tayili ywo, aganiyite pamwoyo wake, ‘Nilu’a panga buli nanenga ntu’pu' ligu’lu' lyo bi’kya ilyo yangu'? 18 Nilu’a panga nyo, nilu’a sengwana tugu’lu' twangu' tuketuke no senga ligu’lu' liku’lu' amo nganilu’a bi’ka ilyo yangu' yoti yaniunike na mali yangu'. 19 Apo, naubakia mwoyo wangu' panga pano le ubile na sobi’ki’ya, no tumya myaka yambone, no ponda mali bai, lya, nywa, no napusika.’ 20 Lakini Nnu’ngu' ngammakia, ‘Wenga wa nnogeloge, kilo sa li’no, bwu’mi wako wendatolelwa. Na ili’be yi’lu' yoti yowitwi’li’kiye, ilu’a panga ya nyai?’" 21 Yesu ayomoli kwo baya, "Amo ngamwabile mundu ywaitwi’li’ki’ya mali kwa makowe gake mwene bai, lakini nki’ba nnu’ngi' ya Nnu’ngu'."

22 Bu’kapo Yesu aabakiye banamasi' bake, "Kwa kitumbu so nendakummakianga, kanemube na kyukala ati' kilyo twapata kwaku', au alu’a kutuwalika nyai? 23 Kwa mwanjaa nantali bwu’mi kulikoni kilyo, yi’ga nantali kuliko ngu’bo. 24 Mwalinge mwababile iyuni. Bapandangali wala baunali, kai' ntu’pu' ligu’lu' lyolyoti. Ata nyo Nnu’ngu' aayimali ilyo endakwayakia. Mwenga mwampu’ku’bi’la kuliko iyuni! 25 Nyai mukipi’nga sinu ywakombwa lumya kwa kwiauya no kombwa yongeya kwaali' pasene masu’ba ga bwu’mi wake? 26 Bai, manaitei mukombwali panga likowe lisene kati lyo, mwanjaa namani muba na kyukala kwa galu' gi’ngi'? 27 Mugalinge malu’ba mwagalembulya! Gapangali kasi kai' gaiwalikali. Lakini nimmakianga, ata Nkulungwa Selemani mwene na utayili waabile nawo na magu’bo gawalage, anaikali paugolou wa lilu’ba limo. 28 Manaitei Nnu’ngu' akombwa kuliwalika nyo lyamba lya munng’unda, lyembe li’no libile na malau' lyalu’a taikulwa palitu’ta no tinika mwoto. Buli, kangi' alu’a kumpangya muno mwenga? Mwenga mwa bandu ba imani njene!

29 "Bai, kanemube na kyukala kwa kwiauya pala kilyo au so nywa. 30 Mwanjaa bandu bangali kuntanga Nnu’ngu' baukya go, na Tati' binu batangite panga makowe go gendapalilwa na mwenga. 31 Mupale wi’ti' Ukulungwa wa Nnu’ngu' na go gi’ngi' mwalu’a yongeyelwa.

32 "Kanemuyogope, mwenga mwakipi’nga kisene sa ngondolo, kwa mwanjaa Tati' binu bapendi kumpeyanga Ukulungwa. 33 Mupi’mi’yange mali yinu na mbanje ye mukaapei aki’ba. Mwitengenesi mipuko yangali otoka na kwibi’kya amana kunani, akwo ipu’ngwali. Akwo baii baegelyali kai' ngu’lu’ku’lu' baalabiyali. 34 Palu' paibile amana yako, nga pawaba na mwoyo wako.

35 "Mube tiyali, mutabite mikanda muibuno na imulikyo yinu itame kaiyaka. 36 Mutame kati atumisi babanni’nda bwana wabe abuyangane bu’ka kulisengele, li’nga mana bayu’wine ilulu bai, bannyu’gu’li nniango ayingi. 37 Nantali atumisi balu' bembe bwana wabe paabuyangana, akwemba kabakeleka! Kakape nendakummakianga, aywo bwana aibi’ka wiso na kwakemya pamesa li’nga balye. 38 Ata mana aabuyangana meku au kakusa na kwakwemba kabakeleka, nantali yabe atumisi bo! 39 Mutange panga kenda mwene nyumba akatanga saa yaisa mwii, alu’e keleka na alu’e yi’ki’tyali kunneka ayingi no yiba. 40 Na mwenga nyinyonyo, mutame wiso kwa mwanjaa, Mwana wa Mundu alu’a isa saa yangatanganikwa."

41 Petili ngalaluya, "Bwana, lukongo lu' utulongelya twenga bai au twa bandu boti?" 42 Bwana ngayangwa panga, "Ywaku' ntumisi ywa u’bi’li’ka na mwene ikima, ywembe bwana wake alu’a kummi’ka panani ya atumisi bake li’nga aapei kilyo nsimu waupalilwa? 43 Nantali yake ntumisi ywo, manaitei bwana wake paaki’li’bu’ka alu’a kunkwemba kapanga nyo. 44 Kakape aalu’a kumwu’bu’ya na kumpanga ntawala wa amana yake yoti. 45 Lakini mana ntumisi ywo abaite pamwoyo wake, ‘Bwana wangu' asi’liye buyangana,’ ngatumbwa kwaku’mbwa atumisi aine analu’me na alwawa no lya, nywa no lobya, 46 bwana wake aalu’a buyangana lisu’ba lyangali pi’kanilya na saa yangali tanganikwa, aalu’a kunku’mbwa muno ntumisi ywo na kumuukumu pamope na bangali u’bi’lya. 47 Ntumisi yu’lu' ywatanga mwapala bwana wake, lakini apangali gagapalilwa panga, aaputilwa munomuno. 48 Lakini ywapanga makowe gagampanga mundu asenuke pangali tanga, aaputilwa pasene. Ywapeyilwe yambone, aalu’a longelwa yambone, ywapeyilwe yambone muno, aalu’a longelwa yambone munomuno.

49 "Niisi koya mwoto padunia, napendi ukapanga uyakite! 50 Nibile na ubatiso wanipalikwa niupoki, kwa ndi’la yaku' niiauye mpaka utimi! 51 Mukita niletike amani pano padunia? Ata pasene, amani lili, ila mayu’mano. 52 No bu’ka nambi’yambi', mana kubile na alongo batano, balu’a baganika, ku’no abi’li' kwi’ngi' atatu au kwi’ngi' atatu, ku’no abi’li'. 53 Tati' balu’a yu’mana na mwana na mwana alu’a yu’mana na tati' bake, mau' bayu’mana na mwi’nja wabe na mwi’nja ayu’mana na mau' bake, mau' mukwe bayu’mana na nkamwana na nkamwana ayu’mana na mau' mukwe."

54 Yesu ngaibakia kai' ipi’nga ya bandu, "Mana mugabweni maunde gayi’mi kulwingo lwa kundondi bai popopo mubaya, ‘Ula alu’a nia’, kakape endania. 55 Mana muubweni nsunga wa kusi kaupukatya mubaya, ‘Kwalu’a ba na lyoto muno,’ Na ngamwaipangika. 56 Mwenga mwa anapiki! Mumanyi londwa mumaumbile ga nni’ma na kumaunde, mukotoka ki’li' tanga maumbile ga nsimu wu’no?

57 "Kwa mwanjaa namani mukotoka kwiamulya mwabene panga likowe linannoga? 58 Mana ywa kusitakya, kakupeleka kukoliti, yabile male yomwana nakwe mubile mundi’la, akane kupeleka kwa akimu, nembe akimu akane kukukamukiya kwa asikali, nabembe bakane kuyingiya muutabilwe. 59 Kakape nikubakia, watama mo mpaka wayomwe li’pa lwela lwa kuundi’la."

4 Twenga twaboti tubile twayi’ga yimo na Loo yumo kati mu’lu' mwatukemilwe na Nnu’ngu' muliu’bi’lyo limo.

22 Alwawa baagegekeye akinasengo babe, kati kunnyu’wa Kilisitu. 23 Kwa mwanjaa nnalu’me nga ntwe wa nnyumbowe, kati mwaibile Kilisitu nga ntwe wa kanisa. Kilisitu nga nkosopoli wa kanisa na lyembe nga yi’ga yake.

15 Amani ya Kilisitu itawale mumyoyo yinu. Mwenga mupangike mwa yi’ga yimo, kwa nyo mukemilwe tama kwa amani. Kai', kanemulibali kunsukulu Nnu’ngu'.

16 Kwa nyo, tuti’kwanikali mwoyo ata pasene. Pamope no panga ube witu wa panja wendaalabika, lakini ube witu wa nkati uyu’ka wayambi' kila lisu’ba.

24 Ywembe mwene aagapu’twi masambi gitu muyi’ga yake kunani ya nsalaba, li’nga twenga kanetutawalilwe na sambi kai', ila tutame maisa ga kumpulaisa Nnu’ngu'. Kwo ku’mbu’lwa kwake, tupatike ukoto.

2 Twenga twaboti twendakosa mumakowe mbali’mbali'. Na manaitei mundu ywoywoti aponanganali muulongeli wake, aywo nga mundu ntimya, kai' awesa kwikanikia yi’ga yake yoti.