19 Nte ndufo idiọọñọke ke idem ndufo edo tembịd Adisana Sịbidịd i-isịneke ndufo ke idem, a-ndufo ekebọọhọ eto Abasi? Idooho ndufo enie idem ndufo; 20 ekidep ndufo ke ekọmudua. Ke ntoro, ikama idem ndufo inọ Abasi ukpono.

27 Iyoo, ami ntọ idem mmi eta, ñnyʌñ nnam anye ado afʌn mmi; nọ ato do ke ami mmaakwọrọ nnọ mbon mfen, ami ke idem mmi nsịneke ke atu mbon imiidiidotto adibọ utịb ado.

3 Adieke ami mbenne afịd inie mmi nnọ mme uweene, ñnyʌñ ñyaak idem mmi nnọ nsọñọñkpọ nọ ami ñwọk inua, ado nnieghe ima, udod indoroke miin ndomokeed.

13 Sia ekiduọk afịd ñnyịn mmọọñ ke Sịbidịd keed nọ ñnyịn ikappa ido idem keed, me ido mme Yuu me mme Gentile, afʌn me amanaisọñ, ekenyʌñ inọ afịd ñnyịn Sịbidịd keed ami inwọñ.

4 Sia kpa naña ñnyịn keedekeed inie abʌkidem keed ye uwak ndido, ndin mme ndido ami inieñeke ukem ubọkutom, 5 kpa ntoro ke Krais, akpesʌkado ñnyịn iwakka, ido Ikpọkidem keed, ndin afịd ñnyịn idoñño ndido inọ emọ-emọ.

8 Awo adisiiñe ikpọkidem aba ufọn, ado uteñe Abasi afọn akan afịd ñkpọ, sia asaña ye enwọñọ a-abañake uwem ami ye uwem a-adiidi.

22 Esịd idaara ado eti ibọk,

ado esịd a-abaaha ke mfʌhọ asasaat akpọ.

24 Nneem ikọ ado eboho adanakwọọk,

anem ke ukpọñ anyʌñ ado ukọk anọ mme akpọ.

7 Kuuse idem mfo nte awo aniọñ;

baak Abọọñ nyʌñ sọọn idiọọkñkpọ

8 Ami ayaunọ fiin nsọñidem

anyʌñ anam akpọ mfo asọọñ.

13 Sia afo akebot ataa esịd idem mmi;

afo akemfʌk miin ke idịb eka mmi.

14 Ami utooro fiin sia afo akembot miin ke ndịk-ndịk ye utịppe-utịppe usʌñ;

mme utom mfo edo utịppe,

ami mmenekke ndiọọñọ ntoro.

26 Abʌkidem ye esịd mmi ekeme iñyaañ

ado Abasi ado adudu anọ esịd mmi

ye udeeme mmi ke nsi-nsi.

1 O Abasi, afo ado Abasi mmi,

ami mmenekke uyem fiin;

itọñ mfo andọñ miin

afịd idem mmi uyem fiin,

ke nsaad ufiob isọñ,

a-mmọọñ imiibaaha.

41 Itaba idab inyʌñ ibọñ akam mbaak ndufo ididʌk idomo. Sịbidịd a-anyịmme, ado ikpọkidem a-akop mmemidem."

29 Anyen nnasia mfo akpedo ñkpọiduọ unọ fiin, kappa anye sio duọọk. A-afọn afo adinana ndido idem mfo keed, akan aditop afịd idem mfo nsịn ke nsi-nsi ikañ.

25 "Ke ntak ado ke ami ibo ndufo ikiifịna idem ibaña uwem ndufo, se ediidia me se ediinwọñ; me se ibaña ikpọkidem ndufo, se ediisịne. Nte uwem ikponno ikan ndidia, ikpọkidem inyʌññọ ikpon ikan afọñ?

28 Ikiifeghe mbon e-ekanna ewot ikpọkidem ado ikanna iwot ukpọñ; ikap ifeghe Anye a-akanna awot ikpọkidem ye ukpọñ ke nsi-nsi ikañ.

1 Ke ini atu awo emaekeyọhọ uwak tọsịn tutu mme awo edufiighe emọ-emọ, Yisọs amaatọọñọ adikwọrọ ikọ ke akpa ifed nnọọ mme mbed amọ, ate, "Ikpeme yiis mme Farisi, a-adooho mbubịk. 2 Ibaaha se efọfʌk i-imiidiiyaarake, inyʌññọ iba se ededịp i-imiidiinaaha ke eferife. 3 Ibaaha se afo atañ ke ekịm, a-awo imiidiikoppo ke uweemeayio, ndin adu a-afo adọññọ ke utọñ ke esịd ubeed eyaesuan ke mme akọm ufọk.

4 "Mme ufan mmi, ami ibo ndufo nte, ikiibaak mbon e-ekanna ewot ikpọkidem kpọd ado ikanna adinam ñkan ado. 5 Ado ami ñyaiwọt ndufo anye a-ndufo ekpebaaha: Ibaak anye a-adooho amaawot ikpọkidem ama, amaana anie adudu aditop nsịn ke ukpe nsi-nsi ikañ. Ii, ke akpanikọ, ibaak anye ado. 6 Idooho nsiak ition ke enyam ke kọbọ iba? Kpayeado, Abasi ifreke ammọ ndomokeed. 7 Ke akpanikọ, e-ebat afịd ided iwuod ndufo. Ke ntoro, ikiifeghe ndịk; sia ekọmudua ndufo akpon akan uwak nsiak.

8 "Ami idọkkọ ndufo nte, awo se idiiñyimme miin anwa-anwa, Ayịn Awo ayaanyʌñ anyịmme anye ke iso mme enyere Abasi. 9 Ado awo añkañña miin ke iso mbon awo, eyaenyʌñ ekañ anye ke iso mme enyere Abasi. 10 Ndin eyaefeen enọ awo a-atañña ikọ adian Ayịn Awo, ado awo akeedodo a-atañña ikọ emiom adian Adisana Sịbidịd idiinieghe adifeen.

11 "Emaiben ndufo eka ke mme sinakọk, ke iso mme andikara ye ikpọ mme adaidaha, ikiikere naña ediifak idem ndufo me se ediitañ, 12 sia Adisana Sịbidịd ayaitemme ndufo se ediitañ."

13 Awo ke atu ado amaabo Yisọs ate, "Andikpeeb, dọkkọ ayịneka mmi yak abakka udeeme ñkpọ akpa mmi annọ."

14 Yisọs amaabọọrọ anye ate, "Ete, anie akemmek miin nte abiideikpe me adeemeñkpọ ke ufọọd ndufo?" 15 Yisọs amaadian do ate, "Ikpeme! Iba ke mfadidem ibaña mme nsio-nsio idiọọk itọñ; uwem awo ikọñọke ke uwak ñkpọ se anye anie."

16 Ñko anye amaatop ñke ami anọ ammọ ate, "Isọñ imọ awo keed amaadʌk ñkpọ inwañ eti-eti. 17 Imọ awo ami amaakere ke esịd ammọ ate, ‘Nsoo ke ami ndiinam? Ami nnieghe itie se mbon afịd uwak ñkpọ inwañ ami.’

18 "Ndin anye amaabo, ‘Se ami mbo nnam ado ami. Ñyaawuut mme ise mmi, mmaana mbọp mme ise se ikpoon, ndin ñyaakoono akpakʌb ñkpọ inwañ mmi ñkebono ke ndo. 19 Amaama ami ñyaabo idem mmi nte, "Afo amenie uwak nti ñkpọ se idiiba ikpeene ke uwak isua. Dat uwem usʌk-usʌk, dia, nwọñ nyʌñ kop inem uwem." ’

20 "Ado Abasi amaabo anye, ‘Afo ndisịme awo! Kpa akonayio ami eyaeyem uwem mfo uto fiin. Anie ndin adiinie afịd se afo akekọọ anịm anọ idem ado?’

21 "Kpa ntom ke adiiwuọọñọ inọ awo a-akọọhọ mme inie abon anọ idem amọ ado inieghe inie ke ñkañ Abasi."

22 Ndin Yisọs amaabo mme mbed amọ ate, "Ke ntoro ami ibo ndufo ikiifịna idem ibaña uwem ndufo, me nsoo ke ediidia; me ikpọkidem ndufo, me nsoo ke ediisịne. 23 Sia uwem akan ndidia, ikpọkidem anyʌñ akan afọñ. 24 Ikere ibaña mme inuen anyọñ. Ammọ itọọhọtọ, idọkkọdọk, inyʌññọ inie aba me ise; ado Abasi abọọk ammọ. Nwaanwa dise ndufo a-adooho ekọmudua ndufo akpon akan ake mme inuen! 25 Anie ke atu ndufo ikeme adidian awa keed ke uwem amọ ato ke adifịna? 26 Adieke ndufo imiikanna inam etək-etək ñkpọ ami, ntak a-ndufo efịnake ebaña mbon ñko-o?

27 "Se naña mme ñkpokpoñ ikọd ekọt. Ammọ inamma utom inyʌññọ ituak afọñ. Ado ami idọkkọ ndufo ke Sọlọmọn ke afịd ubọọñ amọ ikisịneke afọñ se iyaiya nte keed ke atu mme ñkpokpoñ ikọd ami. 28 Adieke Abasi anọọhọ ñkpokpoñ ke ikọd nsiine, a-adooho ammọ eba mfịn, ñkpọñ ekpooño ammọ efọọmọ ke ikañ, nsoo ikpinam ke anye anekke ase ñkpọ ibaña ndufo; ndufo mbon etək mbuọdidem! 29 Ikiinyʌñ isịn esịd ndufo ke se ediidia me se ediinwọñ; ikiikere ibaña ado. 30 Sia mbon ederimbod imiidiọọñọke Abasi esịn esịd ke mme ñkpọ ntom, ndin Ete ndufo adọdiọọñọ ke ndufo emeyem mme ñkpọ ami. 31 Ado ndufo ikap isịn esịd iyem abioubọọñ Abasi, ndin eyaedian afịd mme ñkpọ ami inọ ndufo.

32 "Ikiikop ndịk, etək udịm edọñ, sia Ete ndufo a-akop inemesịd adinọ ndufo abioubọọñ Abasi. 33 Inyam inie ndufo inyʌñ idat inwam mme uweene. Inọ idem ndufo ekpad akʌk i-imiidiitahake, ñkpọuto ke hefịn i-imiidiikpuuho, ke itie inọ imiidiikpereke, utañkpọ inyʌññọ isobo. 34 Sia itie nte ñkpọuto mfo ana, kpa ke ndo ke esịd mfo adiisịne.

35 "Isiine afọñ, ibeeñe idem utom, inam mme utuenikañ ndufo esak, 36 nte mbon e-ebeeñeke idem ebet eteufọk ammọ adiito usọrọ ndọ ndi, nọ ato do anye amaato adi idikọñ usʌñ ammọ ebeere ini keed enọ anye. 37 Adiifọfọn inọ nditọufọk e-eteufọk adiito idikịt ammọ naña eba ke mbeeñeidem. Ke akpanikọ ke ibo ndufo, eteufọk ayaasịne afọñ aba ke mbeeñeidem, abo nditọufọk esuuk etie ke akpokoro ndidia, ndin anye ayaase ñkpọ abaña ammọ. 38 Adiifọfọn inọ mme nditọufọk e-eteufọk adiito idikịt naña ammọ eba ke mbeeñeidem, akpekọm ke ufọọd akonayio me idaha ayio ayemme adisiere. 39 Ado idiọọñọ ntom: Adieke anieufọk akpekediọọñọke idaha ini ke akonayio i-inọ adiidi ufọk amọ, anye akpaakekpeme ufọk amọ, ndin ikpikiyakka nọ inọ adʌk. 40 Ana ndufo ñko ebeeñe idem, sia Ayịn Awo adiidi ke awa a-ndufo imiidiibeeñeke ibet anye."

41 Pita amaabịp ate, "Abọọñ, afo atop ñke ami inọ ñnyịn me atop anọ afịd awo?"

42 Abọọñ amaabọọrọ ate, "Anie ndin ado anam akpanikọ ye anie aniọñ etubom mbon utom, e-eteufọk anịmme ke iwuod nọ asikpe akʌk ndidia anọ mbon utom ke akem ini? 43 Ayaafọn anọ ayịnufọk e-eteufọk anyọññọ adikịt naña anye anam se ekebo anye anam. 44 Ke akpanikọ ke ibo ndufo, ayaanịm anye ke iwuod afịd ñkpọ se anye anie. 45 Ado ayịnufọk akpekere ke eteufọk imọ atinyọñ idi ayaakpeene, ndin atọọñọ adifiomo mme nditọufọk mbon ñko, ata, anwọñ, akpa mmịn, 46 eteufọk amọ ayaanyọñ adi ke usen a-ayịnufọk ami imiikikpeññe idem ye ke awa a-anye imiidiọọñọke. Eteufọk amọ ayaanọ anye ufen anyʌñ abịn anye nọ akeba ye mbon imiinịmme Abasi ke akpanikọ.

47 "Ayịnufọk a-adiọọñọke uduak eteufọk amọ ado inamma mbeeñeidem, inyʌññọ inam se eteufọk amọ ayem enam, ayaabọ uwak ntiim. 48 Ado ayịnufọk i-imiidiọọñọke uduak eteufọk amọ ado anam ñkpọ se idot ufen, ayaabọ etək-etək ufen. Amaado awo e-ekenọọhọ uwak, eyaebịp uwak ñkpọ eto anye; ñko awo e-eyaaha uwak ñkpọ esịn ke ubọk, eyaenyʌñ eyem uwak ñkpọ eto anye.

49 "Ami ñkedi adisịn ikañ ke ederimbod; ubaha nte adooho ikañ ado amaasaasak! 50 Ami mmenie uduọkmmọọñ adina, ndin se naña mba ke mfʌhọ tutu uduọkmmọọñ ado akweeñe! 51 Ekere ke ñkeben emem ndi isọñ? Iyoo, ñkeben ubakka ndi. 52 Tọọñọ ke idahami, awo ition eyaeba ke ubon, ndin ubakka ayaaba ke ufọọd ammọ, ita eyaebakka eda ye iba ako, iba eyaenyʌñ ebakka eda ye ita ako. 53 Ete ayaatuaha ye ayịn amọ, ayịn ayaanyʌñ atuaha ye ete; eka ayaatuaha ye ayịn awonwaan amọ, ayịn awonwaan ayaanyʌñ atuaha ye eka; eka ebe ayaatuaha ye anwaan ayịn amọ, anwaan ayịn ayaanyʌñ atuaha ye eka ebe."

54 Yisọs amaabo atu awo ate, "Ndufo imaikịt naña ntọñanyọñ ato usobutịn adi, idaha-idaha ado ndufo ete, ‘Edịm ayaadep,’ edịm anyʌñ adep. 55 Ñko afịm a-atooho usuuk amaafịme, ndufo ete, ‘Ayio ayaada,’ anye anyʌñ ado ntoro. 56 Ndufo mme mbubịk! Ndufo emediọọñọ naña ekappa naña ayio adiiba akeene naña isọñ ye anyọñ aba. Anam die ndin nọ ndufo imiikanna ikappa idiọọñọ se utọ ini ntom ada anọ?

57 "Nsoo inam nọ ndufo imiikanna ibiide inọ idem ndufo se ido nnen-nnen? 58 Ke ini awo usua mfo ubenne fiin abịne akpe ikpe esob, nwana nam emem ye anye ke usʌñ, imiidooho ntoro anye ayauben fiin abịne abiideikpe, ndin abiideikpe ayauyaak fiin anọ adaaha, ndin adaaha ayausịn fiin ke ufọk ñkpakọb. 59 Ami udọkkọ fiin nte, afo uduuwuọhọ tutu afo akpe akpatre akʌk."

10 Ke ntoro, sio akpọsọñ udọñ ke esịd mfo fep

nyʌñ sịññe mme afanekọñ abʌkidem fep,

sia uyịn ye adudu edo ikpu-ikpu.

4 Idem keed aba, Sịbidịd keed anyʌñ aba, kpa naña ekikoot ndufo ke idodanyen keed ke ini ekikoodo ndufo;

22 Ibaan ndọ isuuho idem inọ mme ebe ndufo, nte esuuhọ enọ Abọọñ. 23 Sia ebe ado iwuod anọ anwaan nte Krais adooho iwuod anọ ufọkabasi, a-adooho idem amọ, a-anye anyʌññọ ado Andinyaaña.

15 Yak emem Krais akara ke esịd ndufo, sia nte mbaak idem ke idem keed ekikoot ndufo enọ emem. Ndin inie esịd ekọọm.

22 Abọọñ Abasi amaakama akpọñkañ a-anye akesioho ke idem Adam abot awonwaan, anyʌñ aben anye asọk Adam.

23 Adam amaabo,

"Anye ami ndin ado akpọ a-atooho akpọ mmi

ye abʌk a-atooho abʌk mmi;

anye adiikere ‘awonwaan,’

sia ekesio anye eto awodeen."

24 Ntak ado anam awodeen akpọñ ete ye eka amọ akediana ye anwaan amọ, ndin ammọ ekappa edo abʌk keed.

16 Ke ntom, esịd iduọhọ ñnyịn. Ndin akpesʌkado a-ñnyịn imiinieghe inweek aba ke ikpọkidem, ado ke esịd idem Abasi asʌk isịn ñnyịn inweek ke usen ke usen.

24 "Anye ke idem amọ amaabiom mme idiọọkñkpọ ñnyịn" ke ikpọkidem amọ ke krọs, nọ ato do ñnyịn ikpa ikpọñ idiọọkñkpọ inyʌñ idu uwem inọ adinenido. "Ato ke unan amọ udọñọ ikweeñe ndufo."

2 Afịd ñnyịn imiduọ ke uwak usʌñ. Awo ndomokeed i-imiinamma ndudue ke se anye atañ ado awo a-afọnnọ ama, a-akemekke adinie mfarakeidem.