1 Ndin ami mmaatịmme ñkere mbaña afịd ami ñnyʌñ nnịm ke akpatre mbo ke adinen awo ye awo aniọñ ye se ammọ enam esịne ke ubọk Abasi, ado awo ndomokeed idiọọñọke me ima me usua ado se ida ibet ammọ. 2 Afịd awo enie usʌñ keed, ndinen awo ye mbon ibak, nti ye ndiọi, mbon se isana ye mbon se imiisanake, mbon se iwa uwa ye mbon se imiiwaaha.

Naña aba ye eti awo,

kpa ntoro ke aba ye anamidiọọk;

naña aba ye mme anwọñọ unwọñọ,

kpa ntoro ke aba ye mbon e-ekoppo ndịk adinwọñọ unwọñọ.

3 Anye ami ado idiọọk a-abaaha ke afịd ñkpọ se itịppe ke idak utịn: Usʌñ keed ana anọ afịd awo ke isọñ. Mfen ñko, esịd mbon awo eyọhọ ye idiọọk, ñko ndisịme asịne ammọ ke esịd ke ini ammọ ebaaha ke uwem, ndin ke ado aboiyoke ammọ ekeene mme akpañkpa. 4 Awo ndomokeed a-abaaha ke atu mme aduuwem a-anie idodanyen, aduuwem ewa afọn akan adukpo ekpe!

5 Sia mme aduuwem e-ediọọñọ ke mmimọ iyaikpa,

ado mme akpañkpa idiọọñọke ñkpọ ndomokeed;

ammọ inieghe utịb aba,

sia kpa anyịñ ammọ eyaefre.

6 Ima ammọ, usua ammọ

ye ufịb ammọ emaesop ke ataa anyan ini;

tutu amama ammọ inieghe udeeme aba

ke ñkpọ keed akeedodo a-atịppeke ke idak utịn.

7 Kaa, nyʌñ dia ndidia mfo ke idadesịd, nyʌñ nwọñ ukọd mfo ke inemesịd, sia Abasi amaanọnọ unyịmme abaña afịd se afo anam. 8 Sịne afia afọñ afịd ini, nyʌñ yet adan ke iwuod mfo afịd ini. 9 Dia uwem ye anwaan mfo, a-afo amaaha, ke afịd ikpu-ikpu usen uwem ake Abasi unọọhọ fiin ke idak utịn, ke afịd usen mfo i-imiiwuọñọke ñkpọ. Sia ami ado udeeme mfo ke uwem ye ke akpọsọñ utom mfo ke idak utịn. 10 Ñkpọ akeedodo ake ubọk mfo atuuhọ adinam, nam anye ke afịd adudu mfo, sia ke abio mme akpañkpa, ake afo akaaha, adinam utom me adiduak uduak me ifiọk me aniọñ ibaaha.

11 Ami mmekịt ñkpọ mfen ke idak utịn:

Idooho mbon e-esọppọ itọk ekan ke nduba

inyʌññọ ido mbon e-enieghe adudu ekan ke ekọñ,

ndidia ñko ikaaha ibịne mbon aniọñ

inie ñko inaaha inọ mbon e-enieghe ikike

inyʌññọ ido mme adiọọñọñkpọ enie mfọn

ado ini ye ufañ atịppe anọ afịd ammọ.

12 Mfen ñko, awo ndomokeed idiọọñọke idaha se ini ammọ adiidi:

Kpa naña emʌm iyak ke ndoom iyịre,

me adimʌm inuen ke afia,

kpa ukem ado ke afia idiọọk ini amʌm mme awo

ake eduọhọ edʌk ammọ ke unana adidiọọñọ.

13 Ami mmaanyʌñ ñkịt ke idak utịn, kpa uwọdñkpọ ake aniọñ asịnne ke esịd mmi ekamba-ekamba: 14 Etək abio keed amaaba ake mme awo imiikiwakka ke esịd. Ndin adidem keed, a-akenieghe adudu amaadi adinwana ekọñ ye anye, akanna anye akʌk anyʌñ abọp ikpọ itie nnaaekọñ adidat nsobo anye. 15 Amaaba awodeen keed a-akedʌññọ ke abio ado a-akedooho uweene ado ayọhọ ye aniọñ, ndin anye amaadat aniọñ amọ anyaaña abio ado. Ado awo ndomokeed ikitoiyoke uweene ete ado. 16 Ke ntoro ami mmaabo, "Aniọñ a-afọn akan adudu." Ado e-esịn aniọñ uweene awo ke ndek, ndin awo inyʌññọ ikop ikọ amọ aba.

17 Usʌk-usʌk ikọ a-atooho awo aniọñ ado se ekop

akan ñkpo a-atooho andikara mbon ndisịme.

18 Aniọñ a-afọn akan uwak ñkpọ ekọñ,

ado anamidiọọk keed ababiat uwak nti ñkpọ.