1 Anie awo atie nte awo aniọñ?

Anie awo adiọọñọ naña ñkpọ asaña anwaña awo?

Aniọñ awo ananam iso amọ ayamma

anyʌñ akpəho nsọọñ akpọiso amọ.

2 Ami nnọ item nte, nịm ewʌhọ adidem, sia afo amaata unwọñọ ke iso Abasi. 3 Kuusọp udakka ukpọñ iso adidem. Kuuda idiọọk ñkpọ, sia anye ayaanam se inem anye. 4 Sia ikọ adidem anieghe adudu, anie awo akeme adibo anye, "Nsoo ke afo anam?"

5 Awo akeedodo a-anịmme mbed amọ, idiinieghe mfịna,

ndin esịd aniọñ ayaadiọọñọ akem ini ye nnen-nnen ini ye usʌñ unam ñkpọ.

6 Sia afịd ñkpọ e-enie akem ini ye usʌñ edinam amọ,

akpesʌkado ukuud akeme adifiik awo.

7 Sia awo ndomokeed imiidiọọñọke ini iso,

anie awo akeme adidọkkọ awo mfen se idiidi ke ini iso?

8 Sia awo ndomokeed imiinieghe adudu adikara ñnyʌñ mmʌm afịm ñkama,

ke ntoro ñko awo ndomokeed inieghe adudu ibaña ini ñkpa ammọ.

Sia awo imiiyakka awo akpọñ ekọñ ke ini ekọñ asʌkkọ anwana,

kpa ukem ado ke ibak imiidiiyakka mme anam ibak ebọkkọ.

9 Ami mmaakịt afịd ñkpọ ami, naña ami ñkesịnne akikere mmi ke afịd ñkpọ se ekenam ke idak utịn. Ini a-aba ake awo akarake mbon mfen ado aben ubiak anọ idem amọ. 10 Ndin ñko, ami mmaakịt naña ebuuk mbon ibak, mbon e-ekesimaaha adidi ñnyʌñ ñkaa ke adisana itie ñnyʌñ mbọọ itooro ke abio ammọ ekesinamma ñkpọ ami. Ami ñko ado ikpu-ikpu.

11 Awo imiisọppọ ibiere ikpe imia anamidiọọk ufen, esịd mbon awo esiyọhọ ye mme mbubịk akikere adinam idiọọk ñko. 12 Akpesʌkado awo ibak a-anamma idiọọkñkpọ akañ ikie keed akeme adidu anyan uwem, ami mmediọọñọ ke ayaafọn eti-eti ye mbon se ibaak Abasi, mbon e-ebaaha ke uteeñe ke iso amọ. 13 Ado sia mbon ibak imiibaaha Abasi, idiifọnnọ ye ammọ, ndin nte ndukpọñ, mme usen ammọ idiinyọọñọ.

14 Aba ñkpọ mfen a-atịppeke ke iso isọñ ammiiwuọñọke ñkpọ: adinen awo a-abọọhọ utịb se awo ibak akpebọọ, ye awo ibak a-abọọhọ utịb se adinen awo akpebọọ. Anye ami ñko, ami mbo ke ado ikpu-ikpu. 15 Ndin ami ntooro udia uwem, sia ibaaha se ifọn ye awo ke idak utịn ikan adidia ñnyʌñ ñnwọñ ñkpọ ñnyʌñ ndaara. Ndin inemesịd ayaakeene ammọ ye akpọsọñ utom ke afịd ayio uwem ake Abasi anọọhọ ammọ ke idak utịn.

16 Ke ini ami nsịnne akikere mmi adidiọọñọ aniọñ ñnyʌñ nda ñkịt utom ake enamma ke isọñ, naña mbon awo imiidaiyake idab ke uweemeayio me ke akonayio, 17 ndin ami mmaakịt afịd se Abasi anam. Awo ndomokeed ikemeke adidiọọñọ se ika iso ke idak utịn. Akpesʌkado mme awo esịnne ifịk eduunọ anye, ibaaha awo se ikeme adiyaara ndiọọñọ se anye awuọñọ. Akpekọm mbon aniọñ edat ke mmimọ imidiọọñọ, ammọ inieghe ata ukeme adinekke ndiọọñọ anye.