1 Mme ikọ e-etooho Andikpeeb,* ayịn Defid, adidem ke Yeruselem:

2 "Ikpu-ikpu! Ikpu-ikpu!"

Andikpeeb atañ.

"Ataa ikpu-ikpu!

Afịd ñkpọ edo ikpu-ikpu."

3 Nsoo udod ke mme awo edia eto afịd utom

a-ammọ enamma ke idak utịn?

4 Mme emana edi, mme emana enyʌñ enyọñọ,

ado isọñ ada ke nsi-nsi.

5 Utịn asakka utịn anyʌñ asop,

anyʌñ asọsọp atịmme akaa itie nte anye akesakka.

6 Afịm afịme akaa ke usuuk

anyʌñ akanna akaa ke adoro

anye akakanna,

afịd ini akanna asaña kpa ke usʌñisañ amọ.

7 Afịd idịm efeghe edọñọ akpainyañ,

ado akpainyañ akenam iyọhọke.

Itie nte mmọọñ idịm eto ewuọ edi,

kpa do ke ammọ etịmme eka.

8 Afịd ñkpọ ananam awo akpa mba,

akan se awo akan atañ.

Akenam ndise iyʌkkọke anyen,

utọñ ñko iyʌkkọke adikop ikọ.

9 Se imaikiba ayaamaana aba,

se emaekenam eyaemaana enam;

ñkpọ ndomokeed idooho ufa ke idak utịn.

10 Nte ñkpọ mmọdo se awo akeme adibo,

"Se! Anye ami ado ufa ñkpọ"?

Anye amaababa mi, ke anyan ini;

anye amaababa mbemiso ini ñnyịn.

11 Ibaaha awo se itoiyo mme emana esed;

kpa mbon se idiidi ke ayio iso

awo idiitoiyoke ammọ

ke atu mbon se ikeene ammọ.

12 Ami, Andikpeeb, ñkedo adidem Isrel ke Yeruselem. 13 Ami mmaanyʌñ ndat aniọñ nsio idem mmi nnịm ke adikpeep ñnyʌñ nduuñọ afịd ñkpọ se enam ke idak mme hefịn nse. Se naña Abasi aben ataa ndoppo mbiomo adot ubonawo ke idem! 14 Ami mmekịt afịd ñkpọ se itịppe ke idak utịn; afịd ammọ edo ikpu-ikpu, ado adifeghe mbịne afịm.

15 Awo ikanna inekke se imaikikwaña;

se imiisịneke ke atu idʌkkọ ke ibad.

16 Ami mmaatañ nnọ idem mmi mbo, "Se, ami mmekọt ke aniọñ ñkan afịd mbon se ikikara Yeruselem mbemiso ami; ami mmenie uwak aniọñ ye ifiọk." 17 Ndin ami mmaaben esịd mmi nsịn ke adidiọọñọ aniọñ, ñko ye ake idaad ye ndisịme, ado ami mmaakpeep, ke anye ami ñko, ado adifeghe mbịne afịm.

18 Sia akpọsọñ aniọñ asaña ye akpọsọñ ukuud;

naña ifiọk akpon, ukem ado ke mfʌhọ akpon.