1 E-enịm ini enọ afịd ñkpọ,

ye ini unam afịd ñkpọ ke idak utịn:

2 ini a-awo amanake ye ini a-awo akpaaha,

ini e-etọọhọtọ ye ini e-edọkkọdọk,

3 ini e-ewottowot ye ini e-ekọkkọkọk udọñọ,

ini e-ewuudowuut ye ini e-ebọppọbọp,

4 ini e-etuaha ayịd ye ini e-esakka imam,

ini e-efʌhọke ye ini e-enekke unek,

5 ini e-esuanna itiad ye ini e-etañña ammọ ebok,

ini e-efattafat ye ini e-etreke adifafat,

6 ini e-eyemme ñkpọ ye ini e-etreke adiyem,

ini e-enịmmenịm ye ini e-etoppotop eduọọk,

7 ini e-ewaiyawai ye ini e-ediọññọdiọñ,

ini e-edoppo uyio ye ini e-etañña ikọ,

8 ini e-emaahama ye ini e-esuahasua,

ini ekọñ ye ini emem.

9 Nsoo udod ke mme anam utom edia ke akpọsọñ utom ammọ? 10 Ami mmekịt ekamba mbiomo A-Abasi abenne anọ ubonawo. 11 Anye a-anam afịd ñkpọ ayaiya ke akemini ammọ. Anye a-anyʌñ anịm ini nsi-nsi ke esịd ubonawo; kpayeado,* awo ndomokeed ikanna idomo ikịt se Abasi anam tọọñọ ke ntọọñọ tutu asịm utịd. 12 Ami mmediọọñọ mbo ke ibaaha ñkpọ se ifọn ye awo ikan adikop idadesịd ye adinam nti ñkpọ ke ini ammọ ebaaha ke uwem. 13 Nọ ammọ keedekeed ekpedia enyʌñ enwọñ ñkpọ, enyʌñ enie uyʌkkọ ke afịd se ammọ ekpa ufen ebaña, ami ado enọ Abasi. 14 Ami mmediọọñọ ke afịd ñkpọ se Abasi anam ayaada ke nsi-nsi; ibaaha se edian inyʌññọ iba se esio efep. Abasi anam ado nọ mme awo ebaak anye.

15 Se adodo a-abaaha mfịn ami amaababa,

ñko se idiiba amaadaadak aba;

ndin Abasi ayaakoot se imaikiboiyo nọ adinam ibad.

16 Ami mmaanyʌñ ñkịt ñkpọ mfen ke idak utịn:

Ke itie ubiideikpe, ibak amaaba,

ke itie unenikpe, ibak amaaba.

17 Ami mmaabo ke esịd mmi nte,

"Abasi ayaaben ndinen awo ye mbon ibak

adi ke iso ikpe,

sia ini ayaaba anọ afịd adinam,

ini e-ekpeeghe ikpe afịd adinam."

18 Ami mmaanyʌñ mbo ke esịd mmi nte, "Ke abaña awo, Abasi adomo ammọ ase nọ ato do ammọ ekịt ke mmimọ ibit mme unam. 19 Ke akpanikọ ini iso mme awo aba nte ake mme unam; ukem ini iso abet naña ammọ iba: Naña keed akpa ñkpa, kpa ntoro ke anye ako anyʌñ akpa. Afịd enie ukem ibifịk*; ibaaha se awo adat afọn akan mme unam. Afịd ñkpọ ado ikpu-ikpu. 20 Afịd eka ukem itie; edat afịd eto ke ntan, kpa ntan ke afịd etịmme eka. 21 Anie awo adiọọñọ me sịbidịd awo adakka ke anyọñ, ñko me sịbidịd unam anyʌñ akaa esịd isọñ?"

22 Ndin ami mmaakịt ke ibaaha se ifọn nte awo adikop inem ke utom amọ, sia ado ado udod amọ. Sia anie akeme adiben ammọ yak edikịt se idiitịppe ke ammọ emaeboiyo ifep?