1 Ndin ami mmaamaana nse ñnyʌñ ñkịt afịd ufiik se ikidat itie ke idak utịn:

Ami mmaakịt mmọọñayịd mbon se efiik,

ammọ inyʌññọ inie awo idọñesịd;

adudu akeba ke ñkañ mme andifiịk ammọ,

ndin ammọ inieghe awo a-anọọhọ ammọ idọñesịd.

2 Ndin ami mmaatañ mbo ke mme akpañkpa,

e-emaekekpañña,

e-enie inemesịd ekan mme aduuwem,

e-esʌkkọ edodu uwem.

3 Ado andifọn ñkan naña ammọ iba

ado anye i-imiimanake kpaanam,

i-imiikịtte idiọọkñkpọ

e-enamma ke idak utịn.

4 Ami mmaanyʌñ ñkịt ke afịd akpọsọñ utom ye afịd se awo anam anịm ato ke awo adifịbe awo mfen. Ami ñko ado ikpu-ikpu, ado adifeghe mbịne afịm.

5 Mme ndisịme ewawañ ubọk ammọ

enyʌñ esobo idem ammọ.

6 A-afọn adinie ayọhọ ubọk ñkpọ keed ye ifuuro

akan naña ubọk iba adiyọhọ ye akpọsọñ ufen

ñnyʌñ mfeghe mbịne afịm.

7 Mfen ñko ami mmaakịt ñkpọ i-imiiwuọñọke ñkpọ ke idak utịn:

8 Awodeen keed amaaba a-akedooho ataa ikpọọñ;

anye ikinieghe ayịn awodeen me ayịneka awodeen.

Akpọsọñ utom amọ ikinieghe utịd,

kpayeado inie amọ ikiyʌkkọke anye.

Anye amaabịp, "Anie awo ke ami mbọ ufen ami nnọ,"

"nsoo inyʌñ ido ntak a-ami ñkpanna idem mmi adidia uwem?"

Ami ñko ado ikpu-ikpu,

ukuud-ukuud ndubeghe!

9 Awo iba e-efọn ekan awo keed,

sia ammọ enie eti udod eto utom ammọ:

10 Adieke keed ke atu ammọ aduọhọ,

keed akeme adinwam anye ako nọ adakka ada.

Ado mbọm awo a-aduọhọ

ndin inieghe awo se inwam anye nọ adakka ada.

11 Ñko, adieke awo iba enaaha itie keed, ammọ eyaekop ufiob.

Ado awo keed akeme die adikop ufiob ikpọọñ?

12 Akpesʌkado ekeme edikan awo keed ke anwan,

awo iba ekeme edida ñnwana ñnyaaña idem ammọ.

Udʌk a-awañake ita ikemeke adisọp ñkịppe.

13 A-afọn adido uweene akparawa a-anieghe aniọñ akan adido usọñ ndisịme adidem i-imiikanna idiọọñọ aba naña akop item. 14 Akeme adido akparawa ado aketo ufọk ñkpakọb adida ubọọñ, imiidooho anye akemana ke ufọk uweene ke abioubọọñ amọ. 15 Ami mmaakịt ke afịd awo se idʌñ inyʌñ isaña ke idak utịn ekekeene akparawa, andidad itie adidem. 16 Afịd mbon e-ekedaaha ammọ ke iso ikinieghe utịd. Ado mbon e-ekediighe ke edem ikikoppo inemesịd ye andidad itie abọọñ. Anye ami ñko ado ikpu-ikpu, ado adifeghe mbịne afịm.