* 1 Kpeme ikpad mfo ke ini afo akaaha ufọk Abasi. Saña kpere nyʌñ ke kpañ utọñ kop utu ke anam uwa mme ndisịme, i-imiidiọọñọke ibo ke ammọ enam idiọọk.

2 Kuuyak inua mfo asọp,

kuunyʌñ uyak esịd mfo asọp

aditañ ikọ ndomokeed ke iso Abasi.

Abasi aba ke hefịn

ndin afo aba ke isọñ

ke ntoro yak ikọ mfo ado ibad-ibad.

3 Ndab adi akeene uwak akikere,

ñko uwak ikọ ado idiọọñọ ikọ ndisịme awo.

4 Ke ini afo anamma akaaña anọọ Abasi, kuukpeene adisio anye. Anye inieghe inemesịd ibaña mme ndisịme; sio akaaña mfo. 5 A-afọn aditre adinam akaaña akan adinam ado usioho anye. 6 Kuuyak inua mfo udat fiin asịn ke idiọọkñkpọ. Kuunyʌñ ubịne isʌñutom ke tembịd ukufaaña ubo, "Akaaña mmi akedo ndudue." Nsoo ido ntak A-Abasi akpeyatta esịd abaña ikọ a-afo atañña anyʌñ abiat ubọkutom mfo? 7 Akpọsọñ udappa ndab ye utañ uwak ikọ edo ikpu-ikpu. Ke ntoro baak Abasi.

8 Adieke afo akịtte naña efiik uweene ke idʌñ, ekwaañ ikpe enyʌñ etre adinọ unen awo, kuuyak idem ukpa fiin ke utọ mme ñkpọ ami; sia adaaha keed asʌk ase se etək anam utom mfen anam, ndin ke atu ammọ awo iba mme andikpon ñkan ammọ mmọdo eba ñko esʌk enyʌñ ese. 9 Udod a-atooho isọñ anie afịd awo; adidem ke idem amọ adia udod ato mme inwañ.

10 Awo akeedodo a-amaaha akʌk isikoppo uyʌkkọ;

awo akeedodo a-amaaha inie isiyʌkkọke ke se anye anie.

Ami ñko ado ikpu-ikpu.

11 Kpa naña ñkpọ awak aka,

ukem ado ñko ke mbon se iyem ammọ enyʌñ ewak.

Ndin nsoo udod ke mme ñkpọ ami enọ mme andinie

ke imiibọhọke adinọ anyen ammọ udia ke adise ammọ?

12 Idab awo anamutom anenem,

me ammọ edia etək ñkpọ me edia uwak,

amaado mme anie ñkpọ awo,

inie ammọ iyakka ammọ edaiya idab.

13 Ami mmekịt ataa akpatre idiọọkñkpọ ke idak utịn:

inie e-edịppe ebono yak akappa ado ñkpọ nsobo anọ mme andinie,

14 me inie a-atakka ato ke ndiọọkiso,

nọ ato do ke ini ammọ enieghe nditọ

ñkpọ ndomokeed ibaaha inọ ammọ nte udeeme.

15 Afịd awo emana ifed eto idịb eka ammọ,

naña afịd awo edi, kpa ntoro ke ammọ enyọñọ.

Ammọ idatta ñkpọ ndomokeed ke akpọsọñ utom ammọ

a-ammọ ekemeke adikama ke ubọk ammọ.

16 Anyem ñko ado ataa akpatre idiọọkñkpọ:

Naña afịd awo edi, kpa ntoro ke ammọ enyọñọ,

ndin nsoo udod ke ammọ edia,

sia ammọ ebọọhọ ufen enọ afịm?

17 Ammọ edia ñkpọ ke ekịm ke afịd ayio uwem ammọ,

ye akpọsọñ ndutịme, ukuud ye iyadesịd.

18 Se ami ñkịt mbo ke afọñ ado ami: ke ado nnen-nnen ñkpọ awo adidia ñkpọ, adinwọñ ñkpọ ye adinyʌñ ñkop uyʌkkọ nto akpọsọñ utom ufen ammọ ke idak utịn ke ibad-ibad usen ake Abasi anọọhọ ammọ, sia ami ado udeeme ammọ. 19 Ñko, ke ini Abasi anọọhọ awo inie ye uwak ñkpọ, ye ukeme adikop inem nto ammọ, adibọ ami nte udeeme anyʌñ anie inemesịd ke akpọsọñ utom ammọ, anyem ado enọ Abasi. 20 Ammọ isisọppọ itoiyo mme usen uwem ammọ, sia Abasi anam esịd ammọ ayọhọ ye idaara.