1 Ami mmaabo idem mmi, "Di idahami, ami ñyaudomo fiin idomo ke udiauwem nọ ato do ndiọọñọ se ifọn." Ado anye ado ñko amaawọt ke ado ikpu-ikpu. 2 Ami mmaabo, "Imam ado idaad. Ndin nsoo eti ñkpọ ke udiauwem aben adi?" 3 Ami mmaanwana adiben ukọd nnọ idem mmi inemesịd, ñnyʌñ mfat ndisịme ñkama, ke esịd mmi asʌkkọ andat usʌñ ke aniọñ. Ami ñkeyem adikịt ñkpọ se ikpifọn nọ mme awo enam ke idak mme hefịn ke ibad-ibad usen uwem ammọ.

4 Ami mmaaben ikpọ utom ñkama: mmaabọp mme ufọk nnọ idem mmi ñnyʌñ ntọ mme inwañ fain. 5 Ami mmaanam inwañ edemesa ye itie uduọk adudu ñnyʌñ ntọ se utọ se utọ eto mfịd ke inwañ. 6 Ami mmaanam udiọhọ mmọọñ nọ anwam mme eto akọt ke mme inwañ ado. 7 Ami mmaadep ifʌn ideen ye ibaan ñnyʌñ nnie mme ifʌn mfen e-ekemanake ke ufọk mmi. Ami mmaanyʌñ nnie udịmenañ ye udịmedọñ e-ewakka ekan ake mbon se ikimbem miin iso iba ke Yeruselem. 8 Ami mmaakoono silfa ye kold nnịm nnọ idem mmi, ye ñkpọuto ndidem ye ake mme ikpeghe ukara. Ami mmaanyʌñ nnie ideen ye ibaan mme akwọikwọ, ye esa ibaan ñko, mme ñkpọ e-enamma esịd anem awodeen. 9 Ami mmaakpon ñkan afịd awo se ikimbem miin iso iba ke Yeruselem. Ke afịd ami aniọñ mmi akesʌk ababa ye ami.

10 Ami ñkitreke adinọ idem mmi afịd ñkpọ inemesịd se anyen mmi akeyem;

ami ñkisịnne adinọ esịd mmi inemesịd ndomokeed.

Esịd mmi amaakop inem ke afịd utom mmi,

ndin anye ami akedo utịb a-ami mbọọhọ ke afịd ufen mmi.

11 Ado ke ini ami ñkedaaha nse afịd se ubọk mmi akenam

ye afịd se ami ñkenie nto ufen mmi,

afịd ñkpọ ekedo ikpu-ikpu, adifeghe mbịne afịm;

udod ndomokeed ikibaaha ke idak utịn.

12 Ndin ami mmaakanna akikere mmi ñkere mbaña aniọñ,

ye unana iwuod ye ndisịme.

Nsoo mfen ke awo a-adatta itie adidem akeme adinam

akan se emaekenanam?

13 Ami mmaakịt mbo ke aniọñ a-afọn akan ndisịme,

ukem naña unwana afọn akan ekịm.

14 Mbon aniọñ enie anyen ke iwuod ammọ,

ke ini mme ndisịme esañake ke ekịm;

ado ami mmeyaara ndiọọñọ mbo

ke ukem-ukem unọmọ asịm ammọ awo iba.

15 Ndin ami mmaabo ke esịd mmi nte,

"Unọmọ ndisịme ayaanyʌñ ansịm miin ñko.

Nsoo udod ndin ke ami ndia ke adinie aniọñ?"

Ami mmaabo ke esịd mmi nte,

"Anye ami ñko ado ikpu-ikpu."

16 Sia adooho awo aniọñ, ukem nte ndisịme, awo idiitoiyoke ikpeene;

mme usen e-ededi ema tọọñọ nte ekefre ammọ.

Kpa naña ndisịme akpa, awo aniọñ ñko ana akpa!

17 Ke ntoro ami mmaasua uwem ami, sia adooho se enam mi ke idak utịn ifọnnọ ye ami. Afịd ammọ edo ikpu-ikpu, edo adifeghe mbịne afịm. 18 Ami mmaasua afịd ñkpọ se ami ñkekpa utom nnọ ke idak utịn, sia adooho ana ami ñkpọñ ammọ nnọ andiñkeene miin ke edem. 19 Ndin anie adiọọñọ me awo ado adiido awo aniọñ mme ndisịme? Ado ammọ ediikara afịd se ami ñkedat ukeme ye eti iwuod mmi nnam nnịm mi ke idak utịn. Anye ami ñko ado ikpu-ikpu. 20 Ndin esịd mmi amaatọọñọ aditịmede abaña afịd akpọsọñ utom ufen a-ami ñkenamma ke idak utịn. 21 Sia awo a-akeme adinam utom ke aniọñ, ifiọk ye ikike, ado ana nte anye akpọñ afịd se anye akenie anọ awo mfen i-imiikibọọhọ ufen. Ami ñko ado ikpu-ikpu anyʌñ ado ekamba ndiọọkiso. 22 Nsoo ke mbon awo ebọ eto afịd ñkpọsọñ utom ye nsịnifịk a-ammọ enamma ke idak utịn? 23 Afịd usen utom ammọ ado mfʌhọ ye ubiak; kpa ke akonayio akikere esịd ammọ inaaha sʌñ. Ami ñko ado ikpu-ikpu.

24 Ibaaha se awo adiinam nọ afọn akan anye adidia ñnyʌñ ñnwọñ ñkpọ ñnyʌñ mbọọ uyʌkkọ nto utom ammọ. Ami mmekịt, ke anye ami ñko ato ubọk Abasi, 25 sia ke esioho anye efep, anie akeme adidia ñkpọ me adikop inem uwem? 26 Awo a-anemme Abasi esịd, Abasi anọ anye aniọñ, ifiọk ye inemesịd, ado amaado anamidiọọk anye anọ utom adikoono inie mbok ñnyʌñ ntịm ammọ mbono nọ akpọñ anọ awo a-anamma se inem Abasi esịd. Ami ñko ado ikpu-ikpu, adifeghe mbịne afịm.