1 Kpa naña adukpo nsʌñ enọ pefium idiọọk utebe,

ukem ado ke etək ndisịme akeme adikan aniọñ ye ukpono.

2 Esịd awo aniọñ ase ñkpọ akeene ubọk nnasia,

ado esịd ndisịme awo awọññọ akeene ufiin,

3 Idem idaha se mme ndisịme esaña ke usʌñ,

ammọ enana eti iwuod

enyʌñ ewọt afịd awo naña mmimọ isịme itre.

4 Adieke andikara ayatta esịd ye afo,

kuudakka ukpọñ itie utom mfo;

ifuuro-ifuuro edu akeme adinam ñkpoon ndudue asuuhọ.

5 A-aba idiọọk keed a-ami ñkịtte ke idak utịn,

utọ ndudue a-atooho andikara:

6 Mme ndisịme ke ebon ke mme ikpọ itie ukara,

ke ini mme imọ awo ebonoke ke mme usʌhọde itie.

7 Ami mmekịt naña mme ifʌn edoro ke edem enañmbakara,

ke ini nditọ ideen adidem esañake ke ukod nte mme ifʌn.

8 Awo akeedodo a-adọkkọ ube, akeme adiduọ ndʌk ube ado;

awo akeedodo a-awuudo ndibene, udʌkikọd akeme adikọñ anye.

9 Awo akeedodo a-abommo itiad akeme adidat unan nto mme itiad ado;

awo akeedodo a-asiaha ifia akeme adinie unọmọ nto ifia ado.

10 Adieke ekịd atịppe

awo inyʌññọ iban mben amọ,

eyaenekke eyem akpọsọñ adudu,

ado ifiọkutom ayaadat ufọn adi.

11 Adieke udʌkikọd adommo awo mbemiso esuuk anye ide,

andisuuk anye ide inieghe unen adibọ akʌk.

12 Mme ikọ e-etooho inua awo aniọñ eyọhọ ye mfọn,

amaado mme ndisịme, ñkpọkinua ammọ awot ammọ.

13 Ntọọñọ ikọ inua ammọ ado ndisịme;

ke akpatre ammọ edo ibak unana iwuod,

14 ndin mme ndisịme etañ uwak ikọ.

Awo ndomokeed idiọọñọke se idi ke iso;

anie akeme adidọkkọ awo mfen se idiitịppe ke ini iso?

15 Utom mme ndisịme akakak ammọ;

sia ammọ idiọọñọke usʌñ a-akaaha abio.

16 Adọdiọọk anọ abio ake adidem ammọ akedooho ayịnufọk*

ye anye ake mme nditọ ideen adidem ammọ ediaha usọrọ ke ubakusen.

17 Afọfọn anọ abio ake adidem ammọ atooho ufọk ubọọñ

ake nditọ ideen adidem ammọ enyʌññọ edia ndidia ke akem ini,

nọ enie adudu ado idooho ke ukpammịn.

18 Ato ke ntak ifu, abom ufọk adiappa;

ke ntak ubọk ifu, akọm ufọk adịt.

19 Usọrọ ndia ado ini mbre ye imam,

ukọd anyʌñ anam uwem anem,

akʌk anyʌñ ado ibọọrọ anọ afịd ñkpọ.

20 Kuusueeñ adidem akpekọm ke akikere mfo,

kuunyʌñ usueeñ imọ awo ke esịd ubeed mfo,

sia inuen ke ikpaanyọñ akeme adiben mme ikọ mfo,

ndin inuen a-afuurọke akeme adisuan se afo atañ.